قاہرہ(ویب ڈیسک) مصر میں سیاحوں کو لے جانے والی بس پر ریموٹ کنٹرول ڈیوائس سے بم حملہ کیا گیا جس کے نتیجے میں 3 غیر ملکی سیاح اور ایک مقامی گائیڈ ہلاک ہوگیا۔ بین الاقوامی خبر رساں ادارے کے مطابق مصر کے علاقے گیزا کے نزدیک سیاحوں کی لے جانے والی بس کو سڑک کنارے نصب شدہ بم سے نشانہ بنایا گیا جس کے نتیجے میں ویت نام کے 3 سیاح اور 1 مصری گائیڈ ہلاک ہوگئے۔پراسیکیوٹر جنرل نبیل صادق نے بم دھماکے کی تصدیق کرتے ہوئے میڈیا کو بتایا کہ حادثے میں 11 افراد زخمی ہیں جن میں 10 ویت نامی سیاح اور ایک مصری بس ڈرائیور شامل ہیں۔پولیس کا کہنا ہے کہ بم کو سڑک کے نزدیک ایک دیوار میں چھپایا گیا تھا اور جیسے ہی سیاحوں سے بھری بس گزری بم کو دھماکے سے اُڑادیا گیا۔ دہشت گردوں کو بے نقاب کرکے جلد قانون کے کٹہرے میں لایا جائے گا۔واضح رہے کہ قدیم تہذیب کے مرکز مصر میں غیر ملکی سیاحوں کی بڑی تعداد رخ کرتی ہے جس سے حکومت کو کثیر زرمبادلہ ملتا ہے تاہم کچھ عرصے سے دہشت گردی کی وارداتوں کے باعث اس صنعت کو مشکل کا سامنا ہے۔
