اسلام آباد لندن (آئی این پی‘ مانیٹرنگ ڈیسک) چین نے پاکستان کے گرتے ہوئے زر مبادلہ کے ذخائر کو مستحکم رکھنے کےلئے 2ارب ڈالر دینے کا فیصلہ کرلیا،رقم روپے کی گرتی ہوئی قدراور پاکستان کی معاشی حالت کو بہتر بنانے میں مدد فراہم کرے گی۔ منگل کو برطانیہ جریدے ”فنانشل ٹائمز“ کی رپورٹ میں کہا گیا ہے کہ چین نے پاکستان کو دو ارب ڈالر دینے کا فیصلہ کیا ہے جو کہ غیر ملکی زر مبادلہ کے گرتے ذخائر کو روکنے اور روپے کی قدر کو بہتر بنانے میں مدد ملے گی، چین نے ایسے وقت میں پاکستان کو یہ رقم دینے کا فیصلہ کیا ہے جب وزیراعظم عمران خان کی قیادت میں قائم ہونے والی نئی حکومت کمزور معیشت کو بہتر بنانے کےلئے جدوجہد کر رہی ہے، پاکستانی حکومت کے ایک اعلیٰ عہدیدار نے اخبار سے بات کرتے ہوئے بتایا کہ چین کی جانب سے رقم دینے کا فیصلہ اس بات کی علامت ہے کہ چین دوست ملک پاکستان کو کسی بھی قسم کے معاشی بحران کا شکار نہیں ہونے دے گا۔ رپورٹ میں کسی بھی چینی عہدیدار کا موقف شامل نہیں کیا گیا،چین کی جانب سے مالیاتی امداد دونوں ممالک کے مابین وسیع تر معاشی تعلقات کو ظاہر کرتی ہے جبکہ دوسری جانب پاکستان آئی ایم ایف سے 7سے 8ارب کا مالیاتی پیکج حاصل کرنے کےلئے بھی مذاکرات کر رہا ہے۔ رپورٹ میں مزید کہا گیا کہ چین نے مالیاتی امداد پاکستان کو دینے کا اعلان اس لئے نہیں کیا امریکہ دونوں ممالک کے مابین اس مالیاتی پیکج کے حوالے سے شکوک و شبہات کا اظہار نہ کرے۔سعودی عرب اور متحدہ عرب امارات نے بھی مالی بحران میں مدد کی ہے، خیال رہے کہ وزیراعظم عمران خان نے مسند اقتدار سنبھالنے کے بعد نومبر میں پہلا دورہ چین کای تھا جس میں دونون ممالک کے درمیان دو طرفہ تعاون کے 15معاہدوں اور یادداشتوں پر دستخط کئے گئے تھے، ذرائع کے مطابق چین کی جانب سے ڈیڑھ ارب گرانٹ اور ڈیڑھ ارب قرجہ دیئے جانے کا امکان ہے، جبکہ سی پیک کیلئے 3ارب ڈالر اضافی ملنے کا امکان ہے۔ اسلام آباد( وائس آف ایشیا‘ آئی این پی )اسلام آباد میں ایک تقریب سے خطاب کرتے ہوئے وزیر خزانہ اسد عمر نے کہا کہ گیند اب ہمارے کورٹ میں ہے۔ سعودی عرب پاکستان کی تاریخ کی سب سے بڑی انویسٹمنٹ کرنے والا ہے ، گیند ہمارے کورٹ میں ہے ، صرف اگلے ہفتے کابینہ نے منظوری دینی ہے اور ہم باقاعدہ اعلان کر دیں گے۔اسد عمر کامزید کہنا تھا کہ انہیں سعودی ولیعہد کے پیغامات بھی مل رہے ہیں۔اسد عمر نے کہا کہ ولی عہد محمد بن سلمان کے معاملات میں تیزی کیلئے مسلسل پیغام وصول ہو رہے ہیں۔اسد عمر نے ایک سوال کے جواب میں کہا مکہ ان سے پوچجا جاتا ہے کہ چوروں کو جیل میں کب ڈالیں گے اور یہ لوگوں کی خواہش بھی ہے۔خیال رہے کچھ روز قبل پاکستان کو سعودی عرب سے ایک ارب ڈالر کی دوسری قسط موصول ہو ئی۔۔وزارت خزانہ کے ذرائع کے مطابق سعودی عرب پیکج کے تحت یہ دوسری قسط پاکستان کو موصول ہوئی جب کہ ایک ارب ڈالر کی تیسری قسط جنوری کے وسط میں پاکستان کو ملے گی۔اس منتقلی سے اسٹیٹ بینک کے زر مبادلہ کے ذخائر 9 ارب 26کروڑ ڈالر ہو گئے تھے۔واضح رہے وزیراعظم عمران خان نے پاکستان کو معاشی اور مالی بحران سے نکالنے کیلئے سعودی عرب کا دورہ کیا تھا۔ جس میں سعودی عرب نے پاکستان کو ادھارتیل اور مالی امداد دینے کا اعلان کیا تھا۔ اسی طرح وزیراعظم عمران خان امدادی قرض لینے کیلئے چین کا بھی دورہ کیا۔ بتایا جا رہا ہے کہ چین نے پاکستان کو توقعات سے بڑھ کر امداد دینے کا وعدہ کیا ہے۔وزیراعظم عمران خان نے وفد کے ہمراہ متحدہ عرب امارات کا بھی دورہ کیا۔ مشترکہ اعلامیہ میں کہا گیا ہے کہ صدارتی محل آمد پر وزیراعظمعمران خان کو گارڈ آف آنر پیش کیا گیا۔ جس کے بعد عمران خان نے ولی عہد شیخ محمد بن زید سے ملاقات کی۔ ملاقات میں باہمی دلچسپی کے امور، تجارتی اور اقتصادی تعلقات کو مضبوط بنانے پر اتفاق کا اظہار کیا گیا۔دونوں رہنماں نے زیرغور معاہدوں کو جلد حتمی شکل دینے کیلئے مشاورت پر بھی اتفاق کیا۔ اسی طرح ملاقات میں دونوں رہنماں نے ہرقسم کی دہشتگردی کی شدید الفاظ میں مذمت کی ہے۔ وزیراعظم عمران خان کی یو اے ای کے ولی عہد سے ملاقات میں دونوں ملکوں کا تربیت ، مشترکہ مشقوں اور دفاعی پیداوار میں تعاون سمیت تجارت، سرمایہ کاری اوردیگر شعبوں میں دوطرفہ تعاون بڑھانے کے عزم کا اعادہ بھی کیا گیا۔وزیراعظم عمران خان نے کہا کہ شیخ زید بن سلطان النیہان پاکستان کے سچے دوست تھے۔ وزیراعظم نے پولیو کے خاتمے کیلئے متحدہ عرب امارات کے تعاون پر شکریہ بھی ادا کیا۔ متحدہ عرب امارات کے ولی عہد شیخ محمد زید النیہان نے کہا کہ عرب امارات علاقائی اورعالمی سطح پربرداشت کی اقدارکوفروغ دے رہا ہے۔ پاک عرب امارات تعلقات تعاون وعزت واحترام کے مضبوط رشتے پرمبنی ہیں۔
