میلبورن(سی پی پی) کرکٹ آسٹریلیا رواں ہفتے سٹیون سمتھ، ڈیوڈ وارنر اور کیمرون بینکرافٹ کی سزاﺅں میں کمی کے حوالے سے حتمی فیصلہ کرے گا۔ کرکٹ آسٹریلیا نے رواں برس دورہ جنوبی افریقہ کے دوران بال ٹیمپرنگ اسکینڈل میں ملوث ہونے پر تینوں کرکٹرز پر پابندی عائد کر رکھی ہے، سمتھ اور وارنر کو ایک، ایک برس بینکرافٹ کو 9 ماہ کی معطلی کا سامنا ہے، بینکرافٹ کی معطلی کی سزا 29 دسمبر کو ختم ہونی ہے جبکہ سمتھ اور وارنر کی پابندی 29 مارچ 2019 کو ختم ہو گی۔تفصیلات کے مطابق آسٹریلین کرکٹ ایسوسی ایشن نے کرکٹ آسٹریلیا سے سمتھ، وارنر اور بینکرافٹ کی سزاﺅں میں نظر ثانی کی اپیل کی تھی جس پر کرکٹ آسٹریلیا نے کہا کہ وہ رواں ہفتے اجلاس کے دوران کھلاڑیوں کی قسمت کے بارے حتمی فیصلہ کرے گا۔
