لاہور: (ویب ڈیسک) پاکستان پیپلزپارٹی کے رہنما و معروف قانون دان اعتزاز احسن نے کہا ہے کہ سپریم کورٹ نے پنجاب میں 14 مئی کو انتخابات کے انعقاد کا حکم دیا ہے، جو سپریم کورٹ کا فیصلہ نہیں مانے گا نااہل ہوگا۔
لاہور ہائیکورٹ کے باہر میڈیا سے گفتگو کرتے ہوئے اعتزاز احسن کا کہنا تھا کہ دلیل دی جاتی ہے کہ پورے ملک میں انتخابات ایک ہی روز ہونے چاہئیں تو پھر قومی اسمبلی تحلیل کر دیں، حکمرانوں نے الیکشن سے بھاگنے کیلئے کیا کچھ نہیں کیا، رجیم چینج کرنے کے بعد عمران خان پر 140 مقدمات بنا دیئے۔
اعتزاز احسن نے کہا کسی کو الیکشن میں ناقابل شکست بنانا ہے تو اس پر مقدمات بناؤ، انہوں نے اس کو دیوتا بنا دیا ہے، عمران خان سے ڈرنے کی کوئی ضرورت نہیں، میں جانتا ہوں اس نے الیکشن لڑنا ہے، 40 غلطیاں کرنی ہیں، عمران خان کا پلڑا اتنا بھاری نہیں ہونا، یہ مقدمات قائم کر کے عمران خان کا سیاسی قد بڑھا رہے ہیں، وہ ناقابل شکست نہیں ہے پر یہ بنا رہے ہیں۔
ان کا کہنا تھا کہ نظریہ ضرورت نے پاکستان کو برباد کیا ہے، نظریہ ضرورت رد کرنا پڑے گا، ایک طرف نظریہ ضرورت کھڑا ہے،ایک طرف عمر عطابندیال کھڑا ہے۔
معروف قانون دان نے مزید کہا کہ 90 روز سے آگے جانے کی دلیل مان لی جائے تو کوئی الیکشن نہ ہونے دے، دلیل دے رہے ہیں کہ ایک روز میں الیکشن ہونا چاہیے تو قومی اسمبلی تحلیل کر دیں، سپریم کورٹ کا فیصلہ موجود ہے کہ انتخابات 14 مئی کو ہوں گے جو فیصلہ نہیں مانے گا ڈس کوالیفائی ہوگا۔
