ابوظہبی (آئی این پی)قومی ٹیم کے فاسٹ بولر جنید خان انجری کے سبب نیوزی لینڈ کے خلاف دونوں ایک روزہ میچز سے آﺅٹ ہوگئے ہیں۔پاکستان اور نیوزی لینڈ گزشتہ روز دوسرے ایک روزہ میچ میں مدمقابل ہوئے تاہم میچ سے قبل قومی ٹیم کے لیے بری خبر سامنے آئی ہے، فاسٹ بولر جنید خان کے پاﺅں کی انگلی میں انفیکشن ہوگیا ہے جس کی وجہ سے وہ دوسرے ایک روزہمیچ میں ایکشن میں نظر نہیں آئے جب کہ تیسرے میچ میں بھی ان کی شرکت مشکوک دکھائی دے رہی ہے۔قومی ٹیم میں جنید خان کا خلا کس بولر سے پورا کیا جائے گا، یہ فیصلہ ہونا ابھی باقی ہے تاہم ٹیم مینجمنٹ کی جانب سے ابھی تک جنید خان کے متبادل کا اعلان نہیں کیا گیا ہے۔

لاہور(سی پی پی) آئندہ ماہ پاکستان میں شیڈول 6 ملکی انٹرنیشنل ہاکی ٹورنامنٹ کی میزبانی ایک بار پھر خطرے میں پڑ گئی۔پی ایچ ایف کی طرف سے حکومت کو فنڈز کی بار بار درخواست کی گئی تاہم کوئی گرین سگنل نہیں مل سکا ہے۔ ذرائع کے مطابق چند دنوں میں فنڈز نہ ملے تو 17 سے 28 دسمبر تک ہونے والا انٹرنیشنل ٹورنامنٹ ملتوی ہونے کا امکان ہے۔ ٹورنامنٹ پہلے بھی ایک بار پھر ملتوی ہو چکا ہے ۔گزشتہ ماہ انٹرنیشنل ہاکی فیڈریشن کی طرف سے لیٹر کے ذریعے پی ایچ ایف کو باقاعدہ آگاہ کیا گیا ہےکہ 4 ٹیموں نے ایونٹ کے لئے کنفرمیشن دی ہے جب کہ مزید 2 ٹیمیں بھی پاکستان آنے کو تیار ہیں۔ ایونٹ میں پاکستان کے علاوہ اومان، قطر، بنگلہ دیش، سری لنکا، قازقستان اور افغانستان کی ٹیموں کی پاکستان آمد شیڈول ہے۔

لاہور(آئی این پی) پی سی بی کرکٹ کمیٹی کے سربراہ محسن خان نے کہا ہے کہ تقرری کے مخالف میرے بیانات کو غلط رنگ دے رہے ہیں، ملک کی خدمت کا جذبہ لے کر آیا اور چیئرمین پی سی بی احسان مانی کو جوابدہ ہوں۔کرک انفو سے بات چیت کرتے ہوئے محسن حسن خان نے کہا ہے کہ میں نے اپنے پورے کیریئر میں کبھی نظم و ضبط کی خلاف ورزی نہیں کی، تفصیلات میں نہیں جانا چاہتا اور منفی رویوں کو نظر انداز کرتے ہوئے آگے بڑھنا چاہتا ہوں۔دوسری جانب ایک نجی ٹی وی سے بات چیت کرتے ہوئے محسن خان نے کہا کہ مجھے بورڈ کے سربراہ کی طرف سے کوئی فون نہیں آیا جس میں بیان دینے سے روکا گیا ہو، چیئرمین تو خود کہہ رہے ہیں کہ کمیٹی کی مشاورت کے بعد کپتان کا اعلان ہوگا تو میرا بیان متنازع کیسے ہو گیا۔

لاہور(آئی این پی) پاکستان کرکٹ بورڈ نے سابق سربراہ نجم سیٹھی کی طرف سے بجھوائے جانے والے قانونی نوٹس کا جواب دے دیا جس میں تمام الزامات کو مسترد کردیا گیا ہے۔ پاکستان کرکٹ بورڈ کی جانب سے ایک پریس ریلیز جاری کی گئی ہے جس میں کرکٹ بورڈ کے سابق سربراہ نجم سیٹھی کے نوٹس پر ردعمل کا اظہار کرتے ہوئے موقف اختیار کیا گیا کہ سابق سربراہ نے اپنے نوٹس میں جو الزامات لگائے ہیں، وہ یکسر مسترد کرتے ہیں جب کہ اس حوالے سے تمام الزامات پر بورڈ کو قانونی کارروائی کا حق حاصل ہے۔پی سی بی کے مطابق نجم سیٹھی نے بطور سربراہ 7 کروڈ سے زائد کے اخراجات کیے جس پر سابق سربراہ نے اس کو شہرت کو نقصان پہنچانے کی کوشش قرار دیتے ہوئے پی سی بی کو لیگل نوٹس میں معافی مانگنے اور اخراجات کی تفصیلات کو ویب سائٹ سے ہٹانے کا مطالبہ کیا تھا۔واضح رہے کہ پاکستان کرکٹ بورڈ نے چندروزقبل نجم سیٹھی کے بطور چئیرمین اخراجات کی تفصیلات جاری کی تھیں جس کے مطابق 2014 سے لے کر 2018 تک نجم سیٹھی نے بطور چیئرمین اور بطور چیئرمین ایگزیکٹو کمیٹی 7 کروڑ روپے اپنی ذات پر خرچ کئے جب کہ بطور چیئرمین نجم سیٹھی نے ہوٹل کے کرایوں کی مد میں 27 لاکھ روپے خرچ کئے۔سابق چیئرمین پی سی بی نے ڈیلی الانس کی مد میں 81 لاکھ روپے خرچ کئے، گاڑی کے پیٹرول کی مد میں 9 لاکھ روپے اڑائے گئے اور پی ایس ایل الاونسز کی مد میں ڈیڑھ کروڑ روپے وصول کئے گئے۔واضح رہے سابق چیئرمین پی سی بی شہریارخان پر ایک کروڑ 94 لاکھ روپے خرچ ہوئے، جس میں 80 لاکھ روپے کا میڈیکل بل شامل ہے۔

دبئی(سی پی پی) رمیز راجہ نے کہاہے کہ پاکستانی بیٹسمین شارٹ بال کھیلنے کی صلاحیت نہیں رکھتے لہذا جنوبی افریقا میں ٹاپ آرڈر کو مشکلات پیش آئیں گی۔سابق ٹیسٹ کرکٹر رمیز راجہ کا کہنا ہے کہ پاکستانی بیٹسمین اور کوچنگ اسٹاف یہ سمجھ ہی نہیں پارہے کہ بیٹنگ میں ناکامیوں کی بڑی وجہ شارٹ بال کھیلنے میں کمزوری ہے، صلاحیت اور تکنیک دونوں ہی نظر نہیں آتے، پوری ٹیم میں کوئی ایک بھی بیٹسمین ایسا نہیں جو اچھا ہک اور پل شاٹ کھیل سکے یا پھر کم از کم ایسی گیندوں کو چھوڑ ہی سکے، اگر ان مسائل پر فوری توجہ نہ دی گئی تو پاکستان کی ٹاپ آرڈر دورہ جنوبی افریقا میں بھی ایسی ہی صورتحال سے دوچارہ ہوگی۔رمیز راجہ نے کہا کہ ون ڈے کرکٹ میں درست شاٹ سلیکشن کے ساتھ رن ریٹ برقرار رکھنا انتہائی ضروری ہے، ڈاٹ بال ہمیشہ ہی ٹیم کی پریشانی میں اضافہ کرتے ہیں، اس ضمن میں کوچنگ اسٹاف اور کھلاڑیوں دونوں کو کام کرنا ہوگا۔