بہاولپور (ویب ڈیسک) وزیراعلیٰ پنجاب سردار عثمان بزدار کا کہنا ہے کہ 14 اگست کو کشمیریوں کی حمایت میں لاہور میں ریلی نکالیں گے۔میڈیا سے گفتگو کرتے ہوئے ان کا کہنا تھا کہ سینٹرل جیل کے دورے کے دوران میں نے قیدیوں کے ساتھ کھانا کھایا ہے۔ جلد ترقیاتی کام شروع ہونگے۔ منتخب نمائندوں سے میٹنگ ہو گی جلد اس پر عمل درآمد ہو گا۔ فیصل آباد ڈویژن سے کام کا آغاز کر دیا ہے۔ 21 ارب روپے مختص کیے ہیں۔وزیراعلیٰ پنجاب کا کہنا تھا کہ قیدیوں کی سزا میں دو ماہ کی رعایت کا اعلان کیا ہے۔ بہاولپور میں جنوبی پنجاب سیکرٹری کو جلد فعال کریں گے۔ پنجاب میں نو بڑے ہسپتال بنا رہے ہیں۔اس سے قبل وزیراعلیٰ پنجاب نے مختلف شہروں کا دورہ کیا، عثمان بزدار نے تقاریب میں شرکت کی اور دارالامان کے بچوں میں تحائف بھی تقسیم کئے، سیالکوٹ میں علامہ اقبال میموریل ٹیچنگ ہسپتال بھی گئے۔ سردار عثمان بزدار سرگودھا پہنچے اور پولیس اہلکاروں کے اعزاز میں دئیے کھانے میں شرکت کی۔ جوانوں کے ساتھ کھانا کھایا اور شہداءکے ورثا میں تحائف تقسیم کیے۔عثمان بزدار نے دارالامان کے بچوں میں عید تحائف بھی تقسیم کئے، وزیر اعلی پنجاب نے شہداءکی یادگار پر پھول چڑھائے اور شہر کا دورہ کرکے صفائی کا جائزہ بھی لیا۔عثمان بزدار سیالکوٹ کے گورنمنٹ علامہ اقبال میموریل ٹیچنگ ہسپتال گئے جہاں انہوں نے گائنی اور سرجیکل وارڈ کا دورہ کیا۔ ہسپتال انتظامیہ نے وزیراعلیٰ کو ڈائیلسزاور ایکسرے مشین خراب ہونے سے آگاہ کیا۔وزیراعظم کی مشیر برائے اطلاعات ڈاکٹر فردوس عاشق اعوان اور مشیر وزیراعظم عثمان ڈار بھی وزیراعلیٰ کے ہمراہ تھے۔

ملتان (ویب ڈیسک) عید کے دوسرے دن بھی قربانی کا سلسلہ جاری ہے۔ کل جو قربانی نہیں کر پائے آج دوسرے دن وہ سنت ابراہیمیؑ کی ادائیگی میں مصروف ہیں۔ قربانی کے ساتھ ساتھ چٹ پٹے پکوان بھی تیار کئے جا رہے ہیں، بچوں نے تفریح گاہوں کا رخ کر لیا۔ملک بھر میں گذشتہ روز کی طرح آج بھی قربانی کا سلسلہ جاری ہے، جو لوگ قصائی نہ ملنے کے سبب عید کے پہلے دن سنت ابراہیمیؑ ادا نہیں کر سکے وہ آج اپنا فرض ادا کر رہے ہیں۔ قربانی سے فراغت کے بعد مزے مزے کے پکوانوں کی تیاری کا سلسلہ بھی جاری ہے۔ مہندی لگائے اور چوڑیاں ہاتھوں میں پہنے خواتین کا زیادہ تر وقت کچن اور عید پر آنے والے مہمانوں کی آو بھگت میں گزر رہا ہے۔عوام نے عید پر چٹ پٹے پکوانوں سے لطف اندوز ہونے کے بعد بچوں کیساتھ تفریح گاہوں کا رخ بھی کیا جہاں پر بچے سلائنڈنگ، جٹ ویل سمیت مختلف جھولوں سے خوب لطف اندوز ہو رہے ہیں۔تفریح گاہوں میں اونٹ اور گھوڑے کی سیر کا بھی خصوصی اہتمام کیا گیا ہے جبکہ جھولے لینے کیساتھ شہری مزے مزے کے چٹخارے دار پکوان سے بھی لطف اندوز ہو رہے ہیں۔

لاہور(ویب ڈیسک) وزیراعظم عمران خان نے انڈونیشیاءکے صدر جوکوویدودو سے ٹیلیفونک رابطہ کیا،جس میں وزیراعظم نے انڈونیشیئن صدر کو مقبوضہ کشمیر کی مخدوش صورتحال سے آگاہ کیا۔میڈیا رپورٹس کے مطابق وزیراعظم عمران خان اور انڈونیشیاءکے صدر جوکوویدودو کے درمیان ٹیلیفونک رابطہ ہوا ہے۔جس میں وزیراعظم نے انڈونیشیئن صدر کو مقبوضہ کشمیر کی مخدوش صورتحال سے آگاہ کیا۔وزیراعظم عمران خان نے کہا کہ بھارت نے کشمیر کی خصوصی حیثیت تبدیل کرکے عالمی قوانین کی خلاف ورزی کی۔بھارتی اقدام سلامتی کونسل کی قراردادوں کی سنگین خلاف ورزی ہے۔بھارت نے مقبوضہ وادی کے مکینوں کو محصور کررکھا ہے جس سے ان کی جانوں کے ضیاع کا خدشہ ہے۔انہوں نے کہا کہ عالمی برادری مقبوضہ وادی میں مظالم بند کروانے میں کردارادا کرے۔انڈونیشیاء کا مسئلہ کشمیر کے حل کیلئے تعاون قابل تحسین ہے۔ اس سے قبل وزیر اعظم عمران خان نے ایران کے صدر حسن روحانی کو ٹیلی فون کیا اور مقبوضہ کشمیر میں پیدا ہونے والی موجودہ صورتحال سے آگاہ کیا۔ وزیر اعظم عمران خان کا صدر روحانی کو یہ ٹیلی فون بھارتی مقبوضہ کشمیر میں بگڑتی ہوئی صورتحال سے متعلق عالمی رہنماﺅں کو آگاہ کرنے کی کوششوں کا حصہ ہے۔وزیر اعظم نے مقبوضہ جموں وکشمیر کی بین الاقوامی سطح پر مسلمہ متنازعہ حیثیت کو تبدیل کرنے کے بھارتی اقدام سے آگاہ کیا جو اقوام متحدہ کی سلامتی کونسل کی قراردادوں کی صریح خلاف ورزی ہے۔ مزید برآں مقبوضہ کشمیر کی جغرافیائی حیثیت میں کوئی بھی تبدیلی بین الاقوامی قانون کی خلاف ورزی ہو گی۔ وزیر اعظم نے خاص طور پربھارتی افواج کی طرف سے مقبوضہ کشمیر میںکریک ڈاﺅن کے نتیجہ میں بڑے پیمانے پر قتل عام کے سنگین خدشے کو اجاگر کیا اور زور دیا کہ عالمی برادری کو کسی بڑی تباہی سے بچنے کے لئے فوری کردار ادا کرنا چاہئے۔وزیر اعظم نے ایرانی صدر کو ا?گاہ کیا کہ گزشتہ 7 دہائیوں سے تصفیہ طلب مسئلہ کشمیر کو اقوام متحدہ کی سلامتی کونسل کی قراردادوں کے مطابق پر امن طریقے سے حل کرنے کے لئے پاکستان نے بارہا بھارت پر زور دیا ہے اور مسلسل کوششوں کی ہیں۔ ایرانی صدر حسن روحانی نے علاقائی کشیدگی کو کم کرنے کے لئے تمام ممکنہ کوششوں کی ضرورت پر زور دیتے ہوئے کہا کہ کشمیری مسلمانوں کو پرامن زندگی بسر کرنے کے لئے تمام قانونی حقوق اور سہولیات کے استعمال کا حق ملنا چاہئے۔

کراچی (ویب ڈیسک) قومی ٹیم کے سابق کپتان اور مایہ نا ز آل راﺅنڈر شاہد آفریدی نے کراچی میں حالیہ بارشوں سے ہونے والی تباہی کے بعد سندھ حکومت سے مستعفی ہونے کا مطالبہ کردیا ہے۔ سوشل میڈیا ویب سائٹ ٹویٹر پر اپنے میں شاہد آفریدی کا کہنا تھا کہ ” پاکستان کو چلانے والا شہر کراچی خود پانی میں ڈوب گیا۔ اگر ہو سکے تو ، ہے تو مشکل کام ان کے لئے استعفی دے دینا، لیکن اگر استعفی دے دے تو شہر کراچی اور ملک کیلئے اچھا ہوگا، کوئی نئی سوچ ٹیکنیکل اور پروفیشنل لوگوں کو کراچی کی ذمہ داری دے دینی چاہیئے ۔یاد رہے کہ کراچی میں رات سے بارش کا سلسلہ وقفے وقفے سے جاری ہے جس کی وجہ سے نظام زندگی مفلوج ہوگئی، شہر کے مختلف علاقوں میں پانی کھڑا ہونے سے ٹریفک کا نظام متاثر ہے جبکہ سڑکیں ندی نالوں کے منظر پیش کرنے لگے ہے ، مختلف حادثات میں 8 افراد جاں بحق ہو گئے۔شہر میں رات سے شروع ہونے والی بارش کے باعث نشیبی علاقے زیر آب آ گئے اور سڑکوں پر کئی کئی فٹ پانی جمع ہو گیا۔ملیر، ماڈ ل کالونی، ناگن چورنگی، کورنگی الیاس گوٹھ، جوہر بلاک تین سمیت کئی نشیبی علاقوں میں بارش کا پانی گھروں میں داخل ہو گیا جبکہ شہر کی اہم شاہراہیں تالاب کا منظر پیش کرنے لگی۔محکمہ موسمیات کے مطابق گزشتہ 24 گھنٹوں کے دوران کراچی میں 100 ملی میٹر سے زیادہ بارش ریکارڈ کی گئی ہے۔بارش کے باعث کرنٹ لگنے اور دیگر حادثات میں 8 افراد جاں بحق اور متعدد زخمی ہوئے۔اس کے علاوہ شہر کے مختلف علاقوں میں کرنٹ لگنے سے قربانی کے 7 جانور بھی ہلاک ہوئے۔ مختلف علاقوں سڑکیں زیر آب آنے سے ایمبولینسس سمیت متعدد گاڑیاں پھنس گئیں، جس کی وجہ سے لوگوں کو اپنی مقررہ مقامات پر پہنچنے میں دشواریوں کا سامنا ہے جبکہ مختلف مقامات پر سڑکوں پر کھڑی گاڑیاں بھی پانی میں ڈوب گئیں ہیں۔شہر کے مختلف علاقوں میں بارش کی وجہ سے بجلی بھی کئی گھنٹوں سے معطل ہے۔ بارش سے جہاں کئی مسائل پیدا ہوئے ہیں وہاں قربانی کی جانوروں کی دیکھ بھال بھی عوام کےلئے پریشانی کا باعث ہے اور لوگ کھلے آسمان تلے بارش میں جانوروں کو رکھنے پر مجبور ہیں۔