لاہور: (ویب ڈیسک) ایچ بی ایل پی ایس ایل 7میں پیر کے روز پشاور زلمی کو لاہور قلندرز کی مضبوط بولنگ لائن کا چیلنج درپیش ہوگا۔
قذافی اسٹیڈیم میں آج لاہور قلندرز اور پشاورزلمی کی ٹیمیں آمنے سامنے ہوں گی، یہ لیگ مرحلے کا آخری میچ بھی ہوگا، میزبان ٹیم نے ابھی تک 9میں سے 6مقابلے جیتے ہیں، فخرزمان اور کامران غلام نے ابھی تک زبردست فارم کا مظاہرہ کیا ہے، جارح مزاج بیٹرز محمد حفیظ، فل سالٹ اور ڈیوڈ ویزا بھی موجود ہیں۔
گزشتہ میچ میں اسلام آباد یونائیٹڈ نے ٹاپ آرڈر کو پریشان کیا تو ہیری بروک نے سنچری سے کسر پوری کردی، کپتان شاہین شاہ آفریدی اور حارث رئوف اور زمان خان قذافی اسٹیڈیم کی کنڈیشنز سے ہم آہنگ ہو چکے اور بہترین پرفارم کر رہے ہیں، پشاور کیلیے ان بولرز کا سامنا بہت بڑا چیلنج ہوگا، ان فارم اسپنر راشد خان کا پی ایس ایل میں سفر تمام ہوچکا، ان کا خلا پر کرنا ہوگا۔
دوسری جانب پشاور زلمی نے 9 میں سے 5میچ جیتے ہیں،لیام لیونگ اسٹن اور کوہلر کیڈمور کی انجریز جبکہ شرفین ردر فورڈ کی نجی مصروفیات کی وجہ سے وطن واپسی کے بعد کپتان وہاب ریاض کو سلیکشن مسائل کا سامنا ہوگا،بیٹنگ میں امیدوں کا مرکز ان فارم محمد حارث اور حضرت اللہ ہوں گے۔
تجربہ کار شعیب ملک اور حسین طلعت بیٹ و بال دونوں سے کارآمد ثابت ہو سکتے ہیں، پیسرز سلمان ارشاد اور وہاب ریاض اچھی فارم میں ہیں،عثمان قادر کی کارکردگی میں تسلسل نہیں، لیام لیونگ اسٹن کا خلا بھی پر کرنا ہوگا، کراچی میں کھیلے جانے والے دونوں ٹیموں کے باہمی میچ میں لاہور قلندرز نے 29 رنز سے فتح پائی تھی، اس بار ہوم کراؤڈ کا فائدہ بھی حاصل ہوگا۔
