وزیراعظم عمران خان نے خواتین قیدیوں کی رہائی کے لیے سپریم کورٹ کے احکامات پر فوری عملدرآمد کی ہدایت کردی۔
اپنے بیان میں وزیر اعظم عمران خان کا کہنا تھا کہ سپریم کورٹ کے احکامات پر فوری عملدرآمد کا فیصلہ وزارت انسانی حقوق، اٹارنی جنرل اور بیرسٹرعلی ظفر سے مشاورت کے بعد کیا۔
انہوں نے کہا کہ سپریم کورٹ کےفیصلے پر پورا اترنے والی زیر سماعت مقدمات میں نامزد اور سزایافتہ خواتین قیدیوں کی رہائی ہوگی جب کہ غیر ملکی خواتین قیدیوں سے متعلق بھی فوری رپورٹ طلب کی ہے۔
وزیراعظم کا کہنا تھا کہ سزائے موت پانےوالی خواتین کے معاملےکا بھی انسانی ہمدردی کی بنیاد پر جائزے کے لیے رپورٹ طلب کرلی ہے۔
خیال رہے کہ سپریم کورٹ نے مقدمہ نمبر 299/2020 میں خواتین قیدیوں سے متعلق فیصلہ دیا تھا۔
گزشتہ دنوں وزیراعظم عمران خان نے ملک کی جیلوں میں خواتین قیدیوں کی حالت زار کا جائزہ لینے کے لیے وفاقی وزیر برائے انسانی حقوق شیریں مزاری کی سربراہی میں اعلیٰ سطح کی کمیٹی بھی بنائی تھی۔
