اسلام آباد: (ویب ڈیسک) وزیراعظم نے ریکوڈک منصوبے پر کام کرنے والی کمپنی سے تنازع ختم ہونے اور 11 ارب ڈالر کا جرمانہ ختم ہونے کی خوشخبری سنادی۔
وزیراعظم نے سماجی رابطے کی ویب سائٹ ٹویٹر پر لکھا کہ 10 سال کی قانونی لڑائیوں اور گفت و شنید کے بعد بالآخر ریکوڈک کان کی ڈویلپمنٹ کے لیے بیرک گولڈ کے ساتھ کامیاب معاہدے پر بلوچستان کی قوم اور عوام کو مبارکباد پیش کرتا ہوں۔
انہوں نے کہا ہے کہ تقریباً 11 ارب ڈالر کا جرمانہ آف سیٹ ہوا ہے، دس ارب ڈالر بلوچستان میں لگائے جائیں گے جس سے 8 ہزار نئی ملازمتیں پیدا ہوں گی۔
عمران خان نے مزید کہا کہ ریکوڈک ممکنہ طور پر دنیا میں سونے اور تانبے کی سب سے بڑی کان ہوگی، یہ منصوبہ ہمیں قرضوں سے آزاد کرے گا اور ترقی اور خوشحالی کے ایک نئے دور کا آغاز کرے گا۔
