پیساڈینا، کیلیفورنیا: (ویب ڈیسک) ناسا اور دیگر اداروں کے مطابق اب سے 50 ہزار سال قبل زمین کے قریب سے گزرنے والا ایک روشن دمدار ستارہ گزشتہ سال مارچ میں دریافت ہوا تھا اور اب اچھی خبر یہ ہے کہ یکم سے تین فروری تک وہ زمین سے اتنے فاصلے سے گزرے گا کہ کسی دوربین کے بغیر بھی دیکھا جاسکتا ہے۔
اس کامٹ کا نام C/2022 E3 (ZTF) ہے جو 12 جنوری کو سورج کے قریب ترین آجائے گا اور یکم تا تین فروری 2023 تک زمین کے قریب ہوگا۔ تاہم گہرے تاریک آسمانوں والے مقامات (ڈارک اسکائی) سے ہی انہیں دیکھا جاسکتا ہے۔ اس کے بعد دھیرے دھیرے وہ مزید مدھم ہوجائے گا جس کے بعد دیکھنے کے لیے ایک چشمی یا دوچشمی دوربین کی ضرورت ہوگی۔
ناسا کے مطابق شمالی نصف کرے (ناردرن ہیمسفیئر) میں صبح کے وقت دکھائی دے گا، لیکن یہ عمل جنوری میں ہوگا۔ اس کے بعد فروری کی ابتدا میں جنوبی نصف کرے میں بھی دیکھا جاسکے گا۔ توقع ہے کہ 21 جنوری کو نئے چاند کے ساتھ سیاہ پس منظر اور صاف مطلع میں اس کا اچھا نظارہ ممکن ہوگا۔
ناسا کی مشہور جیٹ پروپلشن لیبارٹری نے اپنے بیان میں کہا ہے کہ یہ دمدارستارہ ہر 50 ہزار برس بعد زمین کے قریب سے گزرتا ہے اور توقع ہے کہ زمین سے 4 کروڑ 20 لاکھ کلومیٹر کی دوری سے گزرے گا جو غالباً دو فروری کا دن ہوگا۔

اونٹاریو: (ویب ڈیسک) جامعہ واٹرلو کے ماہرین نے وائی فائی استعمال کرتے ہوئے دیوار کے آرپار دیکھنے والا ایک نظام بنایا ہے اور اس پر لگائے جانے والے اضافی ہارڈویئر کی قیمت صرف 20 ڈالر ہے۔
اسے وائی پیپ (وائی تاکا جھانکی) کا نام دیا گیا ہے جسے جامعہ کے سائنسداں علی عابدی کی ٹیم نے تیار کیا ہے۔ وائی پیپ نامی ڈرون عمارتوں کے قریب جاتا ہے اور وہاں رہنے والوں کے وائی فائی نیٹ ورک استعمال کرکے فوری طور پر وائی فائی سے چلنے والے دیگر آلات کی شناخت کرسکتا ہے۔
وائی پیپ درحقیقت وائی فائی نیٹ ورک کی خامیوں اور کمزوریوں کی شناخت کرسکتا ہے جسے انہوں نے وائی پولائٹ کا نام دیا ہے۔ اگر عمارت کے اندر کا وائی فائی نظام پاس ورڈ سے بھی محفوظ ہو تب بھی اڑن آلہ اس سے رابطہ کرسکتا ہے۔ اس کے لیے وائی پیپ ڈیوائس پر کئی پیغامات بھیجتا ہے اور ہر وقت اس کا ردِ عمل نوٹ کرتا ہے اس طرح ایک میٹر کی درستگی سے گھر یا بلڈنگ کے اندر نصب وائی وائی ڈیوائس کی شناخت ہوجاتی ہے۔
ڈاکٹر علی نے اسے ایک اہم کاوش قرار دیا ہے۔ ’ ہم وائی فائی کو روشنی سمجھتے ہیں اور دیواروں کو شفاف شیشہ کیونکہ اس کی بدولت بینکوں کے اندر سیکیورٹی گارڈ کی حرکت اور عام افراد کے بیٹھے کی جگہ کے ساتھ ساتھ اندر چلنے والے سارے فون، اسمارٹ واچ اور دیگر وائی فائی آلات گنے جاسکتے ہیں۔‘
ایک چالاک مجرم گھریا عمارت کے اندر سیکیورٹی کیمروں، لیپ ٹاپ اور اسمارٹ ٹی وی کا پتا بھی لگاسکتا ہے۔ اس طرح چاردیواری کے اندر گھسنے کے کمزور مقامات بھی معلوم کئے جاسکتے ہیں جو باہر سے ہی دیکھے جاسکتے ہیں۔
اس ایجاد کا سب سے اہم پہلو یہ ہے کہ عام ڈرون پر کچھ اضافی آلات لگاکر اسے تیار کیا گیا ہے جس کی قیمت 20 ڈالر سے زیادہ نہیں۔ تاہم اس سے ادارے اپنی سیکیورٹی کمزوریوں کو بہتر بناسکتے ہیں۔
وائی پیپ کی کامیاب آزمائش بھی کی گئی ہے اور یہ عین وہی کام کرسکتا ہے جس کا منصوبہ بنایا گیا تھا۔ تاہم ڈاکٹر علی عابدی چاہتے ہیں کہ اس ایجاد سے ادارے اور کمپنیاں کسی طرح اپنی سیکیورٹی بہتر بنائیں۔