الیکشن کمیشن آف پاکستان (ای سی پی) نے پاکستان تحریک انصاف (پی ٹی آئی) غیرملکی فنڈنگ کیس سماعت کیلئے مقرر کرنے کا فیصلہ کرلیا۔

ذرائع کے مطابق غیرملکی فنڈنگ کیس 4 جنوری کو سماعت کیلئے مقرر کیا گیا ہے اور الیکشن کمیشن نے کیس میں فریقین کو نوٹسز جاری کردیے ہیں۔

ذرائع کا کہنا ہے کہ پی ٹی آئی اور درخواست گزار اکبر ایس بابر کو نوٹس جاری کیے گئے ہیں۔

ذرائع کے مطابق الیکشن کمیشن سماعت کے دوران اسکروٹنی کمیٹی کی رپورٹ فریقین کے سامنے رکھے گا۔

خیال رہے کہ گزشتہ دنوں پی ٹی آئی ممنوعہ فنڈنگ کی تحقیقات کے معاملے پر اسکروٹنی کمیٹی نے اپنی رپورٹ الیکشن کمیشن میں جمع کرائی تھی۔

الیکشن کمیشن کی اسکروٹنی کمیٹی نے 2018 میں پی ٹی آئی ممنوعہ فنڈنگ کی تحقیقات کا آغاز کیا تھا۔

واضح رہے کہ درخواست گزار اکبر ایس بابر نے پی ٹی آئی کی 2 ارب سے زائد ممنوعہ فنڈنگ کی نشاندہی کی تھی۔

الیکشن کمیشن آف پاکستان نے بلدیاتی انتخابات کی حلقہ بندیوں کا نوٹی فکیشن جاری کردیا۔

پنجاب میں بلدیاتی انتخابات کے لیے الیکشن کمیشن متحرک ہوگئی اور بلدیاتی انتخابات کی حلقہ بندیوں کا نوٹی فکیشن جاری کردیا۔

الیکشن کمیشن کا کہنا ہے کہ پنجاب میں 22 مارچ 2022 تک حتمی حلقہ بندیوں کی فہرست جاری کردی جائے گی۔

الیکشن کمیشن کے مطابق ابتدائی حلقہ بندیوں کو عمل 11 جنوری سے لیکر 9 فروری تک جاری رہے گا، ووٹرز 11 فروری سے 25 فروری تک حلقہ بندیوں پر اعتراضات دائر کرسکتے ہیں۔

الیکشن کمیشن کا کہنا ہے کہ حلقہ بندیوں پر دائر اعتراضات پر متعلقہ حکام 12 مارچ تک فیصلے سنائیں گے۔

یاد رہے  اسپیکر پنجاب اسمبلی چوہدری پرویز الہیٰ کی زیرصدارت آج پنجاب اسمبلی کے اجلاس میں خواتین کے تحفظ کا ترمیمی بل اور پناہ گاہ اتھارٹی بل 2021 کثرت رائے سے منظور کر لیا گیا۔

چوہدری پرویز الٰہی نے کہا کہ اپوزیشن کی جانب سے اچھی تجویز آئی ہے ، پہلے بھی ہم نے متفقہ طور پر قانون سازی کی ہے جو کہ اچھا عمل ہے اب بھی ہم یہی چاہتے ہیں کہ بلدیاتی اداروں کے حوالے سے متفقہ طور پر فیصلہ ہو۔

صوبائی وزیر بلدیات میاں محمود الرشید نے کہا کہ پنجاب کے عوام کی بہتری کے لیے اپوزیشن اگر اس میں حصہ لینا چاہتی ہے تو حکومت ویلکم کرے گی ، موجودہ حکومت جو بلدیاتی نظام لا رہی ہے وہ ماضی کے مقابلے میں بہت بہتر ہوگا ، آئین کے تحت تمام اختیارات بلدیاتی اداروں کے سربراہوں کے پاس ہوں گے۔

انہوں نے کہا کہ یہ تاریخ میں پہلی مرتبہ ہونے جارہا ہے کہ لاہور کے شہری پہلی مرتبہ اپنے مئیر کا انتخاب کریں گے ، لوگوں کے مسائل گراس روٹ لیول تک حل ہوں گے ، جو بھی اس بل کے حوالے سے اس کمیٹی میں شامل ہونا چاہیے وہ آجائیں۔

چوہدری پرویز الہیٰ نے کہا کہ حکومت کو کوئی اعتراض نہیں یہ اچھی تجویز ہے ، اس کمیٹی میں اپوزیشن نام دے ہم اس کو ایکسٹنڈ کر دیتے ہیں۔

واضح رہے کہ اسپیکر چوہدری پرویز الٰہی نے قائمہ کمیٹی برائے بلدیات میں توسیع کر دی ہے ، بلدیاتی بل پر تمام اسٹیک ہولڈرز کی کمیٹی میں رائے لی جائے گی۔

ایشیائی ترقیاتی بینک (اے ڈی بی) کی معاونت سے پاکستان کودسمبرکے مہینے  میں کورونا ویکسین کی 15 ملین مزیدخوراکیں پاکستان پہنچ گئیں۔

اے ڈی بی کی جانب سے جاری کردہ اعلامیے کے مطابق    ایشیائی ترقیاتی بنک کی معاونت سے کورونا ویکسینز کی 15 ملین مزید خوراکیں پاکستان پہنچ  گئی ہیں۔

 اعلامیے میں  کہا گیا ہے کہ   اے ڈی بی کورونا ویکسین کی خریداری  کے لیے پاکستان  کی 5 سو ملین ڈالر کی امداد کر رہا ہے جس سے  3 کروڑ 5 لاکھ افراد  کے لیے ویکسین کی خریداری عمل میں لائی جا رہی ہے۔

یاد رہے کہ 24 دسمبر کو ای ڈے بی کی جانب سے توانائی کے شعبے کی بہتری اور استحکام کے لیے 30 کروڑ ڈالرز قرض موصول ہوا تھا۔

وزارت خزانہ نے ملکی معیشت پر ماہانہ اپ ڈیٹ آؤٹ لک رپورٹ جاری کردی ہے جس میں مہنگائی میں اضافے کی تصدیق کی گئی ہے۔

رپورٹ کے مطابق رواں مالی سال کے ابتدائی 5 ماہ کے دوران ترسیلات زر، نان ٹیکس آمدنی اور براہ غیر ملکی سرمایہ کاری میں کمی ریکارڈ کی گئی۔

22-2021 کے پہلے 5 ماہ کے دوران برآمدات، درآمدات، ایف بی آر محصولات اور بڑی صنعتوں کی پیداوار میں اضافے کا رجحان دیکھا گیا۔

وزارت خزانہ کے اعداد و شمار کے مطابق رواں مالی سال کے پہلے 5 ماہ کے دوران ترسیلات زر 9.6 فیصد اضافے سے 12.9 ارب ڈالر ریکارڈکی گئیں-

اسی دورانیے میں ملکی برآمدات 28.9 فیصد اضافے سے 12.3 ارب ڈالر کی سطح تک پہنچ گئیں-

دوسری جانب  رواں مالی سال کے پہلے 5 ماہ میں ملکی درآمدات 64.4 فیصد اضافے سے 29.9 ارب ڈالر کی سطح تک پہنچ گئیں۔

وزارت خزانہ کی رپورٹ کے مطابق کرنٹ اکاؤ نٹ خسارے میں 7.1 ارب ڈالر کا اضافہ ہوا ،کرنٹ اکاؤنٹ خسارہ جی ڈی پی کا 5.3 فیصد ریکارڈ کیا گیا۔

جولائی سے اکتوبر تک مالیاتی خسارہ بڑھ کر 587 ارب روپے کی سطح تک پہنچ گیا۔

جولائی تا نومبر 2021 کے دوران ملک میں براہ راست غیر ملکی سرمایہ کاری 12.3 فیصد کمی سے 79 کروڑ 77 لاکھ ڈالر رہی، ملک میں مجموعی غیر ملکی سرمایہ کاری 455.5 ارب ڈالر تک پہنچ گئی۔

رپورٹ کے مطابق دسمبر کے تیسرے ہفتے تک  ملکی زرمبادلہ کے ذخائر   23 ارب 86 کروڑ ڈالر سے زائد رہے۔ اسٹیٹ بینک کے پاس 17 ارب 51 کروڑ ڈالر جب کہ  کمرشل بینکوں کے ذخائر 6.45 ارب ڈالر رہے۔

آؤٹ لک رپور ٹ میں بتایا گیا ہے کہ روپے کے مقابلے میں ڈالر کی شرح تبادلہ 178.12 روپے فی ڈالر کی سطح پر پہنچ گئی۔

ٹیکسوں کے حوالے سے بتایا گیا ہے کہ رواں مالی سال کے ابتدائی 4 ماہ میں ٹیکس ریونیو 36.8 فیصد اضافے سے 2319.1 ارب روپے رہا، جولائی سے اکتوبر میں نان ٹیکس آمدنی 5.4 فیصد اضافے سے 452 ارب رہی۔

مہنگائی کی شرح 11.5 فیصد

وزارت خزانہ کی رپورٹ کے مطابق رواں مالی سال کے ابتدائی 5 ماہ کے دوران مہنگائی کی سالانہ شرح 9.3 فیصد ریکارڈ کی گئی، نومبر میں مہنگائی کی ماہانہ شرح 11.5 فیصد ریکارڈ کی گئی۔

بڑی صنعتوں کی ماہانہ شرح نمو منفی

رپورٹ میں بتایا گیا ہے کہ ملک میں بڑی صنعتوں کی شرح نمو جولائی سے اکتوبر میں 3.6 فیصد تک رہی، اکتوبر میں بڑی صنعتوں کی شرح نمو  منفی 1.2 فیصد تک رہی۔

لاہور: مسلم لیگ (ن) کے رہنما رانا ثنااللہ نے کہا ہےکہ نوازشریف کی اگلے سال واپسی ہوگی اور وہی ہمارے وزیراعظم کے امیدوار ہوں گے۔

رانا ثناالہ نے کہا کہ موجودہ نااہل ٹولے کا وقت ختم ہوچکا ہے،  اگلے سال لانگ مارچ، مہنگائی مارچ اور جلسے جلوس ہوں گے۔

انہوں نے کہا کہ نواز شریف ہی ہمارے وزیراعظم کے امیدوار ہوں گے، پوری قوم نواز شریف کی طرف دیکھ رہی ہے، اور ہر مشکل کا حل یہی دیکھا جارہا ہے کہ نوازشریف واپس آئیں اور لیڈ کریں، نواز شریف کی اگلے سال واپسی ہوگی البتہ ٹائم ٹیبل نہیں دے سکتا۔

رانا ثنااللہ کا کہنا تھا کہ کسی قسم کی ڈیل کا تاثر بالکل غلط ہے،نواز شریف کی ڈیل عوام اور ووٹ کو عزت دو کے ساتھ ہے۔