اسلام آباد: (ویب ڈیسک) شیری رحمان نے کہا ہے کہ کیا عمران خان اب امریکی انتظامیہ کو غلطی درست کرنے کی دھمکیاں دے رہے ہیں ؟ آہستہ آہستہ تحریک انصاف کا ‘صاف چلی شفاف چلی’ بیانیہ بھی بے نقاب ہو رہا ہے۔
نائب صدر پیپلز پارٹی و سینیٹر شیری رحمان نے اپنے بیان میں کہا ہے کہ ایک دن امریکی وفد نے عمران خان سے ملاقات کی، دوسرے دن سابق وزیر نے کہا کہ ایسٹبلشمنٹ سے خراب تعلقات کی وجہ سے حکومت سے باہر ہیں، ان دو واقعات نے جھوٹ پر مبنی بیرونی سازش کے بیانیہ کو دفن کر دیا ہے۔
شیری رحمان کا کہنا تھا کہ توشا خانہ کے بعد اب ہیلی کاپٹر اسکینڈل سامنا آیا ہے، کفایت شعاری کا نعرہ لگا کر قومی خزانے کو بے دردی سے لوٹا گیا، بنی گالا سے ایوان وزیراعظم کے ہوائی سفر پر عمران خان نے 98 کروڑ روپے خرچ کئے، اقتدار کے نشے میں یہ لوگ کہتے تھے ہیلی کاپٹر کا خرچ 50 سے 55 روپے فی کلومیٹر ہے، دوسری طرف عمران خان کا یومیہ ہیلی کاپٹر کا خرچہ 8 لاکھ روپے سے زائد تھا۔
رہنما پیپلزپارٹی نے مزید کہا کہ کفایت شعاری کی تبلیغ کرنے والا شخص بنی گالا اور وزیراعظم ہائوس ہیلی کاپٹر پر آتا جاتا رہا، کنٹینر پر کھڑے ہو کر عمران خان مغربی ممالک کے رہنمائوں کی سائیکل پر آفس جانے کی مثالیں دیتے تھے،عمران خان کے ووٹر پونے تین سال انتظار کرتے رہے کہ ان کا لیڈر بھی سائیکل پر بنی گالا سے وزیراعظم ہاؤس جائے گا، عوام کے ٹیکس کے پیسوں ہیلی کاپٹر کے سفر میں اڑایا گیا۔

کراچی: (ویب ڈیسک) پیپلزپارٹی کے رکن سندھ اسمبلی شرجیل انعام میمن نے صوبائی وزیر کی حیثیت سے حلف اٹھالیا۔ قائم مقام گورنر سندھ آغا سراج درانی نے حلف لیا۔
حلف برداری کی تقریب گورنر ہاﺅس کراچی میں ہوئی، شرجیل انعام میمن کی بطور صوبائی وزیر حلف اٹھانے کی تقریب میں وزیراعلیٰ سندھ مراد علی شاہ، صوبائی وزراء ناصر شاہ، سعید غنی، مکیش کمار چاﺅلہ، سردار شاہ اور معاونین خصوصی شریک ہوئے۔ تقریب کی میزبانی کے فرائض چیف سیکریٹری سندھ سہیل راجپوت نے انجام دیئے۔

لاہور: (ویب ڈیسک) لاہور میں بوندا باندی اور ہواؤں سے موسم خوشگوار ہوگیا۔ موسم کا حال بتانے والوں نے اسلام آباد، بالائی خیبرپختونخوامیں بھی بارش کی پیشگوئی کر دی۔
لاہور کے مختلف علاقوں میں صبح سویرے ہلکی بارش ہوئی۔ ٹھنڈی ہواؤں سے موسم خوشگوار ہوگیا۔ محکمہ موسمیات کی آج مری، گلیات، پشاور، سوات میں بھی بادل برسنے کی پیشگوئی ہے۔ گلگت بلتستان اور کشمیر میں بھی بارش کی توقع ہے۔ سندھ اور بلوچستان میں موسم گرم رہے گا۔

اسلام آباد: (ویب ڈیسک) وفاقی کابینہ میں چار نئے وزرا کی شمولیت ہوگئی۔ صدر مملکت ڈاکٹر عارف علوی نے نئے وفاقی وزراء سے حلف لیا۔
تقریب حلف برداری ایوان صدر میں ہوئی، جس میں وزیراعظم شہباز شریف بھی شریک ہوئے۔ مسلم لیگ ن کے میاں جاوید لطیف، بی این پی مینگل کے آغا حسن بلوچ اور مسلم لیگ ق کے چودھری سالک حسین نے وفاقی وزیر جبکہ بی این پی کے ہاشم نوتیزئی نے وزیرمملکت کے عہدے کا حلف اٹھایا۔

لاہور: (ویب ڈیسک) چیف جسٹس لاہور ہائیکورٹ نے ریمارکس دیئے کہ 2 بجے تک گورنر پنجاب صدر پاکستان کو وجوہات لکھ کر بھیج دیں تو ٹھیک ہے، 2 بجے تک گورنر نے کوئی فیصلہ لے لیا تو ٹھیک ورنہ کورٹ اپنا حکم جاری کرے گی۔
حمزہ شہباز سے حلف نہ لینے سے متعلق لاہور ہائیکورٹ میں دائر درخواست پر سماعت ہوئی۔ ایڈووکیٹ جنرل پنجاب نے عدالت کو بتایا کہ گورنر پنجاب کے ساتھ میٹنگ کی، دو، تین وجوہات عدالت کے سامنے رکھنا چاہتا ہوں، گورنر کے ساتھ اسپیکر اسمبلی حلف لینے کا پابند ہوتا ہے، حمزہ شہباز کی درخواست میں اسپیکر کو فریق نہیں بنایا گیا، گورنر کوئی ربڑ اسٹیمپ نہیں۔
چیف جسٹس نے ایڈووکیٹ جنرل سے استفسار کیا کہ گورنر پنجاب کی جانب سے حلف نہ لینے کا کوئی جواز ہے ؟ صدر نے کہا کہ میں وزیر اعظم سے حلف نہیں لے سکتا، بیمار ہوں۔ جس پر ایڈووکیٹ جنرل پنجاب نے کہا کہ گورنر پنجاب سمجھتے ہیں کہ وزیر اعلیٰ کا انتخاب قانون اور آئین کے مطابق نہیں ہوا، ایک خاتون ایم پی اے تشدد کی وجہ سے زندگی اور موت کی کشمکش میں ہے۔ چیف جسٹس نے ریمارکس دیئے کہ اس کا مطلب ہے سب کچھ روک دیا جائے۔
چیف جسٹس امیر بھٹی نے کہا کہ 21 دنوں سے پنجاب میں حکومت نہیں ہے، آپ کو اندازہ ہے صوبہ کیسے چل رہا ہے ؟ یہ الیکشن بھی جیسے ہوا سب کورٹ کے علم میں ہے، عدالت کے حکم پر چیف منسٹر کا الیکشن ہوا، جس طرح سے چیف منسٹر کے الیکشن میں تاخیری حربے استعمال کیے گئے سب پتہ ہے۔ ایڈووکیٹ جنرل پنجاب نے کہا کہ اس کیس کو پیر تک ملتوی کیا جائے۔ جس پر چیف جسٹس نے کہا کہ کیوں مہلت دی جائے آپ کو ؟ آپ کے پاس تو اس کے علاؤہ کام ہی نہیں، گورنر پریس کانفرنس کر رہے ہیں تو کیا اس کیس کے لیے ٹائم نہیں ان کے پاس ؟۔

لاہور: (ویب ڈیسک) پنجاب اسمبلی کے ایوان میں پولیس کیسے آئی ؟ سپیکر اور ڈپٹی سپیکر کے درمیان اختلافات بڑھ گئے۔ سیکرٹری اسمبلی اور ڈپٹی سپیکر نے چیف سیکرٹری پنجاب اور آئی جی کو خطوط لکھ دیئے۔
ایوان میں پولیس کے داخلے پر اسپیکر اور ڈپٹی اسپیکر کے درمیان اختلافات بڑھ گئے۔ عدالت کے حکم پر عملدرآمد کرانے پر پرویز الٰہی چیف سیکرٹری اور آئی جی پنجاب سے نالاں ہوگئے۔ پرویز الٰہی کے حکم پر معطل سیکرٹری اسمبلی محمد خان بھٹی نے چیف سیکرٹری اور آئی جی پنجاب کو خط لکھ دیا۔
خط میں کہا گیا ہے کہ 16 اپریل کو پنجاب اسمبلی میں تعینات افسران کے خلاف کارروائی عمل میں لائی جائے گی۔ معطل سیکرٹری پنجاب اسمبلی کی جانب سے لکھا گیا خط منظر عام پر آگیا۔ ڈپٹی اسپیکر دوست محمد مزاری نے خط کو کالعدم،غیر قانونی قرار دے دیا۔
ڈپٹی اسپیکر کے مطابق محمد خان بھٹی کو 16 اپریل کو معطل کیا گیا تھا اور ان کے خلاف انکوائری کی جا ری ہے۔ سابق سیکرٹری اسمبلی محمد خان بھٹی کے پاس وضاحت مانگنے کا کوئی قانونی احتیار نہیں ہے۔

اسلام آباد: (ویب ڈیسک) پاکستان کی عدالتی تاریخ میں اسلام آباد ہائی کورٹ کا غیر معمولی اقدام۔ عدالتی کارروائی کی لائیو اسٹریمنگ کا آغاز ہوگیا۔
ہائی کورٹ کے آئی ٹی ڈیپارٹمنٹ نے چیف جسٹس کی کورٹ میں سسٹم نصب کر دیا۔ ٹرائل کے طور پر عدالتی کارروائی کو محدود پیمانے پر براہ راست دکھایا گیا۔ ٹرائل کی کامیابی کے بعد ویب سائٹ پر کوئی بھی لائیو عدالتی کارروائی دیکھ سکے گا۔