لاہور: (ویب ڈیسک) پاکستان سپر لیگ میں آج دو بڑے مقابلے شیڈول ہیں، پہلا میچ پشاور زلمی اور کراچی کنگز کے درمیان ہوگا جبکہ دوسرے میچ میں لاہور قلندرز اور کوئٹہ گلیڈی ایٹرز مدمقابل ہوں گے۔
لاہور میں کرکٹ میلے کی رونقیں عروج پر ہیں، کرکٹ دیوانوں کو پی ایس ایل سیون کے چوتھے ڈبل ہیڈر کا بے صبری سے انتظار ہے، پہلے میچ میں پشاور زلمی اور کراچی کنگز مدمقابل ہوں گے۔ مسلسل پانچ میچوں میں شکست سے دوچار ہونے والی کراچی کنگز ٹیم پہلی جیت کی منتظر ہے جبکہ پانچویں نمبر پر براجمان ٹیم پشاور زلمی نے بھی جیت کے لیے کمر کس لی۔
شام ساڑھے سات بجے قذافی سٹیڈیم میں زور کا جوڑ پڑے گا، ہوم ٹیم لاہور قلندرز اور کوئٹہ گلیڈی ایٹرز آمنے سامنے ہوں گے۔ فخر زمان قلندز کی شان بڑھائیں گے تو جیسن رائے پھر سے سر فراز الیون کا مان ہوں گے۔
ٹیبل ٹاپر ملتان سلطانز کو ہرانے کے بعد قلندرز کا مورال ہائی ہے، دوسری جانب گلیڈی ایٹرز نے بھی ایونٹ میں دوسری مرتبہ لاہور کو شکست دینے پر نظریں جما لی ہیں۔
