کراچی : (ویب ڈیسک) گورنر سندھ کامران ٹیسوری نے سمندری طوفان کے متاثرین سے روزانہ 5 ہزار افراد کا کھانا بھجوانے کا وعدہ کر لیا۔ گورنر سندھ کامران ٹیسوری نے کراچی کے علاقے چشمہ گوٹھ ابراہیم حیدری کا ہنگامی دورہ کیا اور ماہی گیروں سمیت متاثرین میں کھانا اور راشن تقسیم کیا۔ انہوں نے اس موقع پر کہا کہ محبت بانٹنے آوں گا، ووٹ مانگنے نہیں آوں گا۔ مشکل کی گھڑی میں بھائیوں کو تنہا نہیں چھوڑیں گے۔ اس وقت ہزاروں افراد بے روز گار ہو چکے ۔ ان کے گھروں میں طوفان آنے سے قبل ہی طوفان آ چکا ہے۔ مچھلی پکڑنے اور گھڑ سواری کرنے والوں سمیت دیگر افراد کا کاروبار بند ہو چکا۔ روزانہ 5 ہزار افراد کا کھانا گورنر ہاؤس سے آئے گا۔
