قومی کرکٹ ٹیم کے سابق کپتان شاہد آفریدی بھی ٹک ٹاک پر پابندی کی حمایت میں آگے آگئے۔
تفصیلات کے مطابق عالمی شہرت یافتہ کرکٹر شاہد آفریدی کا کہنا ہے کہ ٹک ٹاک بند کرنے کا فیصلہ بہترین ہے،جس نے بھی یہ فیصلہ کیا ہے، اچھا فیصلہ کیا ہے۔
شاہد آفریدی نے مزید کہا کہ میں نے کبھی بھی ٹک ٹاک ویڈیوز نہیں بنائیں۔
دوسری جانب کھیلوں سے متعلق بات کرتے ہوئے سابق کپتان کا کہنا تھا کہ سلیکشن کمیٹی کو سوچنا ہوگا کہ کس کھلاڑی کو کون سے فارمیٹ میں کھیلنا چاہیے۔بار بار سننے میں آتا ہے فٹنس کیمپ لگائے جا رہے ہیں۔
انہوں نے کہا کہ مصباح الحق دیگر کھلاڑیوں کے ساتھ عمران خان کے پاس گئے ہوں گے، ایسا بھی نہیں ہے کہ نئے ڈومیسٹک کرکٹ شروع ہونے پر سب بیروزگار ہوگئے۔ ابھی بھی دو سو سے زائد کھلاڑیوں کے پاس کنٹریکٹس ہیں۔
شاہد آفریدی نے کہا کہ بلاشبہ ڈیپارٹمنٹ کرکٹ کا بہت اہم کردار رہا رہا ہے لیکن کسی بھی سسٹم کو کامیابی یا ناکامی کے لیے وقت چاہیے ہوتا ہے۔
سابق کپتان نے کہا کہ سری لنکن پریمئر لیگ میں کھیلنا میرے لیے اعزاز ہوگا۔
انہوں نے مزید کہا کہ کرکٹ بہت ذیادہ فاسٹ ہو گئی ہے، نیشنل ٹی ٹوئنٹی کپ کے میچز دیکھے ہیں، پچز فاسٹ بولرز کےلیے مددگار نہیں ہیں،بلےباز سنچریاں بنا رہے ہیں ،انہیں کافی فائدہ ہو رہا ہے۔
شاہد آفریدی نے کہا کہ پچز میں تھوڑی تبدیلی بھی کرنی چاہیے تاکہ بولرز کو بھی مدد مل سکے۔
شاہد آفریدی پاکستان ڈس ایبلڈ کرکٹ ایسوسی ایشن کے چیئرمین بن گئے ہیں۔ شاہد آفریدی اعزازی طور پر پی ڈی سی اے کے چیئرمین کی حیثیت سے خدمات انجام دیں گے۔
اس حوالے سے شاہد آفریدی کا کہنا ہے کہ پاکستانی ڈس ایبلڈ کرکٹرز پاکستان کا نام دنیا بھر میں روشن کر رہے ہیں۔
انہوں نے کہا کہ ہم ڈس ایبلڈ کرکٹرز کی مدد کرنے کو تیار ہیں۔ڈس ایبلڈ لوگوں نے ان لوگوں کے لیے مثال قائم کی جو ہمت ہار جاتے ہیں۔ہماری فاونڈیشن ڈس ایبلڈ کرکٹرز کے ساتھ تعاون کرے گی۔
شاہد آفریدی نے سابق بھارتی کپتان ایم ایس دھونی کو سوشل میڈیا پر تنقید کا نشانہ بنائے جانے کی مذمت کرتے ہوئے کہا کہ لوگوں کو سوچنا چاہیے کہ دھونی نے بھارتی ٹیم کو کہاں سے کہاں سے پہنچایا ہے۔
