اسلام آباد (وائس آف ایشیا) وزیراعظم عمران خان نے سندھ میں تبدیلی کے حوالے سے گورنر سندھ عمران اسماعیل کو نئی ہدایات جاری کردی ہیں۔ منگل کے روز گورنر سندھ عمران اسماعیل نے وزیراعظم سے ملاقات کی اور انہیں بتایا کہ پاکستان پیپلزپارٹی کے متعدد ارکان اسمبلی اپنی پارٹی کی پالیسیوں اور خاص طور پر کرپشن میں ملوث ہونے پر ناخوش ہیں اور حکومت مین تبدیلی کے حوالے سے کسی بھی تحریک کا ساتھ دینے کیلئے تیار ہیں اور سندھ کی دیگر سیاسی جماعتیں بھی اس حوالے سے کردار ادا کرنے کو تیار ہیں۔ جس پر وزیراعظم نے گورنر سندھ کو کہا کہ سندھ میں کسی بھی تبدیلی کے لئے یہ تاثر نہیں جانا چاہیے کہ وفاقی حکومت صوبائی حکومت کا تختہ الٹنا چاہتی ہے۔ بلکہ یہ تاثر جانا چاہیے کہ کرپشن سے تنگ عوامی نمائندے نئی قیادت چاہتے ہیں ۔ اس حوالے سے انہوں نے پارٹی کے دیگر سیاسی رہنماﺅں کو بھی ہدایات جاری کرتے ہوئے کہا کہ وہ محتاط اندازمیں کھیلتے ہوئے تبدیلی کی کوشش جاری رکھیں۔ و زیراعظم نے گورنر سے گفتگو کرتے ہوئے مزید کہا کہ ہم نے 22 سال سیاسی جدوجہد اس لیے نہیں کی کہ دوسروں کے حق پر ڈاکہ ڈالیں بلکہ اس لیے کی ہے کہ پاکستان ڈاکوﺅں اور ڈاکوں سے بچائیں اور ایسے عناصر کے خلاف اپنی جدوجہد جاری رکھیں گے جنہوں نے پاکستان کو لوٹا اور اس کی معیشت کو تباہ کردیا۔ انہوں نے وزیراعلیٰ سندھ پر دباﺅ بڑھانے کیلئے بھی کیا کہ وہ خود ہی استعفیٰ دے جائیں۔ علاوہ ازیں یہ بھی معلوم ہوا ہے کہ انہوں نے گورنر راج کے حوالے سے چلائی جانے والی خبروںکے ضمن میں گورنر کوکہا کہ اس پروپیگنڈے کو بھی زائل کیا جائے۔
