مسلم لیگ (ن) کے قائد نواز شریف کی زیر صدارت اجلاس میں متعدد اہم فیصلے کیے گئے ہیں، سینیٹر عرفان صدیقی مسلم لیگ (ن) کی منشور کمیٹی کے سربراہ مقرر ہوگئے جو آئندہ عام انتخابات کے لیے پارٹی کا منشور مرتب کریں گے۔
سابق وزیراعظم نوازشریف کی زیر صدارت لاہور میں جاتی امراء رائیونڈ میں مسلم لیگ ن کی اعلیٰ قیادت کا اجلاس ہوا۔
اجلاس میں شہباز شریف، مریم نواز، حمزہ شہباز، اسحاق ڈار، ملک احمد خان، انوشہ رحمان، سلیمان شہباز، پرویزرشید، مریم اورنگزیب، خواجہ آصف، سعد رفیق، میاں جاوید لطیف، رانا تنویر حسین، احسن اقبال، سردارایاز صادق، عابد شیرعلی، عطا تارڑ اور طلال چوہدری شریک ہوئے۔
جاتی امراء میں ہونے والے مسلم لیگ ن کے مشاورتی اجلاس میں مہنگائی، فلسطین میں اسرائیلی مظالم، الیکشن کی تیاریوں، ٹکٹوں کی تقسیم، عدالتی اصلاحات اور منشور کمیٹی سمیت دیگر امور پر مشاورت ہوئی۔
اجلاس میں ن لیگ نے یکم نومبر سے قومی و صوبائی اسمبلیوں کے لیے درخواستیں طلب بھی کرلیں۔
مسلم لیگ (ن) نے رائیونڈ میں منعقدہ اجلاس میں سینیٹر عرفان صدیقی کو آئندہ انتخابات کے لئے پارٹی کا منشور مرتب کرنے کی ذمہ داری سونپ دی ہے۔
آج اجلاس میں متعدد دیگر فیصلوں کے علاوہ قائد مسلم لیگ (ن) محمد نواز شریف نے عرفان صدیقی کو مسلم لیگ (ن) کی منشور کمیٹی کا سربراہ مقرر کرتے ہوئے کہا کہ یہ منشور عوامی مسائل اور دور جدید کے تقاضوں کے مطابق ہونا چاہیئے اور اس میں انصاف کے نظام میں اہم اور بنیادی اصلاحات تجویز کی جانی چاہئیں کہ عام آدمی کو سستا، فوری اور بےلاگ انصاف مل سکے۔
اجلاس کے بعد میڈیا سے گفتگو میں پاکستان مسلم لیگ (ن) کے رہنما احسن اقبال نے بتایا کہ آج کے اجلاس میں الیکشن مہم کےبارےمیں مشاورت کی گئی ہے، کمیشن نے جنوری کے آخری ہفتے میں انتخابات کا اعلان کیا ہے، ن لیگ 10 نومبر تک پارٹی ٹکٹ کیلئے درخواستیں جمع کرے گی۔
انہوں نے بتایا کہ مسلم لیگ ن پاکستان کو درپیش مسائل کا جامع منشور پیش کرے گی، آئین کی روشنی میں انتخابات ملک کا تقاضہ ہے، عرفان صدیقی کی سربراہی میں منشور کمیٹی قائم کردی ہے، نظام انصاف میں اصلاحات ن لیگ کی ترجیح ہوگی۔
