اسلام آباد(مانیٹرنگ ڈیسک، نیوز ایجنسیاں) وزیراعظم عمران خان نے سلیمان خان کو ڈی جی آئی بی ،محمد جہانزیب خان کو چیئرمین ایف بی آر اور خالق داد لک کو ڈی جی نیکٹا تعینات کردیا۔ تفصیلات کے مطابق منگل کو وزیراعظم عمران خان نے سلیمان خان کوڈائریکٹرجنرل انٹیلی جنس بیورو( آئی بی) مقرر کردیا جبکہ محمد جہانزیب خان کو چیئرمین فیڈرل بورڈ آف ریونیو(ایف بی آر) اور خالق داد لک کو نیشنل کوآرڈینیٹرنیکٹا تعینات کردیا گیا۔ اس حوالے سے باضابطہ نوٹیفکیشن بھی جاری کردیا گیا۔ وزیراعظم عمران خان کی زیرصدارت وفاقی کابینہ کا اجلاس منعقد ہوا جس میں کئی اہم فیصلے کیے گئے۔اجلاس کے بعد نیوز کانفرنس میں تفصیلات بتاتے ہوئے وفاقی وزیر اطلاعات فواد چوہدری نے کہا کہ وفاقی کابینہ نے چیئرمین نیشنل بینک سعید احمد خان کو عہدے سے ہٹانے کی منظوری دے دی ہے جبکہ طارق جمالی نیشنل بینک کے قائم مقام صدر ہوں گے۔وزیراعظم ہاو¿س میں وفاقی کابینہ کا ہونے والا یہ تیسرا اجلاس تھا جس میں 9 نکاتی ایجنڈے پر غور کیا گیا۔ذرائع کے مطابق وفاقی کابینہ کے اجلاس میں مجموعہ ضابطہ فوجداری میں اصلاحات کیلئے ٹاسک فورس بنانے کی بھی منظوری دی گئی۔ وفاقی کابینہ نے چیئرمین نیشنل بینک سعید احمد خان کو عہدے سے ہٹانے ،نیب قوانین کو موثر بنانے کیلئے اس میں ترامیم کرنے ،جنوبی پنجاب صوبہ کے قیام کیلئے کمیٹی بنانے، سول سروس ریفارمز اور وفاقی حکومت کے عہدوں کی تنظیم نو، وفاقی وزارتوں، محکموں اور ڈویژنز کے اخراجات میں کمی کا جامع میکانزم بنانے، سادگی اور اخراجات میں کمی کیلئے ٹاسک فورس بنانے، 100 روزہ پلان پر عملدرآمد سے متعلق جامع نظام بنانے کی منظوری دیدی ہے جبکہ خواتین کا وراثت میں حصہ یقینی بنانے کیلئے قانون میں ترامیم کا فیصلہ کیا گیا ہے۔ منگل کو وفاقی کابینہ کا اجلاس وزیراعظم عمران خان کی زیر صدارت منعقد ہوا جس میں کئی اہم فیصلے کئے گئے۔ وزیراعظم ہاو¿س میں وفاقی کابینہ کا ہونےوالا یہ تیسرا اجلاس تھا جس میں 9 نکاتی ایجنڈے پر غور کیا گیا۔وفاقی کابینہ کے اجلاس کے بعد مشیر ماحولیات امین اسلم کے ہمراہ میڈیا کو بریفنگ دیتے ہوئے وفاقی وزیر اطلاعات ونشریات فواد چودھری نے بتایا کہ وفاقی کابینہ نے چیئرمین نیشنل بینک سعید احمد خان کو عہدے سے ہٹانے کی منظوری دے دی ہے جبکہ طارق جمالی نیشنل بینک کے قائم مقام صدر ہوں گے۔انہوں نے کہا کہ چیئرمین نیشنل بینک سابق وزیرخزانہ اسحاق ڈار کے ساتھ منی لانڈرنگ میں ملوث ہیں ۔انہوں نے کہا کہ نیب کے قوانین میں مزید ترامیم کی جائیں گی، نیب قوانین میں ترامیم کیلئے وزیر قانون فروغ نسیم کی سربراہی میں ٹاسک فورس بنادی گئی ہے جو اپنی سفارشات کابینہ کے سامنے رکھے گی۔انہوں نے کہا کہ بلاامتیاز احتساب پر کوئی سمجھوتہ نہیں کیا جائے گا ۔انہوں نے بتایا کہ وفاقی کابینہ نے سول سروس ریفارمز اور وفاقی حکومت کے عہدوں کی تنظیم نو، وفاقی وزارتوں، محکموں اور ڈویژنز کے اخراجات میں کمی کا جامع میکانزم بنانے، سادگی اور اخراجات میں کمی کیلئے ٹاسک فورس بنانے، 100 روزہ پلان پر عمل درآمد سے متعلق جامع نظام بنانے کی منظوری دی ہے۔ انہوں نے کہا کہ عدلیہ کےساتھ مل کر سول لاز میں ترامیم کی جائینگی تاکہ مقدمات کے فیصلے جلد ہوسکیں۔ انہوں نے کہا کہ سول لاز میں ہمارا انڈیکس افغانستان سے بھی کم ہے۔انہوں نے کہا کہ انسداد دہشت گردی ایکٹ میں بھی ترامیم لائی جائیں گی تاکہ انہیں مزید موثر بنایا جاسکے۔ انہوں نے کہا کہ مار خداداد لق کو نیکٹا کا سربراہ بنا دیا گیا ہے۔فواد چودھری نے بتایا کہ جنوبی پنجاب صوبے کے قیام کیلئے کمیٹی قائم کردی گئی ہے، جنوبی پنجاب صوبے کیلئے قائم کی گئی کمیٹی میں وزیر خارجہ شاہ محمود قریشی اور خسرو بختیار شامل ہیں۔انہوں نے بتایا کہ یہ کمیٹی مسلم لیگ (ن) ، پاکستان پیپلز پارٹی اور دیگرجماعتوں سے رابطہ کرے گی کیوں کہ صوبے کے قیام کےلئے آئینی ترمیم کی ضرورت ہوتی ہے۔وزیر اطلاعات نے بتایا کہ ایک کروڑ نوکریاں اور 50 لاکھ گھروں کیلئے بھی ٹاسک فورس بنادی ہے۔گھروں اور نوکریوں سے متعلق ٹاسک فورس کو 90 دن کا وقت دیا گیا ہے۔ انہوں نے بتایا کہ وزیر اعظم ہر 15 دن بعد تمام ٹاسک فورسز سے پیشرفت رپورٹ لیں گے، گورننس کے حوالے سے ریفارمز کی جائیں گی۔انہوں نے بتایا کہ وفاقی کابینہ کے اجلاس میں فاٹا کے خیبر پختونخوا کے ساتھ انضمام کے عمل کو تیز کرنے کیلئے بھی کمیٹی بنادی گئی ہے۔انہوں نے بتایا کہ فاٹا کے متعلق کمیٹی میں گورنر، وزیراعلیٰ، وزیر دفاع اور مشیر اسٹیبلشمنٹ شامل ہوں گے۔ انہوں نے کہا کہ اجلاس میں سی پیک کا ریویو کیا گیا ہے ، سی پیک کے 28 ارب کے پراجیکٹ جاری ہیںجن میں سے 22 ارب کے پراجیکٹ انرجی سے متعلق ہیں۔ انہوں نے کہا کہ تمام پراجیکٹس کےلئے ایک ایک کمیٹی بنائی گئی ہے۔ انہوں نے کہا کہ وزیراعظم کو مخدوم خسرو بختیار اس حوالے سے بریفنگ دینگے۔ انہوں نے کہا کہ کابینہ اجلاس میں خواتین کا وراثت میں حصہ یقینی بنانے کیلئے قانون میں ترامیم کا فیصلہ کیا گیا ہے اور وزیراعظم نے فیصلہ کیا ہے کہ اس حوالے سے بھرپور مہم چلائی جائیگی۔ تاکہ خواتین کو وراثت میں ان کا حصہ مل سکے۔ انہوں نے کہاکہ وفاقی کابینہ نے وفاقی حکومت کے سینئر افسران کی تبادلوں کی توثیق بھی کی ہے ۔انہوں نے کہا کہ بیرون ملک موجود پاکستان کا پیسہ وطن واپس لانے کیلئے مشیر اسٹیبلشمنٹ رپورٹ تیار کررہے ہیں۔انہوں نے کہا کہ مشیر اسٹیبلشمنٹ مختلف ممالک کے قوانین کاجائزہ لے رہے ہیں، کابینہ نے مشیر اسٹیبلشمنٹ کو دو ہفتوں میں جامع رپورٹ پیش کرنے کا حکم دیاہے۔فواد چوہدری نے کہا کہ کسی بھی کنٹریکٹ ملازم کو برطرف نہیں کیا جائے گااور نہ ہی اداروں میں پسندیدہ لوگوں کو تھوک کے حساب سے بھرتی کیا جائے گا کیونکہ یہ اداروں کو نقصان پہنچانے کے مترادف ہے، سابق حکومتوں نے ایسی ہی مثالیں قائم کی ہیں، سندھ میں ایک ادارہ کے اندر 50 ہزار لوگوں کو بھرتی کیا گیا ہے اور یہ تمام سیاسی جماعت کے ورکر ہیں وہ دفاتر میں بھی نہیں آتے اور تنخواہیں بھی وصول کرتے ہیں، موجودہ حکومت ایسی کوئی روایت قائم نہیں کرے گی بلکہ ایسے مواقع فراہم کرے گی جس سے روزگار حقیقی معنوں میں بڑھے گا۔ انہوں نے کہا کہ بیوروکریسی میں موجود ایمان دار افسروں کو ڈرنے کی کوئی ضرورت نہیں ہے مگر جو ایماندار نہیں انہیں ضرور ڈرنا چاہئے۔۔فواد چودھری نے کہا کہ بیرون ملک رکھی رقوم کی واپسی کے حوالے سے وفاقی کابینہ کا خصوصی اجلاس ہوگا۔انہوں نے کہا کہ بیرون ملک سے پاکستانی عوام کے ٹیکس کا پیسہ واپس لانے کیلئے قائم شدہ ٹاسک فورس کے سربراہ نے لندن کا دورہ کیا اور لندن کی حکومت سے بات چیت کی ہے اور وہ اس حوالہ سے ایک جامع ٹی او آر بنا کر 2 ہفتوں میں اپنی ابتدائی رپورٹ کابینہ کو پیش کریں گے۔ انہوں کہا کہ کابینہ کے اجلاس میں وزیر ریلوے شیخ رشید نے درپیش مسائل سے بھی آگاہ کیا اور بتایا کہ 12 کیسز نیب میں ہیں اس کی زد میں آدھے ریلوے افسران ہیں۔ انہوں نے کہا کہ اپوزیشن کا ایک ہی مطالبہ ہے کہ مقدمے ختم کریں ہم صلح کر لیتے ہیں لیکن اس طرح نہیں ہو گا، پی ٹی آئی عوام کے ساتھ وعدے کرکے آئی ہے، موجودہ حکومت احتساب کے معاملہ پر کوئی سمجھوتہ نہیں کرے گی۔ایک سوال کے جواب میں انہوں نے کہا کہ صدر مملکت ممنون حسین نے خود ہی اپنی تقریر میں کہا تھا کہ کرپشن کرنے والے پکڑ میں آئیں گے، ان کی یہ پیشگوئی درست ثابت ہوئی ہے۔ ایک سوال کے جواب میں انہوں نے کہا کہ وی آئی پی کلچر، سیکیورٹی اور سفر میں بہت فرق ہے، وزیراعظم عمران خان کے پاس دو آپشن تھے کہ وہ بائی روڈ بنی گالہ جائیں یا ہیلی کاپٹر استعمال کریں، اگر وہ بائی روڈ بنی گالہ جاتے ہیں تو راستے بند کرنا پڑتے ہیں اور اگر وہ ہیلی کاپٹر پر سفر کرتے ہیں تو اس کیلئے چار سے پانچ منٹ درکار ہوتے ہیں اور کسی کو کوئی مشکل بھی پیش نہیں آتی۔انہوں نے کہا کہ وزیراعظم کے ہیلی کاپٹر استعمال کرنے سے ہونےوالا خرچہ گوگل کیا تھا، آپ بھی گوگل کرکے دیکھ لیں پتہ چل جائےگا ۔ ایک سوال پر فواد چودھری نے کہا کہ ڈی پی او پاکپتن کے تبادلہ کا وزیراعظم سے کوئی تعلق نہیں ہے، وہ صوبائی حکومت کا معاملہ ہے اور وہ اس پر تحقیقات کر رہی ہے۔ ایک سوال پر انہوں نے کہا کہ صحافیوں کے مسائل سے متعلق بات چیت کیلئے میرے دروازے ہر وقت کھلے ہیں، صحافی برادری کے مسائل کا حل ہماری اولین ترجیح ہے۔ اس موقع پر مشیر ماحولیات امین اسلم نے کہا کہ خیبرپختونخوا میں کامیاب بلین ٹری سونامی کے بعد ملک بھر میں 10 ملین ٹری لگانے کا فیصلہ کیا گیا ہے، صوبوں کو اہداف کے حوالہ سے آگاہ کر دیا گیا ہے۔انہوں نے کہا کہ 2 ستمبر کو پورے پاکستان میں 15 لاکھ پودے لگائے جائیں گے اور عوام کو مفت پودے فراہم کیے جائیں گے۔انہوں نے کہاکہ اس دن پلانٹ فارپاکستان ڈے منایا جائے گا۔انہوں نے کہا کہ وزیراعظم اس مہم کا افتتاح اسلام آباد میں کریں گے اور وزرا ءاعلیٰ اپنے صوبوں میں اس مہم کو جاری رکھیں گے۔ انہوں نے کہا کہ موسمیاتی تبدیلی کے بعد پاکستان کو درختوں کی اشد ضرورت ہے اور یہ نیکی اور صدقہ جاریہ ہے، بلین ٹری منصوبہ کیلئے ملک کے بڑے شہروں میں 190 پک اپ پوائنٹ بنائے جائیں گے اور سوشل میڈیا پر بھی خصوصی تشہیر کی جائے گی۔
