لاہور(ویب ڈیسک)جنوبی افریقا کے دورے پر موجود قومی ٹیم کے فاسٹ بولر محمد عباس اور اسپنر شاداب خان مکمل فٹ نہ ہو سکے۔ذرائع کے مطابق محمد عباس اور شاداب خان کے ری ہیب کے عمل کے دوران کوئی بہتری نہیں آئی جس کے باعث محمد عباس باکسنگ ڈے ٹیسٹ میچ نہیں کھیل سکیں گے۔ذرائع کا کہنا ہے کہ محمد عباس کندھے اور شاداب خان گروئن انجری کا شکار ہیں اور دونوں کھلاڑی تین روزہ پریکٹس میچ میں بھی ایکشن میں نہیں تھے۔ذرائع کے مطابق شاداب خان کے بھی مکمل فٹ ہونے میں ابھی وقت درکار ہے۔ یاد رہے کہ پاکستان اور جنوبی افریقا کے درمیان تین ٹیسٹ پر مشتمل سیریز کا پہلا میچ 26 دسمبر سے سینچوریں میں شروع ہوگا۔

قاہرہ (اے پی پی) آئی بی ایس ایف سکس ریڈ سنوکر چیمپئن شپ میں پاکستان کا سفر تمام ہو گیا، محمد ماجد علی سیمی فائنل میں شکست کے بعد ٹائٹل کی دوڑ سے باہر ہو گئے۔ مصر میں جاری میگا چیمپئن شپ میں ہفتہ کو کھیلے گئے سیمی فائنل میں تھائی لینڈ کے کیوئسٹ تھناوت تیراپونگ پیبون نے عمدہ کارکردگی کا مظاہرہ کرتے ہوئے پاکستان کے محمد ماجد علی کو بیسٹ آف نائن فریمزa میں با آسانی ایک کے مقابلے میں پانچ فریمز سے ہرا کر فائنل کیلئے کوالیفائی کیا، تھائی کیوئسٹ نے ماجد علی کو ابتدائی دونوں فریمز میں 25-2 اور 58-10 سے ہرا کر 2-0 کی برتری حاصل کی، ماجد علی نے تیسرا فریم 69-0 سے جیت کر مقابلہ 2-1 کر دیا لیکن اس کے بعد تھائی کیوئسٹ مکمل طور پر چھایا رہا اور اس نے اگلے تینوں فریمز 54-4، 60-0 اور 54-8 سے جیت کر میچ میں مجموعی طور پر 5-1 سے کامیابی حاصل کر کے فائنل کیلئے کوالیفائی کیا۔ ماجد علی نے کوارٹر فائنل میں بحرین کے کیوئسٹ کو 5-1 فریمز سے ہرا کر سیمی فائنل تک رسائی حاصل کی تھی، ماجد علی کی شکست کے ساتھ ہی پاکستان کا میگا ایونٹ میں سفر ختم ہو گیا، اس سے قبل پاکستانی کیوئسٹ محمد بلال لاسٹ 32 راﺅنڈ میں شکست کے بعد ایونٹ سے باہر ہو گئے تھے۔

لاہور(سپورٹس رپورٹر ) ایشین ہاکی فیڈریشن کے چیف ایگزیکٹو آفیسر طیب اکرام نے پاکستان میں مزید انٹرنیشنل ایونٹ کے انعقاد کا عندیہ دیا ہے۔ لاہور میں میڈیا سے بات کرتے ہوئے طیب اکرام نے کہا کہ ہاکی سیریز اوپن کے کامیاب انعقاد سے دنیا کو یہ پیغام گیا ہے کہ پاکستان اب کھیلوں کے لیے ایک محفوظ ملک ہے، 14 برس بعد انٹرنیشنل ہاکی کی سرگرمیاں بحال ہونے پر بہت خوش ہوں، پاکستان ہاکی فیڈریشن نے اس ایونٹ کو کامیاب کرنے کے لیے جو کوششیں کیں وہ بھی لائق تحسین ہیں۔ مشکلات اور مسائل کے باوجود پی ایچ ایف نے اس ایونٹ کی میزبانی کی درخواست کی جس کو ایشین ہاکی اور انٹرنیشنل ہاکی فیڈریشن نے خوش آئند قرار دیا۔طیب اکرام کا کہنا تھا کہ دنیائے ہاکی میں پاکستان کا ایک اہم مقام ہے اور ہاکی سیریز اوپن سے یہ ثابت ہوا ہے کہ پاکستان اب بڑے ایونٹ کو بھی کرانے کے لیے تیار ہے۔ پاکستان میں سیکیورٹی حالات کے حوالے سے جو ایک غیر یقینی کی فضا بن چکی ہے، اس تاثر کو زائل کرنے اور ہاکی کی ٹاپ نیشن کا اعتماد پانے میں مدد مدد ملے گی۔پاکستان ہاکی ٹیم کی پرفارمنس کے حوالے سے طیب اکرام نے کہا کہ اس کا ایک سادہ اور بہترین فارمولہ ہے کہ آپ جتنا انویسٹ کریں گے، اتنا ہی پھل پائیں گے، آرام سے بیٹھ کر معجزوں کا انتظار نہ کریں، معجزے نہیں ہوں گے اور نہ ہی ہوتے ہیں۔ پاکستانی ٹیموں نے دنیائے ہاکی میں اپنی برتری ثابت کی، ایک نام کمایا، وہ ہیروز اب بھی موجود ہیں، ان سے رہنمائی لیں، درست سمت میں سخت محنت کرنے کی ضرورت ہے، جس حساب سے محنت کریں گے، اسی کےمطابق نتائج بھی ملیں گے۔

لاہور (آ ئی این پی) قومی کرکٹر احمد شہزاد پر ممنوعہ ادویات کے استعمال کے باعث 4 ماہ کے لیے عائد کی گئی پابندی ختم ہوگئی۔تفصیلات کے مطابق احمد شہزاد کا جولائی میں پاکستان کپ کے دوران ڈوپ ٹیسٹ مثبت آیا تھا جس کے بعد بورڈ کی جانب سے ان پر 4 ماہ کی پابندی عائد کی گئی تھی۔دوران پابندی احمد شہزاد پر کلب کرکٹ کے میچز کھیلنے پر پابندی میں 6 ہفتے کا اضافہ کر دیا گیا تھا اور کوڈ اف کنڈکٹ کی خلاف ورزی کے باعث احمد پر عائد 10 نومبر کی پابندی 22 دسمبر تک بڑھائی گئی تھی۔پابندی کے باعث احمد شہزاد قائد اعظم ٹرافی میں شرکت نہیں کرسکے تھے۔واضح رہے کہ پی سی بی کے مطابق احمد شہزاد کے ڈوپ سیمپل میں حشیش کی مقدار پائی گئی تھی جس پر پی سی بی اینٹی ڈوپنگ قوانین کی خلاف ورزی کے تحت ان پر پابندی عائد کی گئی تھی ، ٹیسٹ کرکٹر پر عائد پابندی کا اطلاق 10 جولائی سے ہوا تھا۔