اداکارہ آمنہ ملک نے شوبز انڈسٹری کے حالیہ تنازع پر کھل کر بات کی اور پاکستان کی صف اول کی اداکاراؤں سے متعلق چند انکشافات کیے ہیں۔
گزشتہ کچھ روز میں اداکارہ ثنا جاوید کے خلاف کئی میک اپ آرٹسٹس اور ماڈلز سامنے آئیں جنہوں نے یہ الزام عائد کیا کہ ثنا جاوید کا رویہ سیٹ پر کافی غیر اخلاقی ہوتا ہے، وہ لوگوں کو خود سے کم تر سمجھتی ہیں اور کئی میک اپ آرٹسٹس کو نوکری سے فارغ کروا چکی ہیں۔
تاہم اب آمنہ ملک نے سوشل میڈیا پر پیغام جاری کیا اور انکشاف کیا کہ انڈسٹری میں ثنا وہ واحد اداکارہ نہیں ہیں جن کا معاون اداکاروں یا جونیئر اسٹاف کے ساتھ نامناسب رویہ ہوتا ہے۔
آمنہ نے کہا کہ لوگوں کو لگتا ہے کہ صرف ثنا بدتمیز ہیں، ایسا نہیں ہے یہ تو ایک ماڈل نے ہمت دکھائی اور ان کے ساتھ جو ہوا اسے بیان کیا، بعدازاں جو جو بھی اس سے متاثر تھے سب نے اپنے ساتھ ہونے والے واقعات شیئر کیے۔
اداکارہ نےکہا کہ میں نام نہیں لوں گی لیکن ہماری انڈسٹری میں معروف اداکاراؤں کی اکثریت ایسا ہی کرتی ہے اور وہ ایسے ہی بدتمیزی سے پیش آتی ہیں لیکن انہیں ایسا کرنے کا موقع کون دیتا ہے، انہیں بڑی اسٹارز کون بناتا ہے؟ یہ سب ہمارے ڈراموں کے ڈائریکٹرز اور پروڈکشن ہاؤسز کرتے ہیں۔
آمنہ نے کہا کہ پروڈکشن والے کہہ رہے ہوتے ہیں کہ ان اداکاراؤں کو کچھ نہ کہو ورنہ یہ کام نہیں کریں گی اور ہمارا ڈرامہ رک جائے گا، ڈائریکٹرز اور پروڈیوسرز کو چاہیے کہ ان لوگوں کو کام دینا بند کر دیں پھر دیکھیں، یہ بالکل ٹھیک ہو جائیں گی اور سیٹ پر بھی وقت پر آئیں گی۔
