ڈاکٹر شاہد رشیدبٹ
پاکستان کی معیشت اس وقت دو راہے پر کھڑی ہے۔ایک طرف تو پاکستان کی شرح نمو 5فیصد سے زائد ہے اور توقع کی جارہی ہے کہ معیشت اسی رفتار کے ساتھ رواں معاشی سال کے دوران ترقی کرتی رہے گی جو کہ پاکستان کے لیے ایک مثبت بات ہے لیکن دوسری طرف پاکستان کو ایک مرتبہ پھر 2017ء کی طرح بڑھتے ہوئے تجارتی اور کرنٹ اکا ؤنٹ خسارے کا سامنا ہے جو کہ پاکستان کے روپے پر دباؤ کا سبب بن رہا ہے۔اوپن ما رکیٹ میں امریکی ڈالر کی روپے کے مقابلے میں قدر 173سے تجاوز کر چکی ہے اور اس میں مزید اضافے کی توقع کی جا رہی ہے۔جتنا ڈالر مہنگا ہو گا اتنا ہی مہنگائی کی لہر میں شدت آئے گی۔پیٹرول،ڈیزل،بجلی اور گیس سمیت ہر چیز مہنگی ہو جائے گی جس کے نتیجے میں ٹرانسپورٹ اور اشیا خوردونوش سمیت ہربنیادی چیز کی قیمت بڑھے گی اور عوام پر بم بن کر گرے گی۔یہ حکومت کے لیے یقینا ایک ابتر صورتحال ہے حکومت ایک طرف مشکل سے حاصل کی گئی ایک بہتر شرح نمو جو کہ ملک میں روزگار کے نئے مواقع پیدا کرنے کے لیے ضروری ہے،کو کسی صورت کھونا نہیں چاہے گی دوسری جانب کسی بھی صورت میں حکومت کی خواہش نہیں ہو گی کہ کرنٹ اکاؤنٹ خسارہ اتنا بڑھ جائے کہ حکومت کو پھر سے آئی ایم ایف کے در پر ہاتھ جوڑ کر کھڑا ہو نا پڑ جائے۔
ہم تو اب ابھی 2019ء میں حاصل کیے گئے پہلے آئی ایم ایف پروگرام سے ہی نہیں نکل سکیں ہیں۔لیکن اس حوالے سے میں ابھی آگے چل کر بات کرتا ہوں۔وزیر خزانہ شوکت ترین نے ایک انٹر ویو میں بتایا ہے کہ حکومت کے اندازوں کے مطابق رواں مالی سال پاکستان کی برآمدات 40ارب ڈالر کے لگ بھگ رہنے کی توقع ہے جو کہ گزشتہ سال کی نسبت ایک بہت بڑا اضافہ ہو گا اور اگرہدف حاصل کر لیا جا تا ہے تو حکومت کی بڑی کامیابی بھی تصور ہو گی لیکن مسئلہ یہ درپیش ہے ملک کی نہایت ہی تیز رفتار سے بڑھتی ہو ئی درآمدات نے حکومت کو ہلا کر رکھ دیا اور اس حوالے سے حکومت کے تمام اندازے غلط ثابت ہو گئے ہیں۔حکومت کے اندازوں کے مطابق رواں مالی سال درآمدات کا ہدف 70ارب ڈالر رکھا گیا تھا،لیکن اب تازہ ترین اعداد و شمار کے مطابق رواں مالی سال پاکستان کی درآمدات ہو ش ربا اضافے کے ساتھ 75 ارب ڈالر تک رہ سکتی ہیں جو کہ بہت زیادہ ہیں۔حکومت نے غیر ضروری درآمدات جن میں گا ڑیوں سمیت کئی لگژری آئیٹم بھی شامل ہیں پر اضافی ڈیوٹی عائد کی ہے اور اس امید میں عائد کی ہے کہ اس ڈیوٹی سے ان کی درآمد میں کمی ہو گی،سٹیٹ بینک نے شرح سود میں بھی 0.25بیس پوائنٹس کا اضافہ کیا۔لیکن کچھ ماہرین کی جانب سے کہا جا رہا ہے کہ اس شرح میں مزید اضافہ کرنے کی ضرورت ہے کیونکہ اگر پاکستان کی شرح نمو 4.5فیصد تک بھی رہتی ہے تو ملک کے لیے بڑا مسئلہ نہیں ہو گا لیکن اگر پاکستان کا کرنٹ اکا ؤنٹ خسارہ بہت زیادہ ہو جاتا ہے تو اس کی فنانسنگ کرنا یقینا موجودہ عالمی حالات اور افغانستان کی صورتحال اور پاک امریکہ تعلقات کے تناظر میں جوئے شیر لانے سے کم نہ ہو گا۔پاکستان کو ابھی سے اس صورتحال سے بچنے کے لیے اقدامات کرنے کی ضرورت ہے اور اپنی برآمدات میں بڑے اضافے کی ضرورت ہے۔اگر کسی طرح رواں مالی سال تک پاکستان کی برآمدات 45ارب ڈالر تک چلی جا ئیں تو پاکستان کو زرمبادلہ کے مسئلے سے نجات مل سکتی ہے۔
میں نے وزیر خزانہ کے منہ سے ہی یہ بات بھی سنی کہ ڈالر کی قیمت بڑھنے کے حوالے سے یقینا بڑھتی ہو ئی درآمدات کا فیکٹر موجود ہے وہاں پر افغانستان کی صورتحال اور کچھ سٹے بازی کا عنصر بھی شامل ہے۔مجھے ان کی یہ بات سن کر بہت تعجب ہوا کہ اگر ملک کے وزیر خزانہ کو معلوم ہے کہ افغانستان میں پاکستان سے ڈالر کی سمگلنگ کی جارہی ہے تو اس حوالے سے کوئی پلان بنا کر بڑا کریک ڈاؤن کیوں شروع نہیں کیا جاتا؟ یہی باتیں کئی ماہرین کی جانب سے سامنے آرہی ہیں کہ چونکہ امریکہ نے افغانستان کے اسٹیٹ بینک کے 9.5ارب ڈالر کے زر مبا دلہ ذخائر منجمد کر دیے ہیں اس لیے اب افغانستان کی ضروریات پوری کرنے کے لیے پاکستان سے ڈالر افغانستان سمگل کیے جا رہے ہیں لیکن بات پھر وہیں آتی ہے کہ حکومت کو اس حوالے سے جامع پلان بنا کر کارروائی کرنے کی ضرورت ہے،پاکستان کے عوام کو مہنگائی کی دلدل میں جھونکنے کی اجازت نہیں دی جاسکتی ہے اور اس حوالے سے سنجیدہ اقدامات حکومت کی اولین ترجیح ہو نی چاہیے۔ایک تیسرا فیکٹر جس کا ذکر اثر ڈالر کی قیمت بڑھنے کے حوالے سے کیا جا رہا ہے وہ سٹے بازی ہے،بڑے بڑے سٹے باز افواہیں پھیلا کر ڈالر کی قیمت بڑھا رہے ہیں جبکہ وزیر خزانہ نے خود اپنے منہ سے کہا ہے کہ اس وقت پاکستان کے روپے کی قدر ڈالر کے مقابلے میں 165تک ہونی چاہیے اس سے زیادہ نہیں لیکن ہمیں معلوم ہی ہے کہ ڈالر کہاں تک چلا گیا ہے اور مسلسل بڑھتا چلا جا رہا ہے۔حکومت کو اس حوالے سے بھی سخت ایکشن لینے کی ضرورت ہے۔عالمی منڈی میں قیمتیں بڑھ گئی،اس لیے مہنگائی بڑھ گئی،درآمدات بڑھ گئیں ہیں اس لیے ڈالر مہنگا ہو گیا اور اس کی وجہ سے بھی مہنگائی بڑھ رہی ہے یہ باتیں زیادہ دیر تک عوام کو نہیں سنائی جاسکتی۔عوام حکومت کی جانب سے فوری ریلیف کے منتظر ہیں۔حکومت ڈالر کی قیمت کم کرے،اس کے لیے ایک مناسب حد تک شرح سود کیوں نہ بڑھانی پڑے وہ ضرور بڑھائے،عوام کو کھانے پینے کی اشیا ء پر سبسڈی دے اور درآمدات کے حجم پر بھی لگام ڈالی جائے،اگر رواں مالی سال پاکستان 65ارب ڈالر کی درآمدات بھی کرتا ہے تو کوئی حرج نہیں ہے لیکن ایک سال کے دوران 75ارب ڈالر کی درآمدات کسی صورت مناسب نہیں ہیں اور پاکستان کی معیشت ان کو ابھی افورڈ کرنے کی پوزیشن میں نہیں ہے۔
جہاں تک پاکستان کی برآمدات کا تعلق ہے تو اس حوالے سے 40ارب ڈالر کی برآمدات کا ہدف اچھا ہے اس کو ہر صورت حاصل کرنے کی ضرورت ہے،کیونکہ اس سے کم برآمدات کی صورت میں پاکستان کا تجارتی عدم توازن پاکستان کو ایک اور شدید ترین مالی بحران میں دھکیل سکتا ہے۔اس کے علاوہ میں حکومت اور آئی ایم ایف کے درمیان ہونے والے مذاکرات کے حوالے سے بھی کچھ بات کروں گا،ایک ارب ڈالر کی قسط کے لیے پاکستان کے آئی ایم ایف سے مذاکرات دوبارہ شروع ہو چکے ہیں۔ آئی ایم ایف حکومت سے بجلی،گیس،پیٹرول سمیت دیگر ٹیکسز میں اضافے کا مطالبہ کر رہا ہے،اگر حکومت نے ان میں سے آئی ایم ایف کے آدھے مطالبے بھی مان لیے تو پاکستان کے عوام کا تو اللہ ہی حافظ ہے حکومت کو عوام کے مفاد کا خیال کرتے ہوئے اس حوالے سے فیصلہ کرنے کی ضرورت ہے بصورت دیگر عوام کے لیے تو آنے والے دنوں میں معیشت کے میدان سے تو کوئی اچھی خبر نہیں ہے۔
(سابق صدر اسلام آباد چیمبر آف کامرس ہیں)
٭……٭……٭

ڈاکٹر خالد حمید
7اکتوبر کو دنیا بھر میں اہم ترین فصل کپاس کا عا لمی دن منایا جاتا ہے۔ اس عالمی دن کو منانے کا مقصد کپاس کی پیداوار اور ٹریڈ کو بڑھانے کیلئے اسٹیک ہولڈر کے مابین ہم آہنگی اور اشتراکِ عمل کو مربوط بنانا ہے، خصوصاً ترقی یافتہ ممالک میں کپاس کی پیداوار میں ترقی و استحکام کیلئے ٹریڈرز اور کسانوں کے مابین معاونت کو بہتر بنانا، کپاس کی پیداوار کو بڑھانے کی موئثر حکمت عملی کے تحت سرمایہ کاروں اور صنعت کاروں کو کپاس کے کاشتکاروں کی بھر پور سر پرستی کرنے کی ترغیب دینا اور باہمی کاوشوں سے کپاس پر جدید زرعی تحقیق و کار آمد نئی ٹیکنالوجیز کی دریافت کے عمل کو تیز کر کے کپاس کی پیداوار میں خاطر خواہ اضافہ کو ممکن بنانا ہے۔
کپاس بہت سے دیگر ممالک کی طرح پاکستان کی معیشت میں بھی مرکزی اہمیت کی حامل فصل ہے۔ پاکستان اس وقت کپاس کی مصنوعات برآمد کر کے تقریباً 60 فیصدتک زرِ مبادلہ کما رہا ہے ملک کی 43فیصد افرادی قوت کپاس کی کاشت تا چنائی اور کپاس کی جننگ، ٹیکسٹائل، بنولے سے خوردنی تیل اور صابن سازی کی صنعتوں سے منسلک ہے۔
کپاس کی پیداوار اور ٹیکسٹائل مصنوعات کی برآمدات میں دو دہائیوں قبل پاکستان نے دنیا میں تیسرے نمبر پر آنے کا اعزاز حاصل کیا تھا۔ یہ امر قابلِ ذکر ہے کہ کپاس کی ایک بھی گانٹھ نہ اگانے والا بنگلہ دیش اس وقت ٹیکسٹائل مصنوعات کی برآمدات میں دنیا میں تیسرے نمبر پر اور چند برسوں قبل پاکستان سے کپاس کی پیداوار میں پیچھے رہنے والا ملک بھارت کپاس کی پیداوار میں ہم سے چار گنا اضا فہ کرکے اس وقت ٹیکسٹائل کی مصنوعات برآمد کرنے والا دنیا کا پہلا بڑا ملک بن چکا ہے۔
پاکستان 1990 کی ابتداء میں ایک کروڑ 44لاکھ گانٹھ کپاس کی پیداوار کے ساتھ دنیا میں تیسرے نمبر پر آنے کا افتخار حاصل کر لیا تھا مگر لمحہ فکریہ ہے کہ اسکے بعد بتدریج ہماری کپاس کی پیداوار میں پتہ مروڑ وائرس، کیڑوں کے شدید حملہ اور تیز تر موسمیاتی تبدیلیوں کے مضر اثرات کے باعث مسلسل کمی واقع ہونا شروع ہوئی جس سے نہ صرف ہماری معیشت بُری طرح متاثر ہوئی بلکہ پیداوار میں کمی کے باعث ٹیکسٹائل مصنوعات کی برآمدات کم ہونے کے سبب زرمبادلہ کے حصول میں بھی شدید کمی واقع ہوئی جبکہ بہت سے ٹیکسٹائل یونٹس کی بندش اور بنگلہ دیش منتقلی سے ملک میں بڑے پیمانے پر بے روزگاری میں بھی تیزی سے اضافہ ہوا۔
پاکستان میں کپاس کی پیداوار کو عالمی دن کے بالاتر تقاضوں پر عمل درآمد کرتے ہوئے سنبھالا دینے کیلئے کیا اقدامات ضروری ہیں اس بارے میں زرعی ماہرین کسان رہنماؤں اور ٹیکسٹائل انڈسٹری کے دیگر اسٹیک ہولڈرز نے بڑی اہم سفارشات دی ہیں۔
زرعی رہنماؤں کا کہنا ہے کہ گزشتہ 22-23 سال سے کپاس کی بربادی پر قابو پانے کیلئے موئثر زرعی تحقیق و ٹیکنالوجی کی دریافت میں خاطر خواہ پیش رفت نہ ہونے، تیز تر موسمیاتی تبدیلیوں کے مضر اثرات سے بچاؤ کی موئثر ٹیکنالوجی و بیجوں کی ان اثرات کے خلاف قوتِ مدافعت پر مبنی اقسام کی عدم دستیابی، کپاس کے ناقص بیجوں کا کاروبار کرنے والے مافیا پر قابو پانے میں ناکامی، بی ٹی اقسام کیلئے وافر پانی کی عدم دستیابی، کپاس کے کسانوں کو طوفانی بارشوں، سیلاب، وبائی امراض اور کیڑوں و ٹڈی دل کے شدید حملہ سے ہونے والے نقصانات کا اعلانات کے باوجود آج تک کبھی کوئی ازالہ نہیں کیا گیا اور اس پر ستم یہ کہ متعدد پیسٹی سائیڈز اسپرے، مہنگی کھادیں، ناقص مہنگے بیجوں، ٹیوب ویلوں پر بجلی کے اخراجات میں بے تحاشا اضافہ کی وجہ سے کپاس کے کسانوں کی پیداواری لاگت بہت زیادہ بڑھ چکی ہے جس کے مقابلہ میں ملنے والا معاوضہ بہت کم ہونے کی وجہ کپاس کسان کیلئے خسارے کا سودا بن گئی ہے۔
کسان رہنماؤں نے کہا کہ حالیہ حکومت کے ایمرجنسی زرعی پروگرام میں کپاس کی صورتحال بہتر بنانے کی حکمت عملی کا کوئی ذکر نہیں۔ اِکا دُکا حکومتی اعلانات پر عمل درآمد نہ ہونے کے برابر ہے نتیجتاً کپاس کے کسان اور معیشت میں ریڑھ کی ہڈی کا مقام رکھنے والی اس فصل کا کوئی پُرسان حال نہیں۔ کسان رہنماؤں نے کہا کہ موجودہ وفاقی وزیر برائے فوڈ سیکیورٹی و ریسرچ سید فخر امام اور صوبائی وزیر زراعت سید حسین جہانیاں گردیزی چونکہ خود کپاس کے ترقی پسند کسان ہیں لہٰذا امید بندھی ہے کہ وہ تمام فصلوں بالخصوص کپاس کے کسانوں کی بدحالی کو خوشحالی میں بدلنے کیلئے خصوصی اقدامات کریں گے۔
میری دانست میں کپاس کی پیداوار کو سنبھالا دینے کیلئے ہمیں تیز تر موسمیاتی تبدیلیوں کے خلاف مدافعت رکھنے والے بیج اور موئثر ٹیکنالوجی کو زرعی تحقیق میں اولیت دینا چاہئے۔ بلاشبہ موسمیاتی تبدیلیوں کے مضر اثرات سے بچاؤ اور ویلیو ایڈڈ کپاس اگانے والے کسانوں کو خصوصی مراعات دینا ہونگی۔ ہمیں کپاس کی زیادہ پیداوار کیلئے عظیم دوست ملک چین اور مسلم برادر ملک ترکی کے علاوہ مصر و برازیل سے نئی ٹیکنالوجی کی مدد لینا چاہئے ہمیں دنیا میں کپاس کی بہترین پیداوار لینے والے ممالک سے جدید ٹیکنالوجی ملک میں لانے والے اداروں اور کپاس کے ٹرپل و ڈبل جین بی ٹی بیجوں کی ڈویلپمنٹ میں کامیابی حاصل کرنے والوں کی حوصلہ افزائی کرتے ہوئے ان کی ٹیکنالوجی کو روایتی طریقوں کی بجائے فاسٹ ٹریک پر منظور کرنا ہو گا۔ ہمیں کپاس کی قبل از وقت بوائی کے نقصانات سے کسان کو آگاہ کر کے اسے صحت مند اورتوانا فصل کی بوائی سے صاف چنائی تک خصوصی عملی تربیت کا موئثر اہتمام کرنا ہوگا۔
ہمیں ناقص بیج بیچنے والے مافیا پر قابو پانے اور تصدیق شدہ بیج کے ساتھ تمام فصلوں کی کاشت پر اپنے کسانوں کو راغب کرنا ہوگا۔ انہوں نے کہا کہ اس وقت تصدیق شدہ کا 20تا22فیصد استعمال فی ایکڑ پیداوار میں کمی کا بڑا سبب ہے۔
ہمیں آبپاشی کے لئے وافر پانی کی دستیابی یقینی بنانے کیلئے بڑے چھوٹے ڈیمز کی جنگی بنیادوں پر تعمیر کرنا ہو گی۔ ہمیں کپاس کے کسانوں کو معقول معاوضہ دلانے کا موئثر نظام اور طوفانی بارشوں،سیلابوں، کیڑے و بیماری کے وبائی عوارض اور ٹڈی دل جیسے مہلک عذاب سے متاثرہ کسانوں کی زرعی انشورنس اور زرعی مداخل کی سبسڈی کو پیداوار کے معاوضہ سے منسلک کرنا ہو گا۔
میں کپاس کے کسانوں کو یہ خوشخبری سنانا چاہتا ہوں کہ تارا گروپ نے موسمیاتی تبدیلیوں کے خلاف مدافعت رکھنے والی انقلابی ٹیکنالوجی اور کپاس کے ٹرپل و ڈبل جین بی ٹی بیجوں کی دریافت میں کامیابی حاصل کرلی ہے جو کسانوں کی پیداواری لاگت کم کرنے اور معیاری پیداوار میں خاطر خواہ اضافہ کرنے کا انقلاب برپا کر کے کپاس کے کسان کو خوشحالی دلائے گی۔
تارا گروپ کی مثالی زرعی تحقیق سے کپاس کے ان انقلابی بیجوں کی فصل کا گزشتہ دنوں وفاقی وزیر جناب سید فخر امام اور صوبائی وزیر جناب سید حسین جہانیاں گردیزی نے تارا ریسرچ فارمز لودھراں پر معائنہ کیااور انتہائی صحت مند اور بھر پور فصل اور تارا گروپ کی زرعی تحقیق کو مثالی کاوش قرار دیا جو کپاس کی بحالی و ترقی میں اہم کردار ادا کرے گی۔
میرے خیال میں کپاس کی پیداوار میں عالمی دن کے تقاضوں پر زیادہ سے زیادہ اضافہ کو یقینی بنانے کیلئے حکومت کو ترقی پسند کسانوں، زرعی ماہرین، زرعی مداخل کی انڈسٹریز، جننگ و ٹیکسٹائل انڈسٹری کے تمام اسٹیک ہولڈرز کی مشاورت سے جلد موئثر حکمتِ عملی وضح کرنے کا اقدام کرنا ہو گا۔حکومت فی الفور کسانوں کو کپاس کی امدادی قیمت میں مزید اضافے کا اعلان کرے تو کاشتکار کا حوصلہ کافی بڑھے گا۔
حالیہ اطلاعات کے مطابق بے حد موافق موسمی حالات اور کیڑے و بیماری کے حملہ میں کمی کے سبب کپاس کی فی ایکڑ پیداوار میں اس مرتبہ خاطر خواہ اضافے کا امکان ہے ماہرین کے محتاط اندازے کے مطابق اس مرتبہ ایک کروڑ گانٹھ تک کی پیداوار متوقع ہے دُعا ہے کہ کپاس کی پیداوار میں ان اندازوں کے مطابق اضافہ ملک اور کسان کی خوشحالی کو وسیلہ بنے گا۔
(کالم نویس معروف زرعی ماہراور امورِ زراعت و خوراک پر تجزیاتی کالم لکھتے ہیں)

کنور محمد دلشاد
روزنامہ خبریں کی 29ویں سالگرہ قومی صحافت کا درخشاں باب ہے۔ خبریں اخبار کی اشاعت 29ستمبر 1992ء سے آغاز ہوا۔ ضیا شاہد نے اپنی صحافت کا آغاز کالم نویس ہفت روزہ اقدام لاہور سے شروع کیا‘ ہفت روزہ ”اقدام“ ملک کے ممتاز صحافی ”م۔ش“ کی ادارت میں شائع ہوتا تھا جس کی اشاعت کا دائرہ کار لاہور سے کوئٹہ تک پھیلا ہوا تھا‘ ہفت روزہ اقدام جناب ممتاز احمد خان کے پرنٹنگ پریس سے باقاعدگی سے شائع ہوتا رہا‘ اسی طرح ضیا شاہد نے بطور سب ایڈیٹر روزنامہ ”کوہستان“ میں نسیم حجازی سے تربیت حاصل کی۔ بعدازاں روزنامہ ”حالات“ اردو ڈائجسٹ لاہور اور پھر ہفت روزنامہ کہانی‘ ایڈیٹر روزنامہ مغربی پاکستان لاہور‘ ایڈیٹر ہفت روزہ ”صحافت“ ایڈیٹر روزنامہ نوائے وقت‘ روزنامہ جنگ اور اپنے صحافتی سفر کے آخر میں چیف ایڈیٹر روزنامہ پاکستان رہے اور قدرت کے نظام کے مختلف طریقے ہوتے ہیں اور بطور چیف ایڈیٹر روزنامہ پاکستان کے ان کے اختلافات بھٹی برادران سے ہوگئے اور یہاں پر جناب ضیا شاہد نے اپنا روزنامہ نکانے کا مصمم ارادہ کیا۔ ضیا شاہد سے تعلق کا آغاز ہفت روزہ ”کہانی“ سے ہوا تھا اور غالباً 1969ء میں انہوں نے اپنے ڈپٹی ایڈیٹر گلزار آفاقی کے ذریعے میرے تاریخی انٹرویو شائع کیے جس سے ہفت روزہ ”کہانی“ کی اشاعت میں خاطر خواہ اضافہ ہوا۔
روزنامہ خبریں کی ابتدائی تیاری 1991ء کے آخر میں شروع ہوئی اور ان کا تجربہ کامیاب رہا۔ضیا شاہد نے دوستوں اور مخلص ساتھیوں کے تعاون سے ایک کمپنی بنائی اور اس کے حصص فروخت کیے اور اٹھارہ ڈائریکٹرز کا تعین کیا‘ مجھے بھی ضیا شاہد نے کمپنی کے حصص خریدنے کی ترغیب دی تھی چونکہ سرکاری ملازمت کی وجہ سے میں نے ان کی پیشکش کا شکریہ ادا کیا لیکن کوئٹہ سے چند مخلص دوستوں کا تعارف میں نے فصیح اقبال چیف ایڈیٹر زمانہ کے ذریعے کروایا تھا اس طرح روزنامہ خبریں کا آغاز 29ستمبر 1992ء کو ہوا تاہم ضیا شاہد کی ہمت اور قوت کے باعث ”جہاں ظلم وہاں خبریں“ کے انقلابی ماٹو نے اس اخبار کو سہارا دیا اور آج تک یہ اخبار مظلوم کا ساتھی اور ظالم کا دشمن ہے۔ لاہور کے بعد اسلام آباد‘ ملتان‘ سکھر‘ حیدرآباد‘ کراچی‘ پشاور‘ مظفرآباد‘ آزادکشمیر سے خبریں شائع ہوا اور اب ان کے قابل ترین صاحبزادے امتنان شاہد کی زیر نگرانی یکم اکتوبر سے روزنامہ خبریں کا اجراء بہاولپور سے کردیا ہے۔ امتنان شاہد نے الگ کمپنی کے تحت چینل۵ ٹیلی ویژن کا آغاز کیا۔ روزنامہ خبریں نے صحافت کو خدمت خلق کا ذریعہ سمجھا اور اب بھی روزنامہ خبریں مظلوم کی آواز ہے۔
ضیا شاہد کی خواہش پر میں نے ان کی ملاقات سابق صدر فیلڈ مارشل محمد ایوب خان سے 1971ء کے آغاز میں کروائی تھی۔ فیلڈ مارشل ایوب خان نے میری یقین دہانی پر کہ یہ ملاقات آف دی ریکارڈ ہوگی اور ان کے خیالات وتاثرات کو افشا نہیں کیا جائے گا۔ لہٰذا سابق صدر ایوب خان سے ان کی ملاقات تین گھنٹے تک رہی اور وعدے کے مطابق ضیا شاہد نے 35سال بعد اس تاریخی ملاقات کا احوال بڑی تفصیل سے روزنامہ خبریں میں شائع کیا اور سابق صدر ایوب خان کی ملاقات میں میرا حوالہ بڑی تفصیل سے دیا۔
ضیا شاہد نے ہی عمران خان کی خواہش پر تحریک انصاف کی بنیاد رکھی اور ان کے گھر میں ہی تحریک انصاف کا منشور‘ آئین اور خدوخال طے ہوئے اور ان کے قریبی ساتھی حسن نثار اس امر کے گواہ ہیں‘ ضیا شاہد کے عمران خان سے قریبی تعلق رہا اور ان کے نظریاتی افکار کا روشناس کرانے میں ان کی معاونت کی‘ تحریک انصاف کے اقتدار میں آنے کے بعد ضیا شاہد نے ان سے فاصلہ ہی رکھا۔ روزنامہ خبریں سیاسی واقعات‘ ظلم اور جبر کی تاریخ ہے جس کا مطالعہ پاکستانی سیاست اور صحافت کے طالب علم کیلئے ضروری ہے۔ روزنامہ خبریں کو امتنان شاہد نے صحافت میں اعلیٰ مقام دیا ہے اور آج بھی روزنامہ خبریں ملک کے کونے کونے کی آواز ہے۔ حکومت اور پریس کا رشتہ بہت نازک اور پرلطف ہوتا ہے۔ حکومت اب اس پوزیشن میں نظر نہیں آتی کہ وہ اخبارات کو دبائے‘ آنے والے دنوں میں حکومتی دباؤ ختم ہوگا اور اخبار پر عوام کا تو کل مضبوط ہوگا۔
(الیکشن کمیشن آف پاکستان کے سابق سیکرٹری ہیں)
٭……٭……٭

سید سجاد حسین بخاری
میاں نوازشریف اور شہبازشریف نے اپنے پورے سیاسی کیریئر میں کبھی بھی جنوبی پنجاب میں ایک دن سے زیادہ قیام نہیں کیا۔ یہ پہلا موقع ہے کہ حمزہ شہبازشریف نے ملتان میں چار روز قیام کیا اور خانیوال‘ملتان‘ لودھراں‘ اوچشریف‘ بہاولپور‘ مظفرگڑھ‘ کوٹ مٹھن اور راجن پور میں ورکرز کنونشن کئے اور قریبی کارکنان کے مرنے والوں کی فاتح خوانی بھی کی اور مسلم لیگ ن میں کچھ بااثر لوگوں کو شامل بھی کیا۔ میڈیا کے لوگوں سے بھی ناشتے کی میز پر ایک طویل ملاقات کی اور سوالوں کے جواب بھی دیئے۔ اسی طرح یہ چار روزہ دورہ مکمل کرکے وہ لاہور واپس چلے گئے۔ لیکن یہاں ایک بنیادی سوال یہ ہے کہ جو کام بڑے میاں صاحبان نے اپنی پوری سیاسی زندگی میں نہیں کیا وہ حمزہ کو کرنے کی ضرورت کیوں پیش آئی؟ اس کے دو ہی آسان جواب ہیں کہ اول 2018ء میں مسلم لیگ ن جنوبی پنجاب میں الیکشن بری طرح ہاری ہے اور ن لیگ 2023ء کے الیکشن کیلئے ہوم ورک کررہی ہے اور دوئم یہ کہ بلاول بھٹو زرداری نے گزشتہ ماہ دس روزہ دورہ جنوبی پنجاب کیا اس کے اثرات کو زائل کرنے کی کوشش ہے۔ بہرحال اس دورے کی خوبصورت بات یہ تھی کہ یہ دورہ سوفیصد بلاول بھٹو زرداری کے دورہ کی نقل تھی۔ بلاول بھٹو کارکنوں کے گھر گئے تو حمزہ بھی گئے۔ بلاول بھٹو کے مختلف شہروں میں جانے سے قبل چھوٹے بڑے قصبوں اور سڑکوں پر استقبال کرائے گئے۔ شہروں کے اندر ورکرز کنونشن کرائے گئے۔ نئے لوگوں سے ملاقاتیں اور پارٹی میں ان کی شمولیت کرائی۔ میڈیا کو بھی بلاول بھٹو نے ظہرانے پر بلایا تو حمزہ نے پہلی مرتبہ میڈیا کو ناشتے کی میز پر بلایا ورنہ ماضی میں شریف برادران کا اپنی جیب سے میڈیا کیلئے لنچ ڈنر یا ناشتے کا کوئی ریکارڈ نہیں ہے اور پھر اس پورے دورے کے دوران میاں شہبازشریف کی نگرانی حمزہ کے شامل حال رہی۔ روزانہ کی بنیاد پر مکمل رپورٹ اور نئے شامل ہونے والے سیاستدانوں سے دو سے تین مرتبہ فون پر وہ گفتگو کرتے رہے ان کے تحفظات پر بات اور مستقبل میں ٹکٹ کی یقین دہانی بھی کراتے رہے۔
شمولیت کی پہلی دعوت اویس لغاری اور عبدالرحمن کانجو دیتے اور اپنے موبائل سے شامل ہونے والے کی بات میاں شہبازشریف سے کراتے رہے اور یہ سلسلہ دو سے تین مرتبہ ہوتارہا۔ کچھ شامل ہونے والوں نے کہا کہ ہم آپ کی آمد پر شمولیت کا اعلان کریں گے مگر میاں شہبازشریف نے کہا کہ آپ شمولیت ابھی کریں اور میرا آپ سے وعدہ ہے کہ میں آپ کے گھر ضرور حاضر ہوں گا تب جاکر شمولیت ہوتی۔ سیاسی شخصیات کی اگر شمولیت کا موازنہ کیاجائے تو پیپلزپارٹی کا پلہ بھاری ہے کیونکہ سردار ذوالفقار علی خان کھوسہ کے بیٹے دوست محمد کھوسہ سابق وزیراعلیٰ پنجاب‘ سردار بہادرخان سیہڑ‘خواجہ عطاء اللہ کا وزن ملک اسحاق بُچہ‘بریگیڈیئر قیصرعلی‘ قسور لنگڑیال اور جہانزیب وارن سے کہیں زیادہ ہے۔ پیپلزپارٹی نے مسلم لیگ ن اور تحریک انصاف کی بڑی وکٹیں اڑائی تھیں جبکہ مسلم لیگ ن میں آدھے سے زیادہ شخصیات تو واپس آئی ہیں۔ اس کے علاوہ جو ورکرز کنونشن ملتان میں کیا گیا ہے وہ بچوں کے سکول کا ایک گراؤنڈ تھا اس کی کرسیاں بھی دو تہائی تک خالی پڑی تھیں۔ اخبارات میں تصویریں بھی موجود ہیں۔ دورے کی آخری اور خاص بات یہ تھی کہ مفاہمتی اور مزاحمتی گروپ واضح نظر آرہے تھے مریم نواز کے حامیوں میں پرانے لیگی رہنما جاوید ہاشمی‘ طارق رشید‘ وحید ارائیں‘ حاجی احسان الدین‘ عامرسعید انصاری‘ رانا محمودالحسن‘ بلال بٹ وغیرہ اور حمزہ شہبازشریف گروپ کی قیادت موجودہ تنظیمی عہدیدار اویس لغاری‘ عبدالرحمن کانجو اور جاوید علی شاہ تھے۔ جنوبی پنجاب کے عہدیداروں پر بھی پرانے مسلم لیگی عہدیداروں کو شدید اعتراضات ہیں۔ دوسری بات یہ ہے کہ دونوں دھڑوں کے لیڈروں کی تعداد تو ہرکنونشن میں پوری نظر آئی مگر عوام کو اکٹھا نہیں کیا ورنہ جو ورکرز کنونشن کئے گئے ہیں وہ تو ایک یوسی چیئرمین کے برابر تھے ہاں البتہ بڑی خوبصورتی سے ذاتی گارڈوں‘ عہدیداروں‘ ٹکٹ ہولڈروں اور مقامی قیادت حمزہ شہباز کے آگے ایسے جمع ہوتی تھی کہ لگتا تھا بڑا رش ہے اور وہ اس خوش خیالی میں رہا کہ وہاں بڑا رش اور مجمع تھا۔
اس چار روزہ دورے نے مقامی قیادت کے دلوں میں مزید دراڑیں ڈال دی ہیں کیونکہ پینا فلیکس اور ہورڈنگز پر متعدد ٹکٹ ہولڈروں اور عہدیداروں کی تصویروں کی بجائے ان لوگوں کی تصویریں تھیں جو مسلم لیگ ن کا حصہ نہیں تھے بعد میں پتہ چلا کہ یہ ہورڈنگز کے اخراجات برداشت کرنے والے نودولتی ہیں۔ ایک کارکن نے بتایا کہ ہرصوبائی ٹکٹ ہولڈر سے 50ہزار اور قومی اسمبلی کے ٹکٹ ہولڈرز سے ایک لاکھ روپے جو اکٹھے کئے گئے تھے وہ کہاں خرچ ہوئے؟بہرحال حمزہ شہبازشریف کا دورہ جنوبی پنجاب پیپلزپارٹی کو جواب دینے کیلئے ضروری تھا مگر جو نقل ماری گئی اس میں عقل کا استعمال نہیں کیاگیا اور یہ بات ایک بزرگ سیاستدان کی سچ ثابت ہوئی کہ شریف برادران سیاست عقل کے راستے کی بجائے معدے کے راستے کرتے ہیں۔ جہاں تک حمزہ کے بلاول کے دورے سے موازنے کی بات ہے تو میں پوری ایمانداری اور غیرجانبداری سے عرض کررہا ہوں کہ بلاول کا مقابلہ حمزہ سے کرنا سراسر زیادتی ہے۔ بلاول شہید بی بی کا بیٹا اور شہید بھٹو کا نواسہ ہے جبکہ حمزہ تو مریم نواز سے بھی چھوٹا لیڈر ہے اور پارٹی میں تیسرے درجے کی قیادت پر ہے وہ بلاول کا مقابلہ کیسے کرسکتا ہے جبکہ بلاول بھٹو کا لیول نوازشریف کے برابر کا ہے۔ بات عمر کی نہیں، بات سیاسی جماعت اور خاندانی پس منظر کی ہورہی ہے۔ زرداری نے اپنی زندگی میں بلاول بھٹو کو اپنے سے بڑا لیڈر بنادیا ہے۔ حمزہ کو تو مریم نواز لیڈرہی نہیں مانتی۔ یہ الگ بات ہے کہ ہر والد کی طرح شہبازشریف کی خواہش اور حسرت ضرور ہے کہ حمزہ پاکستان مسلم لیگ ن کا بڑا لیڈر بنے مگر مریم نواز نے تو اپنے چچا کو الگ کردیا ہے، حمزہ تو دور کی بات ہے۔ بہرحال پی پی کی طرح ن لیگ بھی جنوبی پنجاب میں مزید کام کرنا چاہتی ہے کیونکہ ان سب کو پتہ چل چکا ہے جس کا ملتان مضبوط ہوگا اسی کا لاہور اور اسلام آباد مضبوط بنے گا۔
(کالم نگارقومی امورپرلکھتے ہیں)
٭……٭……٭