لاہور: (ویب ڈیسک) گورنر پنجاب بلیغ الرحمان نے کہا ہے کہ چیف سیکرٹری نے لیگل اوپینین لینے کیلئے کچھ وقت لگایا، وزیر اعلیٰ کو ڈی نوٹیفائی کے میرے آرڈر کو رات گئے جاری کیا گیا، اتنی دیر نہیں ہونی چاہیے تھی۔
نجی ٹی وی سے گفتگو کرتے ہوئے گورنر پنجاب نے کہا کہ اگر آرڈر چیف سیکرٹری نے دیا تو ڈپٹی سیکرٹری کو کیوں معطل کیا گیا؟ ڈپٹی سیکرٹری کی معطلی کا مجھے نہیں پتا، چیف سیکرٹری کے ساتھ کیا ہوا میرے علم میں نہیں، پرویزالہیٰ کی ہیلتھ، ایجوکیشن، گڈ گورننس میں پرفارمنس کو بہتر ہونا چاہیے تھا۔
بلیغ الرحمان نے مزید کہا کہ گزشتہ دنوں گورنر ہاؤس کے باہر حملہ کر کے آگ لگانے کی کوشش کی گئی، یہ پنجاب حکومت کی بہت بڑی ناکامی تھی، گورنر ہاؤس پر حملے کے دن پنجاب حکومت نے کوئی معذرت نہیں کی، ورکنگ ریلشن شپ کا فقدان نہیں ہے، پنجاب اسمبلی کے جن بلز میں قوانین کی خلاف ورزی ہو اسے پاس نہیں کرتا۔
انہوں نے مزید کہا کہ مسلم لیگ (ق) کےسربراہ چودھری شجاعت حسین ہیں، معاملہ عدالت میں ہے جو بھی فیصلہ ہوگا سر آنکھوں پر ہے، فلور کراسنگ کے بالکل خلاف ہوں نہیں ہونی چاہیے، مسلم لیگ (ق) کےممبران نے فیصلہ کرنا ہے پارٹی ہیڈ یا ممبران کے ساتھ چلنا ہے۔

کراچی:(ویب ڈیسک) کراچی کے علاقے گلستان جوہر میں اشارے پر نہ رکنے والے موٹر سائیکل سوار نوجوان کو پولیس اہلکاروں نے تعاقب کے بعد عمارت میں گھس کر فائرنگ کرکے قتل کردیا۔
ابتدائی تفتیش میں جرم ثابت ہونے پر تینوں اہلکاروں کو گرفتار کر لیا گیا ہے۔ ڈپٹی انسپکٹر جنرل پولیس ایسٹ مقدس حیدر کے مطابق واقعہ کراچی ایسٹ کے شارع فیصل تھانے کی حدود گلستان جوہر میں پیش آیا۔
حکام کے مطابق موٹر سائیکل پر سوار دو افراد کو شاہین فورس کے اہلکاروں نے رکنے کا اشارہ کیا، وہ نہیں رکا تو موٹر سائیکل پر سوار ہو کر اہلکاروں نے اس کا تعاقب کیا اور ایک رہائشی عمارت کے احاطے میں جاکر اس پر فائرنگ کردی۔
فائرنگ سے عامر حسین نامی نوجوان عمارت کی سیڑھیوں پر چڑھتے ہوئے موقع پر جاں بحق ہوگیا۔ واقعے کے بعد علاقے میں اشتعال پھیل گیا۔
ڈی آئی جی ایسٹ مقدس حیدر کی ہدایت پر ایس ایس پی ایسٹ عبدالرحیم شیرازی کی نگرانی میں پولیس افسران نے ابتدائی تحقیقات کے دوران سی سی ٹی وی فوٹیج کی مدد سے ساری صورتحال واضح کی۔
ایس ایس پی ایسٹ عبدالرحیم شیرازی کے مطابق موٹر سائیکل سوار دونوں افراد کے پاس سے اسلحہ برآمد نہیں ہوا۔
انہوں نے بتایا کہ اس موٹر سائیکل پر دونوں افراد کے ہمراہ ایک چھوٹی بچی بھی تھی جو محفوظ رہی۔
ڈی آئی جی ایسٹ مقدس حیدر کے مطابق فائرنگ میں ملوث اہلکاروں کو گرفتار کر لیا گیا ہے۔ متوفی کے لواحقین سے رابطہ کرکے اہلکاروں کے خلاف قتل کا مقدمہ درج کیا جا رہا ہے۔
گلستان جوہر فائرنگ میں ملوث گرفتار تین اہلکار ناصر، شہر یار اور فیصل لاک اپ میں موجود ہیں۔

اسلام آباد: (ویب ڈیسک) ریلیف کمشنر پنجاب نوید حیدر شیرازی نے کہا ہے کہ مری میں 8 ہزار سے زائد گاڑیوں کے داخلے پر پابندی لگا دی، سی سی ٹی وی کیمروں کی مدد سے مری کے تمام روڈز کی مانیٹرنگ کی جائے گی۔
ریلیف کمشنر پنجاب نوید حیدر شیرازی کے زیر صدارت مری میں برف باری کے پیشگی انتظامات کا جائزہ لینے کے لیے اجلاس ہوا، اجلاس میں ڈی جی پی ڈی ایم اے فیصل فرید، سیکرٹری ریونیو ، ڈی سی مری ، ریسکیو 1122 سمیت دیگر افسران کی شرکت ڈی جی پی ڈی ایم اے اور ڈی سی مری نے انتظامات بارے بریفنگ دی۔
نوید حیدر شیرازی نے کہا کہ برفباری کے دوران چین مافیا کے خلاف کریک ڈاؤن کیا جائے، روڈز پر کسی قسم کی رکاوٹ پیدا نہ ہو، برفباری سے نمٹنے کے لیے گرینڈ موک ایکسر سائز کا انعقاد کیا جائے، تمام ادارے کوآرڈی نیشن کے عمل کو بہتر بنائیں تاکہ سیاحوں کو سیر و تفریح کے دوران کسی قسم کی پریشانی کا سامنا نہ کرنا پڑے۔
ریلیف کمشنر پنجاب کا کہنا تھا کہ مری میں سیاحوں کی سہولت کے لیے 13 فسیلیٹیشن سینٹرز قائم کیے گئے ہیں، مری میں سینٹرل کنٹرول روم قائم اور پی ڈی ایم کے پراونشنل کنٹرول روم سے مانیٹرنگ کا عمل جاری ہے، ایمرجنسی صورتحال سے نمٹنے کے لیے ریسکیو 1122، پولیس سمیت دیگر متعلقہ اداروں کے اہلکار اضافی تعداد میں تعینات کیے گئے ہیں۔
نوید حیدر شیرازی کا کہنا تھا کہ ٹریفک پلان پر مکمل عملدرآمد کرایا جائے، سیاحوں کے لیے پارکنگ کے بہترین انتظامات کیے جائیں، تمام محکمے برفباری کے حوالے فوکل پرسن مقرر کریں اور ٹورازم سکواڈ کے جوان روڈز پر گشت کو یقینی بنائیں اور روڈز پر تعینات افسروں اور اہلکاروں کی حاضری چیکنگ کو یقینی بنایا جائے۔
انہوں نے کہا کہ برفباری سیزن کے دوران ضلع مری میں تعینات افسروں کی ٹرانسفر پوسٹنگ نہ کی جائے، مری جانے والے سیاح موسمی صورتحال کو مدنظر رکھتے ہوئے سفر کریں، ہنگامی صورتحال میں متعلقہ انتظامیہ یا پی ڈی ایم اے کی ہیلپ لائن 1129 پر کال کریں۔

لاہور: (ویب ڈیسک) پاکستان تحریک انصاف ( پی ٹی آئی) کے سینئر رہنما و سابق وفاقی وزیر فواد چودھری نے کہا ہے کہ اسٹیبلشمنٹ کی کٹھ پتلیوں نے آج بی بی کی برسی کے موقع پر تماشہ لگایا، زرداری اور ان کے فرزند نے بھٹو اور بی بی کی سیاسی میراث کو ان کے مزارات میں ہی دفن کر دیا۔
بلاول زرداری کی تقریر ردعمل دیتے ہوئے سابق وفاقی وزیر فواد چودھری نے کہا کہ این آر او ٹو سے استفادے کیلئے زرداری اور اس کے فرزند نے بھٹو اور بی بی کی سیاست سے یکسر لاتعلقی کا اعلان کیا، وفاقِ پاکستان کی سب سے بڑی سیاسی جماعت کو اندرون سندھ کی چند بستیوں تک محدود، مجرموں کی آماجگاہ بنا دیا۔
فواد چودھری کا کہنا تھا کہ اہل سندھ جھولیاں اٹھا اٹھا کر زرداریوں کے ڈاکو راج سے نجات کی دعا مانگ رہے ہیں، سندھ کے عوام سیلاب کی آفت کا شکار، زرداری کے حواری سندھ کا پیسہ ضمیروں کی منڈیوں میں جھونکتے رہے، بھٹو نے ملک کو جو آئین دیا، زرداری نے جاتی امراء کے چوروں کے ساتھ مل کر اس کے انسانی حقوق کے باب کی دھجیاں اڑوائیں۔
رہنما پی ٹی آئی نے کہا کہ اقتدار کے حصول کیلئے زرداری اور اس کا فرزند دستور، جمہوریت اور پارلیمان پر کئے جانے والے ہر شرمناک حملے کے سہولت کار بنے، 6 فیصد کی شرح سے ترقی کرتی معیشت کو تباہی کے گھاٹ اتارنے کے جرم میں بھی سہولت کار زرداری اور اس کا فرزند ہیں۔
فواد چودھری نے کہا کہ زرداری اور اس کے فرزند کی سہولت کاری کے باعث 8 ماہ پہلے تک ناپید دہشت گردی پھر سے سر اٹھا رہی ہے، زرداری اور اس کے فرزند کی سہولت کاری سے صوبوں کو ان کے وسائل سے محروم کیا جا رہا ہے۔
انہوں نے کہا کہ زرداری اور اس کے فرزند کی ذلت آمیز معاونت سے اظہارِ رائے کی آزادیاں مصلوب، عوام سیاسی حقوق سے محروم کئے جارہے ہیں، آٹے اور اشیائے خورونوش کی قیمتوں میں کئی گنا تک کے اضافے کے جرم میں بھی زرداری اور اس کا فرزند ملوث ہیں۔
فواد چودھری نے کہا کہ انتخاب سے فرار میں زندگی تلاش کرنے والوں کو عوام کے سامنے کھڑا کریں گے۔

لاہور: (ویب ڈیسک) چیئرمین پی ٹی آئی اور سابق وزیر اعظم عمران خان نے کہا ہے کہ پاکستان کی معیشت تباہ ہونے کا ایک شخص ذمہ دارہے، ہماری حکومت ختم کر کے چوروں کو اقتدار پر بٹھا دیا، چوروں کو اوپر بٹھانا اور کیسز ختم کرنا اس سے بڑی غداری کیا ہو سکتی ہے، میرے خلاف سازش پاکستان سے ہوئی، حسین حقانی میرے خلاف کام کر رہے تھے۔
نجی ٹی وی کو انٹرویو دیتے ہوئے سابق وزیر اعظم نے کہا کہ آڈیوز ٹیپ کا مقصد بلیک میل کرنا اور گند اچھالنا ہے، ہماری حکومت میں ادارے مضبوط ہوئے، موجودہ حکومت پر کوئی سرمایہ کار بھروسہ نہیں کرتا، چوروں نے اقتدار میں آکر اپنے کیسز معاف کرا لیے، انہوں نے بڑے ڈاکوؤں کو ملک میں چوری کا لائسنس دے دیا ہے، نیب ترمیم کے بعد پاکستان میں کوئی طاقت ور ڈاکو نہیں پکڑا جا سکے گا۔
چیئرمین پی ٹی آئی نے کہا کہ دو چور خاندانوں نے ملک میں اداروں کو ٹھیک نہیں ہونے دیا، شہباز شریف نے اقتدار میں آکر سب سے پہلے ایف آئی اے کو تباہ کیا، ایف آئی اے کے افسر رضوان کو ہارٹ اٹیک ہوا، شہباز شریف کے کیس کے چار گواہان مر چکے ہیں، نیب پر انہوں نے اپنا بندہ بٹھا دیا اب سارے کیسز ختم ہو رہے ہیں۔
انہوں نے کہا کہ نوازشریف نے لندن فلیٹس کو تسلیم کیا، جج نے نیب سے پوچھا آپ فلیٹ کی ملکیت ثابت کریں، انہوں نے نیب، ایف آئی اے کو ختم کر دیا ہے، رمیز راجہ کرکٹ بورڈ میں اچھا کام کر رہا تھا، نجم سیٹھی کا کرکٹ میں کوئی تجربہ نہیں اسے چیئرمین بنا دیا گیا، کیا رمیز راجہ اور نجم سیٹھی کا موازنہ ہے، اب کرکٹ کا بھی برا حال ہوگا۔
عمران خان نے مزید کہا کہ ہمارے دورمیں اکنامک سروے کے مطابق 6 فیصد پر معیشت گروتھ کر رہی تھی، چوروں نے ملک کا بیڑہ غرق کر دیا ہے، آج پاکستان میں تاریخ کی سب سے زیادہ مہنگائی ہے، جب عدم اعتماد آئی تو اس وقت ڈالر 178 روپے کا تھا، یہ حکومت تو’’اکنامک ہٹ مین‘‘ لگ رہی ہیں۔