واشنگٹن: امریکا کرپٹو کرنسی بٹ کوائن کی مائننگ میں سب سے آگے نکل گیا ہے۔
غیرملکی خبررساں ادارے نے اپنی رپورٹ میں ایک تحقیق کا حوالہ دیتے ہوئے کہا ہے کہ امریکا بٹ کوائن کرنسی کی مائننگ میں چین کو پیچھے چھوڑتے ہوئے تمام ممالک سے آگے نکل گیا ہے۔
رپورٹ کے مطابق چین میں ڈیجیٹل کرنسی پر پابندی کے باعث امریکا آگے نکلا ہے۔ رواں سال اگست سے پہلے کے چار مہینوں میں امریکا کی مائننگ کے حوالے سے سرگرمیوں میں دگنا اضافہ ریکارڈ کیا گیا تھا جبکہ اگست کے آخر تک دنیا کی سب سے بڑی معیشت امریکا کے مارکیٹ شیئر میں 35.4 فیصد کا اضافہ ہوا۔
بٹ کوئن کی مائننگ میں امریکا کے بعد وسطی ایشیائی ملک قازقستان دوسرے نمبر پر جبکہ روس تیسری پوزیشن پر ریکارڈ کیا گیا ہے، روس میں ڈیجیٹل کرنسی کی مائننگ میں 18.1 فیصد جبکہ روس میں 11 فیصد اضافہ ہوا ہے۔
خیال رہے کہ بٹ کوائن کی کان کنی(مائننگ) کے لیے بجلی کی زیادہ مقدار سمیت مضبوط کمپیوٹرز کی ضرورت ہوتی ہے، کرپٹو کرنسی کی مائننگ سے عالمی بجلی کی پیداوار کا 0.45 فیصد استعمال ہوتا ہے۔
ماہرین کا کہنا ہے کہ چین کی جانب سے پابندی کے باعث کرپٹو کرنسی کی مائننگ میں عالمی سطح پر گراوٹ دیکھی گئی تھی تاہم اب پھر سے اس کی کان کنی کی جارہی ہے۔
خیال رہے کہ چین نے بٹ کوائن کو منی لانڈرنگ کے لیے آسان طریقہ قرار دیتے ہوئے جون میں پابندی عائد کی۔
