مقبوضہ کشمیر (ویب ڈیسک)بھارتی قابض فوج نے جموں و کشمیر میں کرفیو اور مواصلاتی بلیک آو¿ٹ کے 42 ویں روز فائرنگ سے 3 نوجوانوں کو شہید کر دیا۔کشمیر میڈیا سروس کی رپورٹ کے مطابق بھارتی فوج نے ضلع کاٹھوا میں ایک جعلی مقابلے میں دو نوجوانوں شہید کردیا اور ایک نوجوان کو گرفتار کرنے کے بعد پولیس کی حراست میں شہید کردیا گیا۔رپورٹ کے مطابق پولیس نے جموں کے علاقے میں ایک مارکیٹ سے نوجوان کو جبری اٹھایا تھا اور چند گھنٹے بعد جموں شہر کے جانی پور پولیس میں شہید کردیا جس کی شناخت اخلاق احمد کے نام سے ہوئی۔پولیس نے اخلاق احمد کے اہل خانہ کو فون کرکے ان کی شہادت کی اطلاع دی اورکہا کہ ان کی میت کی گورنمنٹ میڈیکل کالج اینڈ ہپستال جموں سے اٹھالیں۔بعد ازاں اخلاق احمد کی حراست میں شہادت کے خلاف احتجاج کیا گیا اور اس میں ملوث پولیس اہلکاروں کے خلاف کارروائی کا مطالبہ کیا گیا۔دوسری جانب کشمیر وادی سمیت جموں کے کئی علاقوں مں بدستور 42 ویں روز بھی فوج کا پہرہ جاری رہا اور تمام دکانیں، مارکیٹیں اور کاروبار بند رہا اور ٹرانسپورٹ بھی بدستور معطل رہا۔بھارتی حکومت کی جانب سے 5 اگست کو آرٹیکل 370 اور 35 اے کی منسوخی کے فیصلے کے بعد معطل کیا گیا مواصلاتی رابطہ، انٹرنیٹ اور موبائل سمیت ٹی وی چینلز بند رہے اور لوگ گھروں میں محصور رہے۔رپورٹ کے مطابق مقبوضہ کشمیر میں کرفیو، پابندیوں اور بھارت غیر قانونی قبضے کے خلاف گزشتہ 6 ہفتوں کے دوران روزانہ کی بنیاد پر تقریباً 20 احتجاجی مظاہرے ہورہے ہیں۔سرکاری عہدیداروں کے حوالے سے ایک میڈیکل رپورٹ میں کہا گیا ہے کہ مقبوضہ کشمیر میں بھارت کے خلاف مسلسل احتجاج اور مظاہرے کیے جارہے ہیں جن میں سے اکثر سری نگر میں ہوتے ہیں۔رپورٹ کے مطابق 5 اگست سے تاحال 722 احتجاجی مظاہرے کیے جاچکے ہیں، سری نگر کے بعد احتجاج کے بڑے مراکز بارہ مولا اور پلواما ہیں جہاں بچے، خواتین اور بزرگ بھی بھارتی افواج کے خلاف احتجاج بھی۔ویلفیئر پارٹی آف انڈیا کے وفد کے ہمرا 12 ستمبر اور 13 ستمبر کو مقبوضہ کشمیر کا دورہ کرنے والے تین رکنی وفد میں شامل شیما محسن نے نئی دہلی میں صحافیوں سے گفتگو کرتے ہوئے کہا کہ بھارتی فورسز نے 5 اگست سے اب تک تقریباً 40 ہزار کشمیریوں کو گرفتار کرلیا ہے۔خیال رہے کہ انسانی حقوق کے لیے عالمی سطح پر کام کرنے والی تنظیم ایمنسٹی انٹرنیشنل نے بھی مقبوضہ کشمیر سے پابندیاں ہٹا کر شہریوں کو آزادانہ نقل و حرکت کی اجازت دینے کا مطالبہ کیا تھا۔ایمنسٹی انٹرنیشنل نے اپنی ویب سائٹ پر اس حوالے سے آن لائن پٹیشن بھی شروع کررکھی ہے اور بیان میں کہا کہ ’مقبوضہ کشمیر میں بسنے والے 80 لاکھ افراد 5 اگست سے مواصلات کے بغیرزندگی گزارنے پر مجبور ہیں‘۔پابندیاں ہٹانے کا مطالبہ کرتے ہوئے بھارت پر زور دیا کہ ’دنیا جاننا چاہتی ہے کہ مقبوضہ وادی میں کیا ہورہا ہے، لوگ بھارتی حکومت پر زور دیں کہ وہ کشمیریوں کو بولنے کا موقع دیں‘۔

لندن(ویب ڈیسک)یورپی یونین کے عہدیداروں نے برطانیہ کے وزیر اعظم بورس جانسن کی جانب سے بریگزٹ پر معاہدے کے حوالے سے بڑی پیش رفت کے دعوے کو مسترد کردیا۔بورس جانسن نے ایک انٹرویو میں دعویٰ کیا تھا کہ ‘بریگزٹ معاہدے کے حوالے برلن، پیرس اور ڈبلن میں رکاوٹوں کو توڑنے کے لیے متحرک ہیں اور بڑی پیش رفت ہورہی ہے’۔دی گارجین کی رپورٹ کے مطابق برطانوی وزیراعظم کے وفد کے ساتھ بریگزٹ معاہدے کے حوالے سے مذاکرت میں حصہ لینے والے یورپی یونین کے نمائندے ڈیوڈ فروسٹ نے بورس جانسن کے دعوے کو مسترد کردیا۔مذاکرات کے بعد فریقین کے رویے کے حوالے سے ان کا کہنا تھا کہ ‘درحقیقت لوگ خوف زدہ ہیں اور میں دو روز قبل جزیات پر ہونے والی گفتگو کو مذاکرات نہیں کہوں گا کیونکہ ابھی ہم بہت دور ہیں’۔رپورٹ کے مطابق جرمنی کے شہر برلن اور فرانس میں منعقدہ مذاکرات کو حوصلہ افزا قرار دیا گیا تھا لیکن برسلز میں مذاکرات سے تمام توقعات منتشر ہوگئی ہیں کیونکہ اس سے قبل بورس جانسن نے پارلیمنٹ کو معطل کرنے اور بغیر معاہدے کے یورپی یونین سے علیحدگی کو ترجیح دینے کی باتیں کی تھیں جبکہ وہ باقاعدہ طور پر منصوبہ پیش کرنے میں ناکام رہے۔یورپی یونین کے ایک اور عہدیدار نے کہا کہ ‘یہ بیان حیران کن نہیں ہے بلکہ اس سے لگتا ہے کہ یہ سب مذاق ہے حالانکہ ہم انتہائی سنجیدہ معاملے پر بات کررہے ہیں’۔ان کاکہنا تھاکہ ‘بغیر معاہدے کے علیحدگی کے نتائج انتہائی سخت ہوں گے اور اس کو ایک حقیقت کے طور پر لینے کے بجائے ایک کھیل کی طرح لیا جارہا ہے’۔یورپی یونین کے نمائندے جین کلاﺅڈ جنکر کا کہنا تھا کہ بغیر معاہدے کے بریگزٹ خطرناک ہوگا اور اس کو حل کرنے میں کئی برس لگ جائیں گے اور برطانیہ کے محب وطن اپنے ملک کو اس طرح کے حالات میں دیکھنا نہیں چاہیں گے۔ان کا کہنا تھا کہ یورپی یونین کو معلوم ہے کہ برطانیہ یہ نہیں چاہتا تھا لیکن تاحال متبادل تجویز کا انتظار کررہا ہے، مجھے امید ہے کہ ہم انہیں کچھ سے دے سکیں لیکن وقت نکلتا جارہا ہے۔یورپی یونین کے عہدیداروں نے امید ظاہر کرتے ہوئے کہا کہ اگلی ملاقات میں معاہدے کے حوالے سے کوئی صورت بن جائے گی۔واضح رہے کہ برطانوی وزیراعظم متعدد مرتبہ واضح کرچکے ہیں کہ وہ 31 اکتوبر تک یورپی یونین سے علیحدگی کا راستہ بنالیں گے تاحال انہیں شدید مشکلات کا سامنا ہے۔ان کا کہنا تھا کہ وہ معاہدے کی کوشش کررہے لیکن برطانیہ کو کسی معاہدے کے بغیر یورپی یونین سے الگ ہوجانا چاہیے تاہم ارکان پارلیمنٹ کو خدشہ ہے کہ بغیر کسی معاہدے کے علیحدگی سے بڑے پیمانے پر تباہی ہوگی۔برطانیہ کے ایوانِ بالا نے 6 ستمبر کو وزیراعظم بورس جانسن کو بریگزٹ میں تاخیر پر مجبور کرنے کے لیے قانون کی حتمی منظوری دی تھی۔اس قانون کے مطابق اگر برطانوی وزیراعظم یورپی یونین کے ساتھ بریگزٹ معاہدہ کرنے میں ناکام ہوگئے تو یورپی یونین سے برطانیہ کے اخراج کی حالیہ حتمی مدت 31 اکتوبر سے آگے بڑھا دی جائے گی۔