صدرِ پاکستان نے معروف تاجراور صنعتکار سراج قاسم تیلی کےانتقال پر اظہارِ افسوس کیا ہے۔
تفصیلات کے مطابق صدر مملکت ڈاکٹرعارف علوی نے سماجی رابطے کی ویب سائٹ ٹوئٹر پر اپنے پیغام میں دلی افسو س کا اظہار کر تے ہوئے لکھا کہ سراج قاسم تیلی کےانتقال پراللہ پاک ان کے اہل خانہ کو صبرعطا کرے۔
واضح رہےکہ ملک کے مشہور تاجر سراج قاسم دبئی میں طبیعت خراب ہونے پر 2روز سے اسپتال میں زیرعلاج تھے اور آج اچانک دل کا دورہ پڑنے سے انتقال کرگئے۔
سراج قاسم تیلی کو نمونیہ کے باعث وینٹی لیٹر پر منتقل کیا گیا تھا، مرحوم کے سوگواران میں اہلیہ، بیٹا اور بیٹی شامل ہیں۔
7 مئی 1953 کو کراچی میں پیدا ہونے والے سراج قاسم تیلی نے گورنمنٹ کالج آف کامرس اینڈ اکنامکس سے 1974 میں گریجویشن مکمل کیا تھا۔
سراج قاسم تیلی چیمبر آف کامرس اینڈ انڈسٹری (کے سی سی آئی) کے سابق چیئرمین تھے انہوں نے ملکی معاشی ترقی میں اہم کردار ادا کیا، سراج قاسم پاکستان بیوریج لمیٹڈ کے ڈائریکٹر بھی رہے ہیں۔
سراج قاسم تیلی کے انتقال پر وزیراعظم عمران خان نے بھی گہرے دکھ کا اظہار کیا اور اہل خانہ سے تعزیت کی۔
