پیرس: فرانس کے وزیر اعظم ژاں کاسٹیکس کا کورونا ٹیسٹ مثبت آیا ہے جس کے بعد انھوں نے خود کو 10 دن کے لیے گھر پر قرنطینہ کرلیا۔
عالمی خبر رساں ادارے کے مطابق فرانس کے 56 سالہ وزیراعظم ژاں کاسٹیکس نے علامات ظاہر ہونے پر کورونا ٹیسٹ کرایا تھا جو مثبت آیا ہے۔ فرانسیسی وزیر اعظم نے چند ماہ قبل ہی کورونا ویکسین کا کورس مکمل کرایا تھا۔
کورونا ٹیسٹ مثبت آنے کے بعد فرانسیسی وزیر اعظم نے خود کو گھر پر 10 دن کے لیے قرنطینہ کرلیا تاہم وہ اس دوران آن لائن ہی امور مملکت چلاتے رہیں گے۔ ان کے اہل خانہ کا بھی ٹیسٹ کیا گیا اور ایک بیٹی کا ٹیسٹ مثبت آیا ہے۔
فرانس کے محکمہ صحت کی جانب سے ایک روز قبل جاری بیان میں کہا گیا تھا کہ کورونا کی چوتھی لہر فرانس میں بجلی کی رفتار سے پھیل رہی ہے اور پچھلے سات روز میں نئے کیسز کی شرح میں دگنا اضافہ ہوا ہے۔
خیال رہے کہ فرانس کے وزیراعظم نے گزشتہ روز بیلجیئم کے وزیر اعظم سے برسلز ملاقات کی تھی اس لیے بیلجیم کے وزیر اعظم بھی قرنطینہ میں چلے گئے۔
