لاہور(پ ر):پاکستان کی پہلی غیر منافع بخش لبرل آرٹس یونیورسٹی،بیکن ہاؤس نیشنل یونیورسٹی (بی این یو) نے ڈاکٹر معید.ڈبلیو.یوسف کو تیسرا وائس چانسلر مقرر کردیا ہے۔تعلیمی شعبہ اور پالیسی سازی میں اپنی وسیع مہارت اور تعلیمی تجربہ کے ساتھ ڈاکٹر یوسف اس باوقار ادارے میں علم اور لیڈر شپ کا باعث بنیں گے۔
ڈاکٹر یوسف کا بی این یو میں چیئر پرسن بورڈآف گورنرزمسز نسرین محمود قصوری،اور بورڈ آف گورنرز کے اراکین خورشید محمود قصوری،قاسم قصوری،ڈاکٹر پرویز حسن،معین افضل اور ڈاکٹر عشرت حسین سمیت دیگر نے پرتپاک استقبال کیا۔
اپنے عہد کے سرکردہ اسکالرز میں سے ایک کے طور پر پہچانے جانے والے ڈاکٹر یوسف بھرپور علمی پس منظر رکھتے ہیں،جنہوں نے بوسٹن یونیورسٹی،جارج واشنگٹن یونیورسٹی،لاہو ر یونیورسٹی آف مینجمنٹ سائنسز،اور قائد اعظم یونیورسٹی جیسے معروف تعلیمی اداروں میں سیاسیات اور بین الاقوامی تعلقات عامہ کی تعلیم دی ہے۔وہ اپنے پورے کیریئر میں متعدد اہم عہدوں پر فائز رہے ہیں،جس میں حال ہی میں پاکستان کے سب سے کم عمر قومی سلامتی کے مشیر کے طور پر فرائض سر انجام دینا بھی شامل ہے۔وہ بوسٹن یونیورسٹی کے پرڈی اسکول اور ہارورڈ یونیورسٹی کے کینیڈی اسکول میں ریسرچ فیلو اور یو ایس یونیورسٹی آف پیس میں ایسوسی ایٹ وائس پریذیڈنٹ بھی رہ چکے ہیں۔ایک ماہر مصنف کے طور پر ڈاکٹر یوسف کی بڑے پیمانے پر تصانیف بھی موجود ہیں،ان کی آخری کتاب Brokered Bargaining
اسٹینفورڈ یونیورسٹی پریس نے 2018میں شائع کی تھی۔انہوں نے بوسٹن یونیورسٹی سے بین الاقوامی تعلقات میں ماسٹرز اورسیاسیات میں پی ایچ ڈی کی ڈگری حاصل کی ہوئی ہے۔
ڈاکٹر معید یوسف اپنے وسیع اور متنوع تجربہ،نقطہ نظر اور تعلیمی و بین الاقوامی امور میں غیر معمولی شراکت کے ساتھ بیکن ہاؤس نیشنل یونیورسٹی کے وائس چانسلر کے طور پر انمول قائدانہ تجربہ کا باعث بنیں گے۔
