پشاور: (ویب ڈیسک) پشاور کبھی لیدر گارمنٹس کا بڑا مرکز اور روس، چین، یورپ جیسے ممالک کو لیدر مصنوعات ایکسپورٹ کرنے والی بڑی مارکیٹ ہوا کرتا تھا، پشاور لیدر مارکیٹ میں اب گنی چنی دکانیں باقی رہ گئی ہیں، ملک کے لئے زرمبادلہ کمانے کا ایک بڑا ذریعہ دم توڑنے کو ہے۔
تفصیلات کے مطابق پشاور کی لیدر گارمنٹس مارکیٹ کبھی بڑا کاروباری مرکز تھا جہاں اب کاروباری حالات نے تاجروں کو مارکیٹ چھوڑنے پر مجبور کر دیا ہے، مارکیٹ میں چند گنی چنی دکانیں ہی باقی رہ گئی ہیں۔
ایک وقت تھا کہ پشاور کی لیدر گارمنٹس مصنوعات روس، چین، یورپ اور امارات کو ایکسپورٹ ہوتی تھیں تاہم ایکسپورٹ اب ایک خواب بن کے رہ گیا ہے کیونکہ کاروباری حالات سے تاجر مارکیٹ چھوڑنے پر مجبور ہو گئے ہیں، 2015ء اور 2016ء میں ملکی لیدر انڈسٹری کی ایکسپورٹس میں 27 فیصد کمی ریکارڈ کی گئی جبکہ بھارتی لیدر مصنوعات کی ایکسپورٹ میں 47 فیصد اضافہ ہوا۔
پشاور کی لیدر مارکیٹ افغان مہاجرین نے سوویت جنگ کے دور میں بسائی تھی، نوے کی دہائی میں لیدر انڈسٹری زرمبادلہ کمانے والی ملک کی دوسری بڑی انڈسٹری تھی، ملک بھر میں چمڑے کی صنعت ترقی کر رہی تھی، ملک کی زرمبادلہ کمائی میں لیدر انڈسٹری کا حصہ دس اعشاریہ چار ایک فیصد تھا۔
30 سال سے اس کاروبار سے وابستہ رہنے والے عبدالقدیر نے بتایا کہ یہ کاروبار ان کے باپ دادا نے افغانستان سے ہجرت کر کے شروع کیا تھا، کبھی چین کو ایکسپورٹ کرنے والی یہ مارکیٹ چین کے مصنوعی لیدر کا مقابلہ نہیں کر پا رہی، چین مصنوعی لیدر کے ساتھ دنیا کی لیدر مارکیٹ کو کنٹرول کر رہا ہے۔
انہوں نے بتایا کہ پشاور کی مارکیٹ میں کبھی افغانستان سے خام چمڑے کے چالیس ٹرالر آتے تھے، اب ان کی تعداد آدھی بھی نہیں رہی، سلائی کٹائی کی مشینیں اب بھی کام کرتی ہیں، مال بھی بنتا ہے لیکن گاہک نہیں ملتا، دکان دار کہتے ہیں ٹیکس کم کئے جائیں، کاریگر بھی فکر مند ہیں، روز کوئی نہ کوئی کاروبار بند کر رہا ہے، پتہ نہیں ان کا کام کب تک چلے اور کب بیروزگار ہو جائیں۔
سرحد چیمبر آف کامرس کے صدر کا کہنا ہے کہ کنٹینرز کے اخراجات سمیت کرایوں میں اضافہ ہوا ہے، حکومت کی عدم توجہ کے باعث بین الاقوامی ڈٰیمانڈ بھی کم ہوتی جا رہی ہے، کبھی ملک کی دوسری بڑی ایکسپورٹ انڈسٹری کا درجہ رکھنے والی لیدر کی صنعت کو حکومت سہارا دے تو ایک بار پھر زرمبادلہ کے ساتھ ساتھ مقامی طور پر روزگار کے مواقع بھی بڑھیں گے۔

اسلام آباد: (ویب ڈیسک) ایف بی آر نے ٹیکس دہندگان کی سہولت کیلئے تمام فیلڈ دفاتر 30 اور 31 دسمبر کو رات دیر تک کھلے رکھنے کا اعلان کردیا۔
تفصیلات کے مطابق فیڈرل بورڈ آف ریونیو (ایف بی آر) نے ٹیکس دہندگان کی سہولت کیلئے تمام فیلڈ دفاتر 30 اور 31دسمبر کو رات دیر تک کھلے رکھنے کا اعلان کردیا ہے۔
اس حوالے سے باضابطہ طور پر سرکلر جاری کردیا گیا ہے جس میں تمام ٹیکس پیئر آفسز(ایل ٹی یوز)میڈیئم ٹیکس پیئر آفسز،کارپوریٹ ٹیکس آفسز اور ریجنل ٹیکس آفسز(آر ٹی اوز)کے سربراہان کو آگاہ کیا گیا ہے کہ 30 دسمبر کو ایف بی آر کے تمام فیلڈ آفسز رات 8 بجے تک جبکہ 31 دسمبر بروز ہفتہ رات 10 بجے تک کھلے رہیں گے۔

جھنگ: (ویب ڈیسک) جھنگ میں انتظامیہ نے بروقت کارروائی کرتے ہوئے بھاری مقدار میں آٹا سمگلنگ کی کوشش ناکام بنا دی، ملزمان کے خلاف مقدمہ درج کر لیا گیا۔
میڈیا ذرائع کے مطابق ضلعی انتظامیہ جھنگ نے صابر فلور ملز سے آٹا سمگلنگ کی کوشش ناکام بناتے ہوئے گاڑی میں لوڈ 20 کلو گرام کے 992 تھیلے قبضہ میں لے لئے، انتظامیہ نے ملز سیل کر دی جبکہ مالک اور ڈرائیور کو موقع پر گرفتار کر کے مقدمہ درج کر لیا گیا۔
واقع سے متعلق ڈی سی جھنگ نے کہا کہ آٹے کی خردبرد کسی صورت قابل قبول نہیں، غیر قانونی اقدام کرنے والے ملز مالکان کے خلاف بلا تفریق کارروائی کی جائے گی۔
دوسری جانب فلور ملز ایسوسی ایشن نے انتظامیہ کی کارروائی کے بعد غیر معینہ مدت کیلئے ہڑتال کا اعلان کر دیا، فلور ملز ایسوسی ایشن نے سرکاری و پرائیویٹ آٹا و گندم سپلائی بھی بند کرنے کا اعلان کیا ہے۔
صدر فلور ملز ایسوسی ایشن جھنگ زاہد خان بلوچ کا کہنا ہے کہ آج میٹنگ کے بعد لائحہ عمل دیں گے، ہڑتال کا اعلان ایک فلور ملز پر چھاپہ اور اس کو سیل کرنے کے بعد کیا گیا ہے۔