کراچی: شوبز انڈسٹری کی معروف اداکارہ و ماڈل عائزہ خان نے فلسطین کے حق میں پوسٹ نہ کرنے کی وجہ سے شدید تنقید کے بعد اپنے مداحوں سے معافی مانگ لی۔
گزشتہ ایک ماہ سے اسرائیل کی غزہ پر وحشیانہ بمباری جاری ہے جس کے نتیجے میں 12 ہزار سے زائد فلسطینی شہید ہوچکے ہیں جن میں معصوم بچے بھی شامل ہیں۔
اسرائیل کی فلسطین پر دہشتگردی کے خلاف جہاں دُنیا بھر کے فنکار اپنی آواز بلند کررہے ہیں اور فوری طور پر غزہ میں جنگ بند کا مطالبہ بھی کررہے ہیں تو وہیں انسٹاگرام پر 13 ملین سے زائد فالوورز رکھنے والی اداکارہ عائزہ خان کی خاموشی نے اُن کے مداحوں کی محبت کو نفرت میں تبدیل کردیا۔
مداحوں نے عائزہ خان کی وجہ پوچھی تو اداکارہ نے کہا کہ اُن کے نزدیک دعا کرنا روزانہ پوسٹ کرنے سے زیادہ بہتر ہے لہٰذا زیادہ سے زیادہ دُعا کریں اور دوسروں پر انگلی اُٹھانے اور ایک دوسرے پر الزام لگانے سے گریز کریں۔
اس پوسٹ کے بعد عائزہ خان کو مداحوں کے ہاتھوں ایک بار پھر شدید تنقید کا سامنا کرنا پڑا جس کے بعد عائزہ نے اپنے انسٹاگرام اکاوْنٹ سے پوسٹ ہی ڈیلیٹ کردی۔
تاہم، اب عائزہ خان نے اس تمام تر معاملے سے متعلق اپنے آفیشل انسٹاگرام اکاوْنٹ پر ایک تفیصلی نوٹ جاری کیا ہے جس میں اُنہوں نے وضاحت دیتے ہوئے اپنے مداحوں سے معافی مانگی ہے۔
