اسلام آباد (ویب ڈیسک)وزیر اعظم عمران خان کی زیر صدارت اہم اجلاس جاری ہے جس میں سول اور عسکری قیادت شریک ہے۔وزیراعظم عمران خان کی زیر صدارت پرائم منسٹر آفس میں سکیورٹی سے متعلق اہم اجلاس جاری ہے جس میں آرمی چیف جنرل قمر جاوید باجوہ، ڈی جی آئی ایس آئی لیفٹیننٹ جنرل عاصم منیر ، ڈی جی آئی ایس پی آر میجر جنرل آصف غفور شریک ہیں۔ اجلاس میں وفاقی وزرا اسد عمر، شفقت محمود، شہریار آفریدی ، فروغ نسیم سمیت دیگر بھی شریک ہیں۔ذرائع کا کہنا ہے کہ اجلاس میں ملکی سلامتی اور سکیورٹی سے متعلق امور پر تبادلہ خیال کیا گیا جبکہ بھارتی اشتعال انگیزی کے بعد کی صورتحال پر بھی بات چیت کی گئی۔ اجلاس میں فنانشل ایکشن ٹاسک فورس کی سفارشات پر تبادلہ خیال کیا گیا اور وزیر اعظم کو کالعدم تنظیموں کے خلاف جاری کریک ڈاﺅن پر بریفنگ دی گئی۔ سیکرٹری خارجہ نے افغان امن عمل کے حوالے سے بریفنگ اجلاس کو بریف کیا۔وزیر اعظم عمران خان نے کہا کہ پاکستان افغانستان میں امن چاہتا ہے کیونکہ افغانستان کے امن سے پورے خطے کا امن جڑا ہوا ہے، پاکستان افغان امن عمل میں اپنا مخلصانہ کردار ادا کرتا رہے گا۔
