آئرلینڈ : (ویب ڈیسک) کتے منشیات، دھماکہ خیز مواد یا کسی خاص خوشبو کا تعاقب کرنے کیلئے تو مشہور ہیں، لیکن نئی تحقیق کے مطابق کتا انسان کو سونگھ کر یہ بھی پتا لگا سکتا ہے کہ انسان دباو کا شکار ہے۔
ماہرین کے مطابق کتے میں صلاحیت ہے کہ وہ پسینے اور سانس سے انسان کی کیفیت کا اندازہ لگا سکتا ہے، جس کے بعد ماہرین کا ماننا ہے کہ کتے کی اس حس میں اسے مہارت دینے کے بعد اسے مریضوں کے امدادی کاروائیوں میں استعمال کیا جا سکتا ہے۔
مالکوں کی جانب سے اپنے چار پالتو کتوں کو اس ٹیسٹ کیلئے بھیجا گیا، اور 700 میں سے 650 سے زیادہ آزمائشوں میں، انہوں نے کامیابی سے پسینے یا سانس کے نمونے کی نشاندہی کی جو تناؤ والے شخص سے لیا گیا تھا۔
آئرلینڈ کے شہر بیلفاسٹ کی کوینز یونیورسٹی کے سکول آف سائیکالوجی میں پی ایچ ڈی کی طالبہ کلارا ولسن کا کہنا ہے کہ اس دریافت سے معلوم ہوتا ہے کہ انسان جب دباؤ کی حالت میں ہوتے ہیں تو پسینے اور سانس سے مختلف قسم کی بو خارج کرتے ہیں اور کتے اسے سونگھ کر بتا سکتے ہیں کہ ہم دباؤ میں ہیں یا نہیں۔ چاہے کتے اس انسان سے واقف ہوں یا نا ہوں۔
اس ٹیسٹ کیلیے سائنس دانوں نے 36 لوگوں کو ریاضی کے مشکل سوال حل کرنے کے لیے کہا، جس سے پہلے اور بعد میں ان سے پسینے اور سانس کے نمونے حاصل کیے گئے، جسے کتے باآسانی پہچاننے میں کامیاب ہو گئے۔
