اسلام آباد: (ویب ڈیسک) وفاقی وزیر مواصلات مولانا اسعد محمود نے کہا ہے کہ وزیر اعظم اگر آپ حق پر نہ ہوتے تو ہم کبھی آپ کا ساتھ نہ دیتے۔
قومی اسمبلی میں اظہار خیال کرتے ہوئے مولانا اسعد محمود نے کہا ہے کہ ایوان نے عدالت سے فل کورٹ بنانے کا مطالبہ کیا ہم نے معاملے کی سماعت کرنے والے بینچ پر تحفظات کا اظہار کیا تھا، جو آج عدالتی بحران پیدا ہوا ہے تاریخ میں کبھی نہیں ہوا، سپریم کورٹ نے آج تقسیم کی بنیاد رکھ دی، یہ فیصلے خدانخواستہ ملک کو تباہ نہ کر دیں، ہم اپنے حق میں فیصلہ کرنے کا نہیں کہہ رہے۔
جمعیت علماء اسلام (ف) کے رہنما مولانا اسعد محمود نے مزید کہا کہ عدالت کو نہ ایوان نہ ہی سیاسی جماعتوں کا کوئی لحاظ ہے، ہم چاہتے تھے کہ ایک فل کورٹ بینچ بنایا جائے، عدالت نے آج جانبداری کا مظاہرہ کرتے ہوئے عاشقان عمران میں اپنا نام لکھوا لیا، آپ کو کوئی حق نہیں الیکشن کی تاریخ آپ دیں، ہم تسلیم نہیں کرتے، ہمیں انصاف چاہیے جناب سپیکر۔
وفاقی وزیر نے کہا کہ ہم نے بڑے بڑے عسکری مارشل لاز کا مقابلہ کیا ہے، ہم عدالتی مارشل لاء کو بھی تسلیم نہ کرنے کا اعلان کرتے ہیں، جو بے انصافی کی اور جو عدل کا جنازہ نکالا ہے آپ کی روح کو بھی اطمینان نہیں ملے گا، میرے والد نے ایوب، ضیا اور مشرف کے مارشل لاز کے خلاف علم بغاوت بلند کیا، آئین اور پارلیمان کی بالادستی پر کوئی سمجھوتہ نہیں کیا جائے گا۔
مولانا اسعد محمود نے کہا کہ ہمیں بتایا جائے آپ کے خلاف کہاں شکایت لے کر جائیں، ہم سیاسی لوگ ہیں جج اور جرنیل پر پردہ ڈالنے کی کوشش کرتے ہیں، آج عدالت کہہ رہی عمران خان سے بات کرو کل کو سعد رضوی سے بات کرنے کا کہہ دو گے، عمران خان کا اسمبلی سے کیا تعلق ہے، اپوزیشن لیڈر تو ادھر بیٹھے ہیں، ملک میں بڑھتی عسکریت پسندی پر کبھی ازخود نوٹس نہیں لیا گیا۔
