تاندلیانوالہ (نمائندہ خبرےں) چچا کی پسند کی شادی کی سزا معصوم کم سن بھتیجی کو دے دی گئی۔ تفصیلات کے مطابق تھانہ ماموں کانجن کے علاقہ چک نمبر546گ ب کے رہائشی اکبر علی نے ایک سال قبل مسماة نادیہ شاہین سے پسند کی شادی کی تھی جس کا لڑکی کے ورثاءکو شدید رنج تھا، اسی رنج کی بناءپر لڑکی کے ورثاءنے زبردستی اسلحہ کے زور پر اکبر علی کی نابالغ 11سالہ معصوم بھتیجی ارشاد بی بی جو کہ تیسری کلاس کی طالبہ تھی کو زبردستی پکڑ لیا اور شکیل نامی شخص کے ساتھ نکاح کردیا۔ بچی کے والد محمد اشرف نے مےڈےا سے بات کرتے ہوئے بتایا کہ کسی نے بھی اس کی چیخ و پکار نہ سنی ہے حتیٰ کہ پولیس نے بھی داد رسی سے انکار کردیا ہے، ملزمان میری نابالغ بیٹی سے نکاح کر کے زبردستی اپنے ساتھ لے جانا چاہتے ہیں۔ اعلیٰ پولیس حکام سے اپیل ہے کہ نوٹس لیا جائے اور ملزمان کے خلاف کاروائی کی جائے۔

ابوظہبی، دبئی (مانیٹرنگ ڈیسک، نیوز ایجنسیاں) وزیراعظم عمران خان اور آرمی چیف جنرل قمر جاوید باجوہ وفد کے ہمراہ ایک روزہ سرکاری دورے پر متحدہ عرب امارات پہنچ گئے،ولی عہد شیخ محمد زید بن سلطان النہیان نے شاہی محل پہنچنے پر وزیراعظم عمران خان کا استقبال کیا۔تفصیلات کے مطابق وزیراعظم عمران خان ایک روزہ سرکاری دورے پر متحدہ عرب امارات پہنچ گئے، وزیراعظم کے ہمراہ آرمی چیف جنرل قمرجاوید باجوہ ، وزیرخزانہ ، وزیر پٹرولیم، وزیر پاور ڈویژن اور مشیر تجارت بھی ہیں۔متحدہ عرب امارات میں پہلے سے موجود وزیرخارجہ شاہ محمود قریشی بھی وزیراعظم عمران خان کے ہمراہ ہیں۔ولی عہد شیخ محمد زید بن سلطان النہیان نے شاہی محل پہنچنے پر وزیراعظم عمران خان کا استقبال کیا، یو اے ای مسلح افواج کے ڈپٹی سپریم کمانڈربھی استقبال کے لیے موجود تھے۔ وزیراعظم کو گارڈ آف آنر پیش کیا گیا۔صدارتی محل میں ہونے والی ملاقات کے دوران وزیراعظم کے ہمراہ وزیر خزانہ اسد عمر، وزیر پیٹرولیم غلام سرور، توانائی کے وزیر اور مشیر تجارت سمیت سربراہ پاک فوج جنرل قمر جاوید باجوہ اور دیگر بھی شریک تھے۔ دونوں رہنماﺅں کے درمیان دو طرفہ تعلقات، علاقائی اور بین الاقوامی دلچسپی کے امور پر تبادلہ خیال کیا گیا۔ وزیراعظم عمران خان کا ابوظہبی کے صدارتی محل میں آمد پر پرتپاک خیر مقدم کیا گیا۔ وزیراعظم اس سے قبل ایک روزہ دورہ پر ابوظہبی پہنچے تو متحدہ عرب امارات کے ولی عہد اور مسلح افواج کے ڈپٹی سپریم کمانڈر شیخ محمد بن زائد بن سلطان النیہان نے ان کا استقبال کیا۔ وزیراعظم کے اعزاز میں باضابطہ استقبالیہ تقریب منعقد ہوئی جہاں انہیں گارڈ آف آنر دیا گیا۔ اس موقع پر دونوں ممالک کے قومی ترانے بجائے گئے۔ بعد ازاں دونوں رہنماﺅں نے اپنے اپنے وفود کا تعارف کرایا۔ وزیر اعظم عمران خان نائب صدر اور وزیر اعظم متحدہ عرب امارات شیخ محمد بن راشد المکتوم سے بھی اہم ملاقات کریں گے۔ولی عہد شیخ محمد بن زید سے ملاقات کے دوران دوطرفہ تعلقات، علاقائی اور عالمی امور پر بات چیت ہوگی۔ نجی ٹیو ی کے مطابق وزیراعظم عمران خان نے یو اے ای کے وزیراعظم سے ملاقات کی۔ ملاقات میں پاکستان اور عرب امارات کے باہمی تعلقات پر تبادلہ خیال کیا گیا۔ وزیراعظم کی ملاقات کے بعد دونوں ملکوں کے وفود کی سطح پر مذاکرات شروع ہوگئے۔ وفاقی وزراءپر مشتمل وفد اور عسکری قیادت بھی مذاکرات میں شامل ہوئی وزیراعظم کے دورہ یو اے ای مکمل ہونے کے بعد جاری اعلامیہ میں کہا گیا کہ دونوں ممالک میں تجارت، سرمایہ کاری کے درمیان حائل رکاوٹوں کو ختم کرنے کا فیصلہ، یو اے ای وفد کے حالیہ دورہ پاکستان کے نتائج پر بھی اطمینان کا اظہار کیا گیا۔ دونوں ممالک کے درمیان دوطرفہ تعلقات کو اقتصادی پارٹنر شپ میں بدلنے پر اتفاق ہوا۔ وزیراعظم او ریو اے ای ولی عہد میں دوطرفہ علاقائی اور عالمی امور پر بات چیر ہوئی۔ دونوں ملکوں کی قیادت نے دوطرفہ تعلقات پر اطمینان کا اظہار کیا دونوں ممالک میں تاریخی تعلقات کیلئے فوری اقدامات شروع کرنے کافیصلہ ہوا۔ وزیراعظم کا دورہ یو اے ای۔دورے کے دوران دونوں ممالک کے درمیان تجارت،توانائی،زراعت ،انفراسٹرکچر مشترکہ وزرائے خارجہ کمیشن میں تعاون پر اتفاق کیا گیا۔اعلامیے کے مطابق وزرائے خارجہ کمیشن کا اجلاس فروری2019میں دبئی میں ہو گا۔پاکستان اور یو اے ای کے وزرائے خارجہ کمیشن کی مشترکہ صدارت کریں گے جبکہ دونوں ملکوں کے درمیان معاہدوں کو فوری مکمل کرنے کا فیصلہ کیا گیا ہے۔پاکستان و متحدہ عرب امارات کا دو طرفہ عسکری تعاون سمیت دفاعی پیدوار اور فوجی مشقیں بڑھانے پر بھی اتفاق کیا گیا۔اس موقع پر یو اے ای کے ولی عہد نے دہشتگردی کے خلاف جنگ میں پاکستان کی قربانیوں کا بھی اعتراف کیا۔ولی عہد نے کہا دہشت گردی کے خلاف پاکستان نے بے پناہ قربانیاں دیں۔اعلامیے میں دہشت گردی کوجڑ سے اکھاڑنے کے اقدامات پر بھی بات کی گئی۔وائٹ کالر کرائم پر قابو پانے کا معاہدہ بھی کیا گیا جبکہ ڈرگ انسانی سمگلنگ منی لانڈرنگ کی روک تھام کے لئے اقدامات پر بھی اتفاق ہوا۔ یو اے ای بانی کو شاندار الفاظ میں خراج عقیدت پیش کرتے ہوئے وزیراعظم عمران خان نے کہا کہ شیخ زید بن سلطان النیہان پاکستان کے سچے دوست تھے۔ وزیراعظم نے اداروں کے فروغ، اقتصادی ترقی میںیو اے ای کی کامیابیوں کو سراہا۔ سیاست کے فروغ، گورننس ٹیکنالوجی کے استعمال کو سراہا۔ ولی عہد نے کہا کہ انسداد دہشتگردی کیلئے پاکستان کی قربانیاں اور کاوشیں قابل تعریف ہیں عمران خان نے یو اے ای قیادت کو اپنی حکمت عملی کے اصلاحاتی ایجنڈے سے آگاہ کیا اور کہا کہ پاکستان ایکسپو 2020میں بھرپور شرکت کرے گا۔ حکومتی سطح پر کرپشن اور بدعنوانی کے خاتمے کیلئے اقدامات کررہے ہیں۔

لاہور (رپورٹنگ ٹیم) چیف ایڈیٹر خبریں ضیا شاہد نے اپنی 12کتابوں کے حوالے سے ایک خصوصی نشست سے خطاب کرتے ہوئے کہا ایک زمانے میں سمجھا جاتا تھا کہ پیسے والے اخبار نہیں نکال سکتے۔ مجھے اتفاق سے ایک موقع مل گیا یہ اخبار روزنامہ پاکستان نکالنے سے پہلے ہے پتہ چل گیا تھا کہ یہ اخبار نکلے گا۔ کامیاب ہوگا اور اس اخبار کی اشاعت ایک لاکھ سے اوپر جائے گی لیکن مجھے یہ بھی اندازہ ہوگیا تھا میں اس ادارے میں نہیں رہوں گا اور پھرا یسا ہی ہوا۔ لیکن اس کے باوجود میں نے بیڑا اٹھایا۔ اپنی کتابوں کے حوالے سے بات کرتے ہوئے ضیا شاہد نے کہا کہ بڑے افسوس کی بات ہے کہ آج تک کسی نے قائداعظم ؒ پر کوئی مکمل تفصیلی اور ضخیم کتاب نہیں لکھی۔ کاش کوئی ایک کتاب بھی لکھ دیتا جس کی مثال دی جاسکتی۔ میں نے ”جناح“ فلم پر ایک کیس کیا اور اس کی پیروی بھی کی مجھے اس فلم کے 6سینوں پر اعتراض تھا۔ جج صاحب نے مجھ سے استفسار کیا کہ کبھی کوئی ججوں سے بھی لڑتا ہے۔ لیکن میں بضد تھا کہ مجھے اپنی قوم کے قائد کی زندگی پر مبنی فلم کے بعض سینوں پر اعتراض ہے اور یہ اعتراض بالکل درست ہے۔ انہوں نے کہا کہ نظریہ پاکستان ٹرسٹ کو اتنی جگہ ملی ہوئی ہے یہاں کوئی تعمیری کام نہیں ہوا نہ کبھی قائداعظم محمد علی جناحؒ پر ایک کتاب تک نہیں لکھی گئی۔اس بات کا ذکر کرتے ہوئے ضیا شاہد آبدیدہ ہو گئے۔ انہوں نے کہا کہ ضرورت اس امر کی ہے کہ نظریہ پاکستان ٹرسٹ فاﺅنڈیشن قائد اور ان کے معاونین کی زندگی اور اعلیٰ خدمات کو شایان شان طریقے سے سامنے لائے۔ انہوں نے کہا کہ یہاں جو تقریبات ہوتی ہیں اس میں چند بابے تقریریں کرتے ہیں اور بچے بیٹھے انتظار کرتے رہے کہ کب تقریریں ختم ہوں اور ہم مزے مزے کی پیسٹریاں کھائیں اور گھر جائیں۔ انہوں نے کہا کہ میری خواہش ہے کہ قائد کی زندگی اور جدوجہد پر مبنی ایک کتاب تو ہو جو 8سے 10جلدوں پر مشتمل ہو۔ انہوں نے کہا وہ لوگ خوش قسمت تھے جو قائداعظم ؒ کے دور میں ان سے مستفید ہوتے رہے۔ فرانسس ایس لوبو کو اردو نہیں پڑھنی آتی تھی۔ چنانچہ کے ایچ خورشید سے قائداعظم ؒ نے سفارش کی کہ میرے ساتھ چلو پاکستان بننے کے بعد لنکن میں تعلیم دلواﺅں گا۔ چنانچہ 4سال کے لیے کے ایچ خورشید ان کے ساتھ رہے۔ دوسری طرف نور محمد بھٹو صاحب کا ذاتی خدمت گزار تھا صرف قصور میں ہی کتنے مربع زمین ملی۔ بھٹو صاحب نے اسے بھرپور طریقے سے نوازا لیکن قائداعظم ؒ کے سیکرٹری کے ایچ خورشید نے کوئی جائیداد نہیں بنائی۔ چند سو روپے کے کرائے کے گھر میں رہے آزادکشمیر سے لاہور سفر کرتے ہوئے ویگن میں حرکت قلب بند ہونے کی وجہ سے انتقال ہوا تو ان کی جیب سے نکلنے والے کاغذات سے پتہ چلا کہ قائداعظم ؒ کے سیکرٹری ویگن میں سفر کررہے تھے۔ رعنالیاقت علی خان کا ذکر کرتے ہوئے انہوں نے کہا کہ محترمہ نے ہالینڈ کی ملکہ سے شرط میں جیتا ہوا محل پاکستان کے نام کروادیا جہاں پاکستانی سفارت خانہ بنا میں معذرت چاہتا ہوں کہ ہم نے بہت بہت بڑے بندوں کے بارے میں کچھ نہیں لکھا۔ مجھے افراد سے نہیں ملک سے مطلب ہے ہر فرد کی اتنی ہی ذمہ داری ہے جتنی میں سمجھتا ہوں میں اکیلا کوئی ٹھیکیدار نہیں سب کا فرض بنتا ہے کہ حقائق سب کے سامنے لائے جائیں۔ میں سب سے درخواست و منت کرتا ہوں کہ آئیڈیلز کو سامنے لائیں تاکہ ملک مضبوط ہو‘ تب ہی سنبھلے گا ورنہ بدمعاش‘ لچے بہروپئے اسے برباد کردیں گے۔ ہم راکھ کے ڈھیر پر بیٹھے ہوئے ہیں اس سے پہلے کہ بہت دیر ہوجائے ہمیں سنبھلنا ہوگا۔ میں نے 2 تین سال میں جو تصانیف لکھی ہیں وہ روانی اور اپنی تحریروں اور تجربے کی بنا پر لکھی ہیں۔ بھارتی آبی دہشتگردی کی وجہ سے پن بجلی ہاﺅس ہولڈ‘ انوائرمنٹ سبزہ گھاس کا پانی اور سب سے ضروری آبی حیات کے لئے پانی چونکہ میرا تعلق بھی اسی علاقہ سے ہے جہاں جگہ جگہ ستلج کے کنارے مچھلی پکڑنے والے مچھیرے ستلج خشک ہونے کی وجہ سے 1964ءسے مقیم 72 ہزار لوگ اجڑ گئے جو اپر ستلج میں تھے اور ایک لاکھ سے اوپر لوگ بے کار ہوگئے تھے۔ اس زمانے میں پونے دو لاکھ کے قریب لوگوں کا بے گھر اور بے کار ہوجانا ایک بہت بڑی بات تھی۔ میری کتاب قلم چہرے نے بھولے ہوئے چہروں کو سامنے لاکر ماضی کی یادیں تازہ کردیں جو چہرے قلم چہرے میں تحریر ہیں وہ ایسی اہمیت کے حامل ہیں جن پر خود ایک ایک کتاب لکھی جاسکتی ہے۔ جب کبھی پاکستان کی تاریخ میں جب بھی دیکھیں اس میں جو درج ہے وہ کوئی بدل نہیں سکتا۔ نوازشریف کی مثال سب کے سامنے ہے کہ کیسے مارشل لا کی گود میں پلنے والا نوازشریف کیسے 35 سال ملک کا مضبوط اور پسندیدہ لیڈر رہا اور پھر انڈین لابی پالنے کی پاداش میں فوج مخالف تقاریر سب نے دیکھا کہ کیسے احتساب اور اقتدار میں فرق ختم ہوگیا۔ جو حقائق تاریخ میں ملتے ہیں بدقسمتی سے کتابوں میں نہیں ملتے۔ میری چند کتابیں تاریخ میں ہوئے واقعات کی عکاس ہیں۔

لاہور (رپورٹنگ ٹیم)کہنہ مشق صحافی، معروف کالم نگار و تجزیہ کار چیف ایڈیٹر خبریں ضیا شاہد کی گزشتہ 3,2 برس میں تصنیف کی گئیں 12 کتابوں کے حوالے سے گزشتہ روز آواری ہوٹل میں ایک فکری نشست کا اہتمام کیا گیا۔ اس تقریب میں نامور صحافی کالم نگار، دانشور اور شعبہ تدریس سے تعلق رکھنے والی شخصیات نے شرکت کی۔ شرکاءنے ضیا شاہد کی لکھی گئی کتابوں کے مطالعے کے بعد جو تاثرات تھے وہ مختصر انداز میں پیش کئے اور خراج تحسین پیش کرتے ہوئے کہا سیاست، صحافت ادب کے طالب علم رہنمائی حاصل کرنے کے لئے ضیا شاہد کی کتابوں کا مطالعہ کریں۔ معروف کالم نگار، دانشور حافظ شفیق الرحمن نے کہا کہ ضیا شاہد جمعہ بخیر کے نام سے جو کالم لکھتے تھے وہ میرے پسندیدہ کالم تھے۔ ضیا شاہد نے بے پناہ مصروفیات کے باوجود ادب، تاریخ اور صحافت کو یکجا کر کے کتابی شکل میں عوام کے سامنے رکھا۔ تمام کتب ہمیں بتاتی ہیں کہ ضیا شاہد کتب کا قطب الدین ایبک ہیں۔میرا دوست نواز شریف ہو یا قلم چہرے، کسی کا کوئی ثانی نہیں، ضیا شاہد ایک چشم دید عینی شاہد کی طرح اپنی تحرےر میں مناظر کی عکاسی کرتے ہیں۔ تاریخ اپنے اوراق اپنی قلم کی نوک سے سرکتی نظر آتی ہے۔ پاکستان کی سیاسی شخٰصیات، صحافی، سیاست، قلم کاروں، دانشوروں اور فنکاروں سے ملاقات کرواتی نظر آتی ہیں۔ ضیا شاہد کی شخصیت ایک تحفہ ہے انہوں نے ایک عام صحافی کی حیثیت سے ایک میڈیا ہاﺅس کا مالک بننے میں شب وروز محنت کی ہے۔ انہوں نے ہمیشہ نقصان اٹھاتے ہوئے اقتدار پر براجمان سیاستدانوں کے نقائص عوام کے سامنے رکھے۔ نڈر اور بے باک صحافت میں ضیا شاہد کا کوئی ثانی نہیں، علم کتابوں اور رجسٹروں میںقید نہیں ہو سکتا ابھی ضیاشاہد کی مزید 8سے 10تصانیف زیر طبع ہیں۔ نواز شریف کو جتنا ضیا شاہد جانتے ہیں ”ن“ لیگ کے ورکر اور پروانے بھی نہیں جانتے۔ کالم نگار فاروق چوہان نے کہا کہ میں یہ سمجھتا ہوں کہ مجید نظامی کے بعد دو قومی نظریہ پر کوئی اٹل ہے تو جناب ضیا شاہد ہیں۔ ضےا شاہد نسےم حجازی کے متبادل ہیں اور اسی معےار کا لکھتے ہےں ۔ اس جدےد اور گلوبل نےٹ ورکنگ کے دور میں بھی ضےا شاہد کے لکھنے کا میڈیم اور معےار اعلیٰ اور تصانیف کسی تحفہ سے کم نہیں ۔ ضےا شاہد کی کتاب راوی ستلج بھارتی آبی دہشتگردی کی عکاسی کرتی ہے۔ ضےا شاہد نے پاکستان اسلام اور دو قومی نظرےہ پر تحرےر لکھ کر قوم کو ےہ پیغام دےا ہے کہ اپنے عزائم اور رواےات کو ہر قیمت پر مضبوط ارادے سے لے کر آگے چلنا ہے۔ عالمی سیاح، ادیب، کالم نگار محسن چغتائی نے کہا کہ صحافت کی دنیا میں ضیا شاہد کا بہت بڑا نام ہے۔مختلف موضوعات پر لکھنے والی 12کتابوں پر انہیں مبارک باد پےش کرتا ہوں۔ ان کی تحرےروں میں ہمیشہ اسلامی تعلیمات کی بات کی ہے۔ جہاں ظلم ہوتا ہے وہاں خبرےں موجود ہوتا ہے۔ عام طور پر ان کے اخبار میں ان لوگوں کو اہمیت دی جاتی جن کے ساتھ ظلم ہو رہا ہو۔ پنجاب کی عوام نے پنجابی پر کام نہیں کیا اس حوالے سے انہوں نے قومی زبان کے ساتھ ساتھ مادری زبان میں اخبار نکال کر اس کو عملی جامہ بنایا۔ محب وطن شہری کے حوالے سے ضیا شاہد کی عظیم خدمات ہیں۔ اس موقع پر میں وزیر اعظم پاکستان، وزیراعلی پنجاب اور ارباب اختیار سے مطالبہ کرتا ہوں کہ ضیا شاہد کو حسن کارکردگی اےوارڈ سے نوازاجائے۔ کالم نگار، دانشور فاروق عزمی نے کہا کہ ضیا شاہد کی تقریباً سب تصانیف میں نے پڑھی ہیں آج کی نئی نسل بے شمار وقت ضائع کر رہی ہے، ضیا شاہد نے ہمیشہ سے بہت زیادہ کام کیا ہے، ضیا شاہد نے پانی کے مسئلے پر سب سے پہلے کتاب راوی ستلج اور بیاس لکھی اور اس کے علاوہ ضیاشاہد نے ہر فورم پر پانی کے مسئلہ پر آواز اٹھائی، پانی کے مسئلے پر ضیا شاہد نے مختلف پروگرام کیے ہیںجس کی وجہ سے آج پورے پاکستان میں پانی کے مسئلے کی بازگشت سنائی دے رہی ہے۔ معروف بینکار حسن طارق نے کہا کہ درےاﺅں کے گرد تہذیبیں بستی ہیں لےکن بدقسمتی سے سوکھتی جا رہی ہےں ہمارے ملک میں افسوسناک المےہ ےہ ہے کہ ہماری مسلسل خاموشی کے دوران بھارت نے دھڑا دھڑ ڈےم بنائے، خدا جانتا ہے کہ ہمارے ملک کے حالات کب بہتر ہوں گے۔کالم نگار زاہدسعید نے کہا کہ ضیا شاہد صحافت میں ایک بہت بڑا نام ہے۔ 90کی دہائی کے بعد جدید صحافت میں تبدیلیوں کا کریڈٹ ضیا شاہد کو جاتا ہے۔ صحافت کے بے شمار نام ضیا شاہد نے متعارف کروائے، ہم ضیا شاہد کو پڑھتے ہیں۔ اور اپنے طلبا کو ضیا شاہد کا حوالہ دےتے ہیں۔ دانشور پروفیسر خرم رانا نے کہا ہے کہ ضیا شاہد ہمارے رول ماڈل ہیں جب میں جوان تھا تو ان سے ملنا ایک خواب لگتا ہے لےکن آج ان کو سامنے دیکھ کر میری زند گی کو خواب پورا ہو گیا ہے۔ صحافت میں ان کے لگائے ہوئے پودے ملکی خدمت کر رہے ہیں۔ ےہ روشنی ان سے شروع ہوئی اور دنیا بھر میں پھیل گئی ہے۔ کالم نگار، دانشور میاںمعظم علی نے کہا کہ ضیا شاہد کی کتاب تحریری دستاویزات ہی مکمل شہادت ہے۔ اور سندھ طاس کیس جیتنے کیلئے کافی ہے۔ مگر افسوس کی کی بات ہے کہ ہمارے حکمران آپس کی لڑائی میں مصروف ہیں، ضیا شاہد نے قوم کے لئے رٹ دائر کی، چیف جسٹس اور حکمرانوں تک غریب عوام کی آواز پہنچانے کا ذریعہ ضیا شاہد ہیں۔کالم نگار ثوبیہ خان نیازی نے کہا ضیا شاہد کی تمام کتابوں کا مطالعہ کیا ہے۔ میرا پہلا کالم بھی ان کی لکھی گئی کتاب امی جان پر ہی تھا۔ ملک پانی کے مسئلے اور بحران کا شکار ہے۔ جس کے بارے میں ضیا شاہد نے سب سے پہلے اپنی آواز بلند کی ان کو میں سلام پیش کرتی ہوں۔