قاہرہ(ویب ڈیسک) مصر میں ایک دولہے پر عین اس وقت قیامت ٹوٹ پڑی جب وہ اپنی زندگی کے حسین ترین سفر کا ابھی آغاز ہی کر رہا تھا۔ بیچارہ بڑے ارمانوں سے دلہن کو بیاہ کر گھر لایا تھا مگر دو گھنٹے بعد ہی وہ دنیا سے رخصت ہوگئی۔العربیہ کے مطابق 17 سالہ دلہن کا نام سماہ النہس بتایا گیا ہے، جو اپنے سسرال آنے کے دو گھنٹے بعد سفر آخرت پر روانہ ہو گئی۔ نوعمر دلہن کی المناک موت کے بارے میں اس کے دولہا کا کہنا ہے کہ وہ شادی کی تقریب کے دوران بے حد تھک چکی تھی اور اس نے کچھ کھایا پیا بھی نہیں تھا جس کے باعث اس کے جسم سے توانائی ختم ہو چکی تھی۔ دولہا کے مطابق دلہن کو غیرمعمولی تھکاوٹ اور کمزوری کے باعث ہارٹ اٹیک ہو گیا تھا، تاہم پولیس نے اس بیان کے باوجود معاملے کی فورینزک تحقیقات کا فیصلہ کیا ہے۔ بدقسمت دلہن کی سکول کی تعلیم بھی ابھی مکمل نہیں ہوئی تھی کہ اس کی شادی کر دی گئی تھی۔واقعے کی تحقیقات المنصورہ پولیس کر رہی ہے۔
