لاہور: (ویب ڈیسک) رمضان المبارک کے دوسرا عشرہ مکمل ہو گیا، تیسرا عشرہ شروع ہوتے ہی لاکھوں فرزندان اسلام اعتکاف بیٹھ گئے۔
ملک کے مختلف شہروں میں نماز عصر کے بعد اعتکاف میں بیٹھنے والے فرزندان اسلام روتے، گڑگڑاتے، آنسو بہاتے گناہوں کی مغغرت کی دعاؤں کے ساتھ ملکی سلامتی ، خوشحالی اور ترقی کے لئے بھی دعائیں مانگیں گے۔
رمضان المبارک کی بابرکت گھڑیاں اور آخری عشرے میں خصوصی عبادات اور جہنم سے آزادی کی دعاؤں کے ساتھ شہر اقتدار کی چھوٹی بڑی مساجد میں ہزاروں فرزندان اسلام اعتکاف کی سعادت حاصل کرنے مساجد میں پہنچ گئے۔
وفاقی دارالحکومت کی مرکزی فیصل مسجد میں بھی 450 کے قریب افراد اعتکاف کی سعادت حاصل کر رہے ہیں، معتکفین کا کہنا ہے کہ اعتکاف بیٹھنا ویسے ہی اجر کا کام ہے لیکن فیصل مسجد میں اعتکاف کرنا بڑی سعادت کی بات ہے۔
فیصل مسجد انتظامیہ کا کہنا ہے کہ رجسٹریشن کا عمل مکمل کرنے اورجانچ پڑتال کے بعد ساڑھے چار سو افراد کیلئے اعتکاف کیلئے انتظامات کیے گئے ہیں، تمام مساجد کی طرح فیصل مسجد میں بھی سکیورٹی کے خصوصی انتظامات کیے گئے ہیں۔-
لاہور کی مشہور داتا دربار مسجد میں 1700 شہری اعتکاف بیٹھ گئے جبکہ منہاج القرآن میں 6000 افراد سنت اعتکاف کی سعادت حاصل کر رہے ہیں اس کے علاوہ بادشاہی مسجد میں بھی 6000 شہری اعتکاف میں بیٹھ گئے۔
کراچی میں فیضان مدینہ اور میمن مسجد سمیت دیگر مساجد میں بھی ہزاروں افراد سنت اعتکاف کی سعادت حاصل کر رہے ہیں، مساجد میں شب قدر کی تلاش میں طاق راتوں میں خصوصی عبادات کا سلسلہ شروع ہوگیا ہے۔
وفاقی دارالحکومت اسلام آباد، لاہور اور کراچی سمیت دیگر شہروں میں جہاں اجتماعی اعتکاف کیا جا رہا ہے وہاں سکیورٹی کے خصوصی انتظامات کیے گئے ہیں۔
