قومی کرکٹ ٹیم کے سابق کپتان شعیب ملک نے کہا ہے کہ اگر ثانیہ پاکستانی ڈرامہ و فلم انڈسٹری میں ڈیبیو کرتی ہیں تو کبھی نہیں چاہوں گا کہ وہ اداکار عدنان صدیقی کے ساتھ کام کریں۔
شعیب ملک نے اپنے خیالات کا اظہار نجی ٹی وی کے پروگرام میں کیا جہاں ثانیہ اور شعیب کو بطور مہمان مدعو کیا گیا تھا۔
پروگرام میں اسپورٹس کی اس جوڑی سے ذاتی زندگی سمیت ان کے کیرئیر سے متعلق متعدد سوالات کیے گئے جن کا دونوں نے جواب دیا۔ اسی دوران شعیب ملک سے ان کی بالی وڈ کی پسندیدہ اداکارہ کے بارے میں سوال پوچھاگیا۔
اس سے پہلے کہ شعیب جواب دیتے، ثانیہ نے یکدم کہا کہ کرینہ کپور جس پر کرکٹر نے تائید کی اور بتایا کہ انہیں کرینہ خاصی پسند ہیں۔
میزبان نے شعیب ملک سے پاکستان کی پسندیدہ اداکارہ کے بارے میں پوچھا تو انہوں نے کہا کہ گو وہ مجھ سے بہت چھوٹی ہیں لیکن انہیں پسند کرتا ہوں اور وہ ہیں ہانیہ عامر، لیکن اگر میں نے کبھی شوبز میں ڈیبیو کیا تو اپنی بہترین دوست اشنا شاہ کے ساتھ کرنا چاہوں گا۔
