باغ، راولپنڈی (مانیٹرنگ ڈیسک) پاک فوج کے ترجمان میجر جنرل آصف غفور کے مطابق پاکستان آرمی نے باغ سیکٹر میں بھارتی فوج کا کوارڈ کاپٹر مار گرایا۔ نریندر مودی کی سرجیکل اسٹرائیک کی ڈینگیں، فوجی تو درکنار ڈرون تک کنٹرول لائن عبور نہیں کر سکتا، پاک فوج نے باغ سیکٹر میں کنٹرول لائن بار کرنے کی کوشش کرنے والے بھارتی ڈرون کو مار گرایا۔ ڈی جی آئی ایس پی آر نے ایک ٹویٹ میں بتایا ہے کہ پاک فوج نے کنٹرول لائن پر باغ سیکٹر میں بھارتی جاسوس کوآرڈ کاپٹر کو مار گرایا ہے، ڈی جی آصف غفور کا کہنا تھا کہ بھارتی ڈرون کو بھی کنٹرول لائن پار نہیں کرنے دیا جائے گا انشاءاللہ۔ دوسری طرف ذرائع کا کہنا ہے کہ بھارتی وزیراعظم نریندر مودی اپنی عوام کے سامنے پاکستان پر سرجیکل اسٹرائیک کی ڈینگیں مار رہے ہیں پاک فوج کی جانب سے بھارتی جاسوس کوآرڈکاپٹر کو مار گرانا اس بات کا روشن ثبوت ہے کہ سرجیکل اسٹرائیک تو درکنار بھارتی ڈرون تک کنٹرول لائن پار نہیں کر سکتا۔ سماجی رابطے کی ویب سائٹ پر پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے بتایا کہ ’پاک فوج نے لائن آف کنٹرول کے قریب پرواز کرنے والے بھارتی جاسوس ڈرون کو نشانہ بنایا۔ اُن کا ک ہنا تھا کہ انشاءاللہ کسی ایک ھارتی ڈرون کو بھی سرحد پار نہیں کرنے دیں گے۔ پاک فوج نے پاکستانی حدود میں داخل ہونے والے ڈرون کو باغ سیکٹر کے قریب نشانہ بنایا۔ قبل ازیں پاک فوج نے 19 نومبر 2016ءکو پاکستانی حدود میں داخل ہونے والے ڈرون کو مار گرایا تھا، آئی ایس پی آر کا کہنا تھا کہ ڈرون 60 میٹر تک پاکستانی حدود میں داخل ہو گیا تھا۔ بعد ازاں 27 اکتوبر 2017ءکو بھی بھارت نے پاکستان کے خلاف گھناﺅنی سازش کرنے کی کوشش کی تھی جسے پاک فوج نے بروقت ناکام بناتے ہوئے لائن آف کنرول کے علاقے رکھ چکری سیکٹر پر بھارتی ڈرون کو مار گرایا تھا۔ اس سے قبل 2015ءمیں پاک فوج نے بھارتی ڈرون مار گرایا تھا جس کے تکنیکی تجزیے کے دوران جاسوسی کے ناقابل تردید شواہد سامنے آئے تھے۔ بھارتی ڈرون نے پاکستانی علاقوں کی تصاویر بنائی تھیں۔ جن میں لائن آف کنٹرول کا بھارتی علاقہ واضح نظر آ رہا تھا، ماہرین کا یہ بھی کہنا تھا کہ ڈرون کو مقبوضہ کشمیر کے علاقے چوڑیاں سے اڑا کر پاکستانی حدود میں داخل کیا گیا۔ تصاویر میں ایل او سی پر بھارتی علاقہ بھی واضح نظر آ رہا ہے۔ جاسوسی طیارہ مقبوضہ کشمیر کے علاقے چوڑیاں سے اڑایا گیا۔ اب سے کچھ دیر قبل بھارتی وزیراعظم نریندر مودی نے پاکستان کے خلاف ہرزہ سرائی کی تھی جس کا دفتر خارجہ نے بھرپور انداز میں جواب دیا اور پاک فوج نے سرحد پر بھارتی فوج کے عزائم کو خاک میں ملایا۔
