راولپنڈی: بانی پی ٹی آئی عمران خان اور وائس چیئرمین شاہ محمود قریشی کے خلاف سائفر کیس کی سماعت بغیر کسی کارروائی کے 3 جنوری تک ملتوی کر دی گئی۔

سماعت جج ابوالحسنات ذوالقرنین کی طبیعت خرابی کے باعث ملتوی کی گئی۔

عدالتی عملہ اڈیالہ جیل میں سائفر کیس کی سماعت 3 تاریخ ڈال کر روانہ ہوگیا، شاہ محمود قریشی اور بانی پی ٹی آئی کو ملاقات کی اجازت نہیں دی گئی۔

سماعت سے قبل، جیل انتظامیہ نے بانی چئیرمین پی ٹی آئی کی بہنوں کو جیل میں جانے سے روک دیا تھا۔

عدالت کے باہر میڈیا سے گفتگو میں علیمہ خان کا کہنا تھا کہ جیل انتطامیہ بہنوں اور وکلاء کو اندر جانے کی اجازت نہیں دے رہی، شاہ محمود قریشی کے وکلاء اور فیملی جیل میں جا چکے ہیں اور ابھی تک جج بھی جیل نہیں پہنچے۔

اسلام آباد: تھری ایم پی او کے تحت گرفتاری سے متعلق کیس میں اسلام آباد ہائی کورٹ کے جسٹس بابر ستار نے کہا ہے کہ ڈی سی اسلام آباد کے پاس تھری ایم پی او جاری کرنے کا اختیار نہیں ہے۔

پاکستان تحریک انصاف کے رہنما شہریار آفریدی اور شاندانہ گلزار کی تھری ایم پی او کے تحت گرفتاری کے کیس کی سماعت اسلام آباد ہائی کورٹ میں ہوئی۔ عدالت نے شہریار آفریدی اور شاندانہ گلزار کی ایم پی او آرڈر کے خلاف درخواستیں منظور کرتے ہوئے تھری ایم او اختیارات کا پی او 18، 1980 کا قانون غیر قانونی قرار دے دیا۔

جسٹس بابر ستار نے محفوظ فیصلہ سناتے ہوئے کہا کہ ڈپٹی کمشنر اسلام آباد کے پاس تھری ایم پی او جاری کرنے کا اختیار نہیں ہے۔ تھری ایم پی کا اختیار صرف وفاقی کابینہ کے پاس ہونا چاہیے۔
بعد ازاں اسلام آباد ہائی کورٹ میں میڈیا سے گفتگو کرتے ہوئے بابر اعوان نے کہا کہ ’’جسٹس بابر ستار نے کہا ہے کہ جنہوں نے تھری ایم پی او کے تحت گرفتاری کی ان کے خلاف کراروائی ہونی چاہیے‘‘۔ بابراعوان کا کہنا تھا کہ مارشل لا کے آرڈر کے نیچے ڈپٹی کمشنر اور کمشنر کو جو پاورز دی گئیں وہ غلط ہیں۔ عدالت نے تھری ایم پی او آرڈر کو ناجائز قرار دیا ہے۔ اسلام آباد کے اندر صرف کابینہ آرڈرز پاس کرسکتی ہے ۔

بابراعوان نے کہا کہ کل شہباز شریف نے پشاور ہائیکورٹ کے اوپر حملہ کیا۔ اگر اتنی تکلیف ہے تو پشاور ہائیکورٹ میں جا کر فریق بنو پھر ہم پوچھیں گے کہ کتنے این آر اوز لیے۔ قوم مزید چوری کی اجازت نہیں دے گی یہ اس لیے الیکشن سے بھاگ رہے ہیں۔

راولپنڈی: آرمی میڈیکل کالج راولپنڈی میں تقسیم اسناد کی تقریب میں جنرل ساحر شمشاد نے اسناد اور میڈل تقسیم کیے۔

چئیرمین جوائنٹ چیفس آف اسٹاف کمیٹی جنرل ساحر شمشاد مرزا آرمی میڈیکل کالج راولپنڈی کے41 ویں کانووکیشن کے مہمان خصوصی تھی۔ انہوں نے گریجویٹس میں اسناد اورنمایاں کارکردگی دکھانے والے طلبا میں میڈلز تقسیم کیے۔

ڈاکٹرقرۃ العین نے ایم بی بی ایس کورس میں بہترین اسٹوڈنٹ کا صدارتی گولڈ میڈل حاصل کیا۔ ڈاکٹر طیبہ ظفر نے بی ڈی ایس کا صدارتی گولڈ میڈل حاصل کیا۔کیپٹن تیمور خالد کو بہترین ملٹری کیڈٹ کا چیف آف آرمی اسٹاف گولڈ میڈل دیا گیا۔
تقریب سے خطاب کرتے ہوئے چئیرمین جوائنٹ چیفس آف اسٹاف کمیٹی جنرل ساحر شمشاد نے کامیاب طلبا اور ان کے والدین کو مبارک باد دیتے ہوئے کہا کہ آرمی میڈیکل کالج کے فارغ التحصیل طلبا نے ہمیشہ اپنی ذات سے بالاتر ہو کر قوم کی خدمت کی ہے۔

اسلام آباد: پاکستان نے چینی پاور پلانٹس پر عائد صوابدیدی جرمانے ختم کرنے کیلیے ان سے کیے گئے معاہدوں میں ترمیم کرنے کی منظوری دے دی۔

کابینہ کی اقتصادی رابطہ کمیٹی نے وزارت توانائی کو یہ اختیار دیا ہے کہ وہ سی پیک کے تحت قائم کیے گئے چینی پاور پلانٹس سے بجلی خریداری کے ضمنی معاہدے کرسکتی ہے۔
ان معاہدوں کی رو سے ایندھن کی عدم دستیابی کی بناء پر بجلی کی فراہمی نہ ہونے پر پاکستان چینی کمپنیوں پر جرمانے عائد نہیں کرسکے گا، جبکہ چینی سرمایہ کار بجلی کی عدم فراہمی کے اس دورانیے کے دوران کیپیسیٹی چارجز یا کسی قسم کا منافع نہیں مانگیں گے۔

واضح رہے کہ پاکستان کی جانب سے ان پاور پلانٹس کو ایندھن کی خریداری کیلیے ڈالرز کی عدم فراہمی کی وجہ سے یہ پاور پلانٹس بند پڑے ہیں اور بجلی کی پیداوار کرنے سے قاصر ہیں، بجائے اپنی غلطی تسلیم کرنے کے، حکومت نے الٹا چینی پاورپلانٹس پر جرمانے عائد کر دیے ہیں۔

حکومت نے پورٹ قاسم الیکٹرک پاور کمپنی پر اس مد میں 21 ارب روپے کا جرمانہ عائد کررکھا ہے، اس کے علاوہ اقتصادی رابطہ کمیٹی نے تاپی گیس پائپ لائن منصوبے پر بھی تفصیلی بحث کی، جس کے بعد فورم اس نتیجے پر پہنچا کہ یہ بہت اہم پراجیکٹ ہے اور اسے مزید کوئی تاخیر کیے بناء فوری طور پر لانچ کیا جانا چاہیے، تاہم، اس بات کا مشاہدہ کیا گیا کہ فیپا ایکٹ کے تحت پراجیکٹ کو شامل کرنے کیلیے قانونی پہلوؤں پر مزید غور و خوض کی ضرورت ہے۔

واضح رہے کہ وزارت توانائی نے ترکمانستان، افغانستان، پاکستان اور بھارت گیس پائپ لائن منصوبے کو اسپیشل فارن انویسٹمنٹ پروموشن اینڈ پروٹیکشن ایکٹ کے تحت لانے کی تجویز دی ہے۔

ذرائع کا کہنا ہے کہ اقتصادی رابطہ کمیٹی آئی ایم ایف کی جانب سے عائد کی گئی پابندیوں کی وجہ سے اس تجویز سے متفق نہیں ہے۔

ای سی سی نے وزارت سمندرپار پاکستانیز اور انسانی وسائل کی ترقی کی سمری پر بھی غور کیا، جس میں ای او بی آئی کے بجٹ کی منظوری کیلیے کہا گیا تھا، ای سی سی کو بتایا گیا کہ گزشتہ برسوں میں ای او بی آئی کی کلیکشن جمود کا شکار تھی، لیکن حالیہ برسوں میں اس میں 100ارب روپے کا نمایاں اضافہ ہوا ہے۔

ای سی سی نے پرفارمنس کو سراہتے ہوئے بجٹ کیلنڈر کو فالو کرنے اور پینشن کی مد میں 2 ہزار ارب روپے کے واجبات کی ادائیگیوں کو ممکن بنانے کی ہدایت کی، ای سی سی نے تجویز کردہ بجٹ منظور کرلیا۔

ادارہ شماریات نے ای سی سی کو مہنگائی کی تازہ ترین صورتحال پر بریفنگ دی، ای سی سی نے پرائس کنٹرول کمیٹیوں کو فعال کرنے کی ہدایت کی اور سندھ اور بلوچستان میں عدم فعالیت پر تحفظات کا اظہار کیا۔