لاہور (ویب ڈ سک) شوبز انڈسٹری سے وابستہ شخصیات نے امت مسلمہ کو رمضان المبارک کی مبارکباد دیتے ہوئے دعا کی ہے کہ اللہ پاک ماہ صیام کے صدقے ہم سب کو کورونا وائرس کی آزمائش سے نکال دے۔اداکاروں کا کہنا تھا کہ رمضان المبارک میں اجتماعی عبادات نہ ہونے پر دلی رنج ہے مگر گھروں میں اپنے اپنے قبلے درست کرلیں۔ اداکار حمزہ علی عباسی، شان، معمر رانا، شہروز سبزواری، ہمایوں سعید، اداکارہ ماہرہ خان، ریما، ثنائ جاوید، مومنہ اقبال، گلوکارہ آئمہ بیگ اور حدیقہ کیانی سمیت دیگر نے رمضان المبارک کو اللہ کی طرف سے انعام قرار دیتے ہوئے کہا کہ اس مہینے میں جتنی ہوسکے برکتیں سمیٹ لیں۔حمزہ علی عباسی نے کہا کہ ہم مشکل وقت میں ضرور ہیں مگر ماہ صیام اللہ کے قرب کا ذریعہ ہے سب کو مبارک دیں۔ ماہرہ خان نے کہا کہ یہ مہینہ ہم سب پر رحمتیں نازل فرمائے گا۔شان نے کہا کہ اللہ کو راضی کرنے کے ساتھ ساتھ سحر و افطار کا لطف اٹھائیں۔ ہمایوں سعید نے کہااللہ پاک ہم سب کو ہر طرح کے شر سے محفوظ رکھے۔ریما خان نے کہا کہ کوشش کریں کہ ہماری وجہ سے کسی کا دل نہ دکھے۔ ثنائجاوید نے کہا کہ رمضان المبارک خوش قسمت لوگوں کو میسر آتا ہے، عبادات کا خوب اہتمام کریں۔مومنہ اقبال نے کہا کہ ہماری خوش قسمتی ہے اللہ نے ہمیں اپنی نعمتوں کا شکر کرنے کا موقع دیا، روزہ ہمیں صبر کا درس بھی دیتا ہے۔ حدیقہ کیانی نے کہا کہ رمضان کی رحمتیں سب پر نازل ہونگی اللہ بڑا بے نیاز ہے۔نمرہ خان نے کہا کہ صبر اور استقامت کا درس ہمیں روزہ رکھنے سے حاصل ہوتا ہے، ضرورت مندوں کو نہ بھولیں۔
