کراچی: سندھ بھر میں آج سے تمام تعلیمی ادارے کھل گئے ، اسکولوں کو50 فیصد حاضری کے ساتھ کھولا گیا ہے،آل پرائیویٹ اسکول ایسوسی ایشن نے اسکول کھولنے پر سندھ حکومت کا شکریہ ادا کیا۔
۔
تفصیلات کے مطابق کراچی سمیت سندھ بھر میں تدریسی سرگرمیاں بحال ہو گئیں اور تمام تعلیمی ادارے ایس اوپیز کے تحت کھل گئے، اسکول دوبارہ کھلنے پر بچوں، والدین اور اساتذہ نے خوشی کا اظہار کیا، اسکولزکو50 فیصد حاضری کے ساتھ کھولا گیا ہے۔
آل پرائیویٹ اسکول ایسوسی ایشن کا کہنا ہے کہ بچوں کی تعلیم کئی ماہ ،سالوں سے متاثر تھی، اسکول کھولنے پر سندھ حکومت کے مشکور ہیں ، والدین کی ویکسینیشن پرسندھ حکومت سےتعاون کریں گے۔
سید طارق شاہ نے بتایا کہ اسکول ہفتہ میں 6روز دو گروپس کے ساتھ کھولے گئے ہیں، اسکول انتظامیہ ایس او پیز پر عملدرآمد کیلئے متحرک ہیں جبکہ بیشتر پرائیویٹ اسکول کےاساتذہ ،اسٹاف کی ویکسینیشن مکمل ہے۔
اسکول ایجوکیشن اینڈ لٹریسی ڈیپارٹمنٹ کی جانب سے تمام تعلیمی اداروں کے سربراہان کو ہدایت کی گئی ہے کہ وہ اپنے تدریسی اور غیر تدریسی عملے کی 100 فیصد ویکسینیشن کو یقینی بنائیں۔
دوسری جانب کراچی میں ڈائریکٹوریٹ آف پرائیویٹ انسٹی ٹیوشنز کی معائنہ ٹیمیں دورے پر روانہ ہوگئیں ہیں ، انسپکشن افسران کی سربراہی میں 6 ٹیمیں روانہ ہوئیں ، معائنہ ٹیمیں اسکولز میں ایس اوپیز کا عمل،سرٹیفیکٹس چیک کریں گی۔
وزیر تعلیم سندھ سردار شاہ بھی کچھ دیر بعد اسکولوں کا دورہ کریں گے، سردار شاہ لیاری کے مختلف علاقوں میں اسکولوں کا دورہ کریں گے۔
یاد رہے 23 اگست کو سندھ حکومت کی جانب سے مزید ایک ہفتے تعلیمی ادارے بند کرنے کے اعلان کے بعد نجی اسکولز کی نمائندہ تنظیموں کی جانب سے سندھ کے ہرشہرمیں مظاہرے کئے ، تاہم بعد ازاں سندھ حکومت نے 30 اگست سے تعلیمی ادارے کھولنے کا اعلان کیا تھا۔
