لاہور (لیڈی رپورٹر) وزیراعظم نے کہا ہے کہ کسی ملک سے ایک ڈالر نہیں لیا۔ وزیراعظم کے اس بیان کے بعد جب ہم نے اراکین اسمبلی کی رائے لی تو ترجمان پنجاب حکومت سعدیہ سہیل نے کہا میں سمجھتی ہوں خان صاحب نے درست فرمایا ہے سب سے بڑی بات یہ ہے کہ ہم ترقی پذیر ملک ہونے کے باوجود ان کرائسز سے بہت احسن طریقے سے اپنی مدد آپ کے تحت نمٹ رہے ہیں جبکہ اس موقع پر بڑی بڑی سپر پاور کلیپس کرتی ہیں۔ میں سمجھتی ہوں پاکستانی قوم اور حکومت کی عظیم کامیابی ہے کہ اپنے زور بازو پر مشکل حالات کا مقابلہ کر رہے ہیں۔ ن لیگ کی ایم پی اے بشریٰ بٹ نے کہا کہ وزیراعظم کا جب دل کرتا ہے اپنا موقف بدل لیتے ہیں۔ پہلے ان کی طرف سے کہا جا رہا تھا کہ امداد آ رہی ہے اس کے بعد اب اتنا کہنا کہ ایک ڈالر نہیں آیا۔ اب وہ کیا بتانا چاہ رہے ہیں کہ جتنے بھی فنڈز آ رہے ہیں وہ کیا ان کی محنت ہے‘ وہ فنڈز کہاں گئے۔ آسیہ امجد تحریک انصاف کی ایم پی اے نے کہا پاکستانی عوام جیسی بھی ہے ہمیشہ مشکل وقت میں پاکستانی کھلے دل کے ساتھ میدان میں خود اترتے ہیں اگر کوئی مدد نہیں کرتا تو نہ کرے۔ وزیراعظم عمران خان نے بالکل ٹھیک کہا ہم سب ایک قوم ہیں ہم اپنے قائد کی رہنمائی میں اس مشکل وقت سے نکلیں گے۔ ن لیگ کے ایم پی اے منیب الحق نے خبریں سے گفتگو کرتے ہوئے کہا وزیراعظم کا بیان ہے کہ انہیں کسی ملک کی طرف سے ایک ڈالر کی بھی امداد نہیں ملی۔ میں سمجھتا ہوں اب امداد کے سلسلے سے ذرا باہر نکلنا چاہئے۔ وزیراعظم تو ہمیشہ فرماتے رہے ہیں کہ کشکول توڑیں گے اورکسی کے آگے ہاتھ نہیں پھیلائیں گے۔ مراد سعید کی سٹیٹ منٹ آپ کو یاد ہوگی عمران خان وزیراعظم بنے گا تو حکومت دو سو ارب منہ پر دے مارے گی اب کہاں گئیں وہ باتیں اب کیوں افسردہ پھر رہے ہیں اور امداد کی طلب کرتے ہیں اور پریشان ہوتے ہیں کہ کسی ملک نے ایک ڈالر بھی نہیں دیا۔ ڈالر نہ دینے کی ایک وجہ یہ بھی ہے کہ چوروں اور کرپٹ لوگوں کو ایڈ نہیں ملتی۔ سب جانتے ہیں وزیراعظم نے ہر وقت مانگا ہی ہے۔ جاوید میانداد کی سٹیٹ منٹ نکال کر دیکھ لیں وہ بھی ٹیلی تھون میں کہہ گئے ہیں کہ جب سے ہمارا وزیراعظم صاحب سے واسطہ پڑا ہے ہم مانگنے پر ہی لگے ہوئے ہیں۔ وزیراعظم صاحب کی بدقسمتی ہے کہ جب سے انہوں نے ہوش سنبھالا ہے وہ مانگنے پر ہی لگے ہوئے ہیں۔ مومنہ وحید نے کہا جب لوگ یہ کہتے ہیں وزیراعظم بھکاری ہے تو ان کو سوچنا چاہئے کہ وہ عوام کے لیے کام کر رہے ہیں۔ وزیراعظم نے یہ بات عوامی مفاد میں کہی ہے۔ اس وقت سب کو ایک ہونا چاہئے۔
