لاہور(ویب ڈیسک)کانز فلم فیسٹیول کی جس جگہ ریڈ کارپٹ سجایا جاتا تھا اور دنیا بھر کے شوبز ستارے وہاں فلم فیسٹیول کے دوران اپنے جلوے بکھیرتے تھے وہاں اب بے گھر افراد کے لیے عارضی رہائش گاہیں قائم کی گئی ہیں۔دنیا کے سب سے بڑے فلمی میلے کا اعزاز رکھنے والے معروف کانز فلم فیسٹیول کی انتظامیہ نے کچھ دن قبل 20 مارچ کو کورونا وائرس کی وجہ سے فلم کو ملتوی کرنے کا اعلان کیا تھا۔کانز فلم فیسٹیول کو موخر کیے جانے کے بعد فلم انتظامیہ نے فیسٹیول کی جگہ کو عارضی طور پر فرانس کے بے گھر افراد کے عارضی مسکن میں تبدیل کرنے کا اعلان کیا تھا جس کے بعد اب انتظامیہ نے معروف فلم فیسٹیول کی جگہ کو عارضی رہائش گاہ میں تبدیل کردیا۔کانز فلم فیسٹیول انتظامیہ کے ایک عہدیدار نے بتایا کہ فوری طور پر بے گھر افراد کے لیے عارضی ٹھکانے کے بندوبست کرنے سمیت ان کے لیے کھانے پینے کا بندوبست بھی کیا گیا۔فرانسیسی حکومت کے اعداد و شمار کے مطابق ملک بھر میں تقریبا 12 ہزار بے گھر افراد موجود ہیں جو وائرس کے پھیلنے کے ان دنوں میں سب سے بڑا مسئلہ ہیں۔عہدیدار کے مطابق کانز فلم فیسٹیول کی جگہ بنائے گئے بے گھر افراد کے لیے عارضی مسکن میں ہر رات 50 سے 70 افراد آتے ہیں اور ہر ایک شخص کو الگ ٹینٹ یا الگ بسترا دیا جاتا ہے، ساتھ ہی انہیں مناسب خوراک بھی فراہم کی جا رہی ہے۔تقریبا تین ہفتوں تک جاری رہنے والے کانز فلم فیسٹیول کا انعقاد رواں برس مئی میں 12 سے 23 مئی تک ہونا تھا تاہم کورونا وائرس کے تیزی سے پھیلاو کی وجہ سے اسے ملتوی کردیا گیا تھا۔
