Yearly Archives: 2023

پاکستان

اسٹیل ملز کی 1500 ایکڑ زمین صنعتی پارک کیلیے مختص کردی، گوہراعجاز

کراچی: نگران وفاقی وزیر تجارت گوہر اعجاز نے کہا ہے کہ اسٹیل ملزکی 1500 ایکڑ زمین انڈسٹریل پارک کیلیے مختص کی گئی ہے اور اس کی ترقی سی پیک کے تحت چینی حکام کو تفویض کی گئی تھی۔

سرکاری اعلامیے کے مطابق نگران وزیراعلیٰ سندھ جسٹس (ر) مقبول باقر اور گوہر اعجاز کے درمیان وزیراعلیٰ ہائوس میں ملاقات ہوئی جس میں کراچی میں مزید صنعتی پارکس کے قیام کی ضرورت پر تبادلہ خیال کیا گیا۔

گوہر اعجاز نے کہا وفاقی حکومت نے اپنے صنعتی یونٹس قائم کرنے کیلیے اسے چینی حکام کے حوالے کرنے کا منصوبہ تیار کر لیا ہے۔

وزیر اعلیٰ نے کہا کہ صنعت کاری ہی معیشت کو ترقی دینے اور روزگار کے مواقع پیدا کرنے کا واحد حل ہے اور یقینا اس سے خوشحالی و ترقی کے نئے راستے کھلتے ہیں۔

پاکستان

سال 2023؛ انٹربینک میں ڈالر کی نسبت روپیہ کی قدر میں 24.47فیصد کمی

کراچی: سال 2023 میں بھی انٹربینک میں ڈالر کی نسبت روپیہ کی قدر میں مجموعی طور پر 24.47فیصد کی کمی ریکارڈ کی گئی۔

ملک کو درپیش مالیاتی مشکلات، معیشت وسیاست کی غیر واضح سمت کے باعث کلینڈر سال 2023 میں بھی انٹربینک میں ڈالر کی نسبت روپیہ کی قدر میں مجموعی طور پر 24.47فیصد کی کمی ریکارڈ کی گئی جبکہ اوپن مارکیٹ میں روپے کی قدر 20.05فیصد گھٹ گئی، دیگر اہم غیرملکی کرنسیوں میں شامل پاؤنڈ اور یورو کی اڑان بھی تیز رفتار رہی اور کیلنڈر سال کے بیشتر دورانیئے میں روپیہ چاروں شانے چت رہا۔

کلینڈر سال 2023 کے دوران انٹربینک مارکیٹ میں ڈالر کی قدر مجموعی طور پر 55.43 روپے کے اضافے سے سال کے اختتام پر 281.86روپے کی سطح پر بند ہوئی جبکہ اوپن کرنسی مارکیٹ میں ڈالر کی قدر 47.22روپے کے اضافے سے 282.72 روپے پر بند ہوئی۔

علاوہ ازیں کلینڈر سال 2023 کے ابتدائی 8ماہ میں معیشت کی دگرگوں صورتحال، ملک کو درپیش مالیاتی بحران اور غیریقینی کاروباری حالات کے باوجود سال2023پاکستان اسٹاک ایکس چینج کے لیے بلحاظ سرمایہ کاری انتہائی خوش کن ثابت ہوا۔

یہاں یہ امر قابل ذکر ہے کہ اگست میں نگراں حکومت کی آئی ایم ایف پروگرام کی بحالی کیلیے سخت فیصلوں، قانون نافذ کرنے والے اداروں کے ہمراہ مختلف نوعیت کے اقدامات، ہر شعبے میں انسداد اسمگلنگ کی سخت مہمات نے سال کے اختتامی 4ماہ ستمبر تا دسمبر کی مدت میں مارکیٹ کو نئی تاریخ ساز بلندیوں پر پہنچایا۔

سال 2023 میں ہنڈریڈ انڈیکس کا پہلا ریکارڈ 30اکتوبر کو 51482 پوائنٹس کے ساتھ قائم ہواجس کے بعد آئی ایم ایف حکام کا پاکستان کی معیشت کا جائزہ مکمل ہونے اور اسٹاف لیول کا معاہدہ طے پانے کے باعث 29نومبر کو ہنڈریڈ انڈیکس 60502پوائنٹس کے ساتھ نئی بلند ترین سطح پر پہنچ گیا اور بعدازاں 12دسمبر کو ہنڈریڈ انڈیکس 66426پوائنٹس کے ساتھ نئی بلند ترین سطح پر بھی آگیا تھا۔

بیرونی ادائیگیوں کے دباؤ سے گذشتہ ہفتے بھی ڈالر کی قدر میں بڑی نوعیت کی کمی نہ ہوسکی، ریمیٹنسز کی آمد اور برآمدی آمدنی کے تناسب سے درآمدی ضروریات پوری کرنے کی پالیسی سے روپیہ تگڑا رہا، ادائیگیوں کو متوازن بنانے کی حکمت عملی بھی ڈالر کو قابو کرنے میں کارگر ثابت ہوئی۔

کرنٹ اکاؤنٹ خسارے میں کمی نے روپے پر مثبت اثرات مرتب کیے، ہفتہ وار کاروبار میں ڈالر کے انٹربینک ریٹ 282 روپے سے نیچے آگئے، اوپن ریٹ 283، 284روپے سے نیچے آگئے،ڈالر کے انٹربینک اور اوپن ریٹ کے درمیان فرق گھٹ کر 86 پیسے رہ گیا۔

علاوہ ازیں لیوریج کی بلند سطح پر سودوں کے تصفیوں کے باوجود گذشتہ ہفتے پاکستان اسٹاک ایکس چینج میں اتار چڑھاؤ کے باوجود تیزی رہی، غیریقینی سیاسی حالات سے ہفتے کے ایک ابتدائی سیشن میں ملکی تاریخ میں پہلی بار ایک روزہ کاروبار میں 2534پوائنٹس کی تاریخ ساز مندی بھی ہوئی، کلینڈر سال کے اختتام کی وجہ سے بعض شعبوں نے سرمائے کے انخلا کو ترجیح دی۔

ہفتے کے 4روزہ سیشنز میں ایک سیشن میں بڑی نوعیت کی مندی 3سیشنز میں تیزی رہی، مجموعی طور پر تیزی سے انڈیکس کی 62000 پوائنٹس کی نفسیاتی سطح گرنے کے بعد دوبارہ بحال ہوگئی، تیزی کے سبب حصص کی مالیت ایک کھرب 15ارب 69کروڑ 99لاکھ 44ہزار 069روپے بڑھ گئی۔

شوبز

2023 میں شادی کرنیوالے پاکستانی اسٹارز

آج سال 2023 کا آخری دن ہے، یہ سال جاتے جاتے ہمیں کئی یادیں دے کر جارہا ہے، یہ سال کچھ شوبز شخصیات کے لیے بُرا سال ثابت ہوا جنہوں نے اپنی شادی شدہ زندگی کو طلاق پر ختم کیا جبکہ کئی پاکستانی اسٹارز نے رواں سال اپنے لیے جیون ساتھی کا انتخاب کرکے اپنی زندگی کے نئے سفر کا آغاز بھی کیا۔

آج رات 12 بجے کے بعد لوگ سالِ نو 2024 کا جشن مناتے ہوئے خوش آمدید کہیں گے، نئے سال کے شروع ہونے سے پہلے اُن پاکستانی شوبز شخصیات پر پر نظر ڈالتے ہیں جنہوں نے 2023 میں شادیاں کیں۔

ہم اُن پاکستانی شوبز شخصیات کی فہرست دے رہے ہیں جنہوں نے رواں سال شادی کرکے اپنی زندگی کے نئے سفر کی شروعات کی۔

حرا خان اور ارسلان خان:

پاکستان شوبز انڈسٹری کی اُبھرتی ہوئی نوجوان اداکارہ حرا خان اور اداکار ارسلان خان نے رواں سال 13 فروری کو اپنی محبت کو شادی کے خوبصورت رشتے میں تبدیل کیا، اس جوڑی کی شادی سوشل میڈیا پر توجہ کا مرکز بنی جبکہ شادی کے بعد سے یہ جوڑی سوشل میڈیا پر کافی متحرک نظر آتی ہے۔

اُشنا شاہ:

معروف اداکارہ اُشنا شاہ نے رواں سال 26 فروری کو اپنے دوست اور پاکستانی گالفر حمزہ امین سے شادی کی، اُنہوں نے اپنی شادی پر بھارتی اسٹائل کا لہنگا زیب تن کیا تھا، انہیں اپنی شادی کے لباس اور رقص کرنے پر ناقدین کی جانب سے شدید تنقید کا بھی سامنا کرنا پڑا تھا۔

کومل رضوی:

پاکستان کی معروف گلوکارہ کومل رضوی نے رواں سال 21 اپریل کو امریکا میں مقیم ملین ڈالر کمپنی کے سی ای او اور شریک بانی ایس علی اُپل سے دوسری شادی کرکے اپنی نئی زندگی کا آغاز کیا، کومل رضوی نے 2019 میں اپنے پہلے شوہر سے علیحدگی اختیار کر لی تھی۔

مدیحہ امام:

معروف پاکستانی وی جے اور اداکارہ مدیحہ امام نے رواں سال مئی میں بھارتی فلم میکر اور پروڈیوسر موجی بسر سے شادی کی، موجی بسر دبئی میں مقیم ہیں، اداکارہ مدیحہ امام اور ان کا نکاح سادگی سے دبئی میں ہی ہوا تھا جبکہ اس جوڑی کا ولیمہ اکتوبر میں ہوا تھا۔

عنزیلہ عباسی:

پاکستان کے معروف اداکار و ہدایت کار شمعون عباسی اور اداکارہ جویریہ عباسی کی بیٹی اداکارہ عنزیلہ عباسی نے رواں سال اگست میں شادی کی، اُنہیں بھی بارات کے لباس کی وجہ سے سوشل میڈیا پر کڑی تنقید کا نشانہ بنایا گیا تھا۔

ماہرہ خان:

پاکستان سمیت بھارت میں یکساں مقبولیت رکھنے والی صفِ اول اداکارہ ماہرہ خان نے 2 اکتوبر کو اپنے قریبی دوست سلیم کریم سے دوسری شادی کی، ماہرہ خان کی پہلی شای سال 2007 میں علی عسکری کے ساتھ ہوئی تھی جن سے اداکارہ کا ایک بیٹا اذلان بھی ہے لیکن اُن کی پہلی شادی صرف 8 سال تک رہ سکی اور 2015 میں طلاق ہوگئی تھی۔

کرن اشفاق:

ماڈل و اداکارہ کرن اشفاق نے 4 دسمبر کو اتوار کے روز لاہور میں پاکستان پیپلز پارٹی (پی پی پی) کے فوکل پرسن اور سیاسی مشیر حمزہ علی چوہدری سے دوسری شادی کی، کرن اشفاق نے سال 2018 میں پاکستان کے مشہور اداکار و میزبان عمران اشرف سے پہلی شادی کی تھی، اِن دونوں کا ایک بیٹا بھی ہے لیکن سال 2022 میں اس جوڑی کے درمیان طلاق ہوگئی تھی۔

ایمن سلیم:

سال 2021 میں ڈراما ‘چپکے چپکے’ میں ‘مشی’ کے کردار سے اداکاری کی دنیا میں قدم رکھنے والی خوبرو اداکارہ ایمن سلیم نے 22 دسمبر کو ایک پُروقار تقریب کے دوران کامران ملک نامی شخص سے نکاح کیا۔

ثنا نادر:

نجی ٹی وی چینل کے معروف ڈراما سیریل “منت مراد” میں نگی کا کردار ادا کرنے والی اداکارہ ثنا نادر شاہ نے بھی دسمبر میں نکاح کیا جبکہ دو روز قبل اُن کی رخصتی ہوئی۔

انٹر نیشنل

روس کا کا یوکرین پر اب تک کا مہلک ترین حملہ، 39 ہلاک 159 زخمی

روس نے یوکرین کے مختلف علاقوں میں تازہ فضائی حملے کیے ہیں، قریب دو برس قبل شروع ہونے والی اس جنگ کے ابتدائی دنوں کے بعد سے ان حملوں کو اب تک کے شدید ترین حملے قرار دیا جا رہا ہے۔

یوکرینی صدر وولودومیر زیلنسکی نے کہا ہے کہ 29 دسمبر کو روس کی طرف سے یوکرین میں کیے جانے والے فضائی حملوں میں کم از کم 39 افراد ہلاک جبکہ 159 دیگر زخمی ہوئے۔

قبل ازیں ہلاک ہونے والوں کی تعداد 30 بتائی گئی تھی۔

یوکرینی حکام کے مطابق ان حملوں کا نشانہ مختلف اسکول، ایک میٹرنٹی اسپتال، شاپنگ سنٹرز اور کئی ایک رہائشی بلاکس بنے۔

ان حملوں کے حوالے سے یوکرینی صدر وولودومیر زیلنسکی کا کہنا تھا کہ، ’روس نے آج اپنے ذخیرے میں موجود قریب ہر ایک ہتھیار سے ہم ‌‌پر حملہ کیا ہے۔‘

یوکرینی فوج کے اندازوں کے مطابق روس نے 158 میزائل اور ڈرون یوکرین کی طرف داغے جن میں سے 114 کو فضا میں تباہ کر دیا گیا۔

یوکرینی ایئرفورس کے ترجمان یوری اِگنیٹ نے خبر رساں ادارے ”اے ایف پی“ کو بتایا کہ یہ روس کی طرف سے جنگ کے ابتدائی دنوں کے علاوہ اب تک کا سب بڑے میزائلوں کی ریکارڈ تعداد کے ساتھ کیا گیا حملہ تھا۔

یوکرینی وزیر داخلہ ایگور کلیمنکو نے ٹیلی گرام پر لکھا، ’یوکرینی سرزمین پر صبح کے وقت روس کے بڑے حملے کے نتیجے میں اب تک 30 افراد ہلاک ہو چکے ہیں اور 160 سے زائد زخمی ہیں۔‘

روسی فوج کے مطابق اس نے گزشتہ ہفتے کے دوران یوکرین میں فوجی تنصیبات پر ’50 گروپ حملے جبکہ ایک بڑا حملہ‘ کیا ہے، مزید یہ کہ تمام اہداف کو کامیابی سے نشانہ بنایا گیا۔

اقوام متحدہ نے ان حملوں کی مذمت کرتے ہوئے کہا ہے ان کا سلسلہ فوری طور پر روکے جانے کی ضرورت ہے۔

اقوام متحدہ نائب سیکرٹری جنرل محمد خیاری نے کہا کہ، ’افسوس کے ساتھ، آج کے خوفناک حملے روسی فیڈریشن کی طرف سے جاری حملوں کے سلسلے میں تازہ ترین ہیں۔‘

دوسری جانبر روسی شہر بیلگرود میں یوکرینی فضائی حملوں میں ایک شخص ہلاک جبکہ چار دیگر زخمی ہوگئے۔

یوکرینی سرحد کے قریب واقع بیلگرود ریجن کے گورنر کے مطابق جمعہ کو کیے گئے حملوں میں شہر میں پانی کی سپلائی کے نظام کو بھی نقصان پہنچا۔

روسی وزارت دفاع کے مطابق گزشتہ شب ماسکو ریجن سمیت چار مختلف علاقوں میں یوکرین کے 32 ڈرونز کو مار گرایا گیا۔

اہم خبریں, پاکستان

2023: نگراں حکومت اور عسکری قیادت کے اقدامات کے باعث ملک معاشی ترقی کی راہ پر گامزن رہا

نگراں حکومت اور عسکری قیادت کے اقدامات کے باعث ملک معاشی ترقی کی راہ پر گامزن ہے، جہاں پاکستان اقتصادی ڈیفالٹ کی طرف بڑھتا ہوا دکھائی دے رہا تھا، وہیں اب مثبت اقدامات کی بدولت ملکی معیشت کے مثبت اشاریے سامنے آنا شروع ہوگئے ہیں۔ امید کی جاسکتی ہے کہ آنے والے ماہ و سال میں معیشت مستحکم ہوگی۔

مالی سال 2023 کے دوران پاکستان نے مثبت معاشی اشاریوں کی ایک لہر دیکھی ہے، ملک مختلف شعبوں میں نمایاں کامیابیوں کے ساتھ خوش حالی کی راہ پر گامزن ہے۔

بین الاقوامی مالیاتی فنڈ (آئی ایم ایف) نے7 بلین ڈالر کے قرض کی منظوری کے ساتھ مدد فراہم کی ہے۔

سال کے آخری روز اسٹاک ایکس چینج میں کاروباری انڈیکس 62 ہزار 512 پوائنٹس کی سطح پر رہا، رواں سال 3 نومبر کو ساڑھے چھ سال کے بعد انڈیکس 53 ہزار پوائنٹس کی حد بھی عبور کر گیا تھا۔

پاکستان سٹاک ایکسچینج میں سال 2023 میں 2472 ارب روپے کا کاروبار ہوا اور مارکیٹ کیپٹلائزیشن 2562 ارب سے روپے بڑھ کر 9062 ارب روپے ہو گئی۔

پاکستان سٹاک ایکسچینج میں رواں سال میں 79 ارب 48 کروڑ شیئرز کے سودے ہوئے۔

ٹاپ لائن سیکیورٹیز نے 2023 میں سب سے زیادہ منافع دینے والے اثاثوں کی فہرست بھی جاری کی تھی۔

رواں سال اکتوبر میں پاکستانی سٹاک مارکیٹ دنیا کی بہترین مارکیٹ کے طور پر سامنے آئی۔

جولائی تا اکتوبر کے دوران فیڈرل بورڈ آف ریونیو نے ہدف سے زیادہ ٹیکس اکٹھے کئے۔

دسمبر میں پاکستانی کپاس کی پیداوار 8 ملین بیلز رہی جو کہ گزشتہ سال کی نسبت 74 فیصد زیادہ ہے۔

انٹربینک میں ڈالر 281 روپے اور اوپن مارکیٹ میں ڈالر 283 روپے تک پہنچ چکا ہے۔

پیٹرولیم مصنوعات کی قیمتوں میں بھی نمایاں کمی آئی ہے، جبکہ طویل عرصے کے بعد زرمبادلہ کے ذخائر تسلی بخش سطح پر پہنچے ہیں۔

سعودی آرامکو دنیا کی سب سے بڑے سنگل ہائیڈرو کاربن نیٹ ورک کی مالک کمپنی ہے، وافی انرجی سعودی عرب کی مشہور کمپنی ہے جس کا کام فیول سٹیشنز کی دیکھ بھال کرنا ہے۔

دونوں کمپنیوں نے پاکستان میں سرمایہ کاری کا عندیہ دیا ہے۔

2024 میں جی ڈی پی کی شرح نمو 2.5 فیصد تک پہنچ جائے گی۔

پاکستان

942 روپے نہ دینے پر مجھے نا اہل قرار دیا، شیخ رشید

عوامی مسلم لیگ کے سربراہ شیخ رشید کا کہنا ہے کہ مری کے ریسٹ ہاؤس میں رہنے پر 942 روپے بقایاجات نہیں دیے، 942 روپے نہ دینے پر مجھے نا اہل قرار دیا گیا۔

ایپنے ایک ویڈیو پیغام میں شیخ رشید نے کہا کہ 50 سال میں کسی بھی ریسٹ ہاؤس میں نہیں ٹھہرا، اگر یہ ثابت ہو گیا تو سیاست سے دستبردار ہو جاؤں گا۔

گزشتہ روز عوامی مسلم لیگ کے سربراہ اور سابق وفاقی وزیر داخلہ شیخ رشید اور ان کے بھتیجے شیخ راشد شفیق کے قومی اسمبلی کے دونوں حلقوں این اے 56 اور این اے 57 سے کاغذات نامزدگی مسترد کردیے گئے تھے۔

شیخ رشید کا کہنا تھا کہ میں اپنے حق کیلئے لڑوں گا، مجھے حلقہ این اے 56 اور 57 سے الیکشن لڑنا تھا، مجھے پی ٹی آئی ووٹرز کی بھی حمایت حاصل تھی، میری واضح کامیابی دیکھتے ہوئے مجھے نااہل قرار دیا گیا۔

انہوں نے مطالبہ کیا کہ فیصلے کی کاپی فراہم کی جائے تاکہ حق کیلئے سپریم کورٹ جاؤں۔

انہوں نے کہا کہ اپنے حق کیلئے آخری دم تک آئینی و قانونی لڑائی لڑتا رہوں گا۔

انہوں نے دعویٰ کیا کہ حلقہ این اے 56 اور 57 سے قلم دوات تاریخی کامیابی سے جیتے گی، سازشی دوبارہ لندن جائیں گے اور پی ڈی ایم کو بھاگنے کا راستہ نہیں ملے گا۔

شیخ رشید نے کہا کہ ہم پاکستان میں جئیں گے اور پاکستان میں مریں گے۔

اہم خبریں

نان فائلرز کی موبائل سمیں بلاک کرنے اور بجلی کنیکشن کاٹنے کی تاریخ آگئی

فیڈرل بورڈ آف ریونیو (ایف بی آر) کی جانب سے اعلان کردہ نان فائلرز کے بجلی کنیشنز اور موبائل سمیں بند کرنے کی تاریخ آگئی ہے۔

ایف بی آر کے چیئرمین امجد زبیر ٹوانہ کا کہنا نہے کہ موبائل فون سمز بلاک کرنے اور نان فائلرز کے یوٹیلٹی کنکشن منقطع کرنے کا عمل جنوری 2024 میں شروع ہو جائے گا۔

ہفتہ کو ایف بی آر ہیڈ کوارٹر میں بات کرتے ہوئے زمجد زبیر نے بزنس ریکارڈر کو بتایا کہ کنیکشن کاٹنے اور موبائل سمیں بلاک کرنے کی مشق جنوری 2024 میں نافذ ہو جائے گی۔

ایف بی آر کی جانب سے نان فائلرز کو جاری کیے گئے نوٹسز کا جواب دینے کی آخری تاریخ 28 اور 29 دسمبر 2023 تھی۔

اس کے بعد ایف بی آر ایک عام آرڈر جاری کرے گا جس میں ان نان فائلرز کے نام ہوں گے جن کے بجلی اور گیس کے کنکشن منقطع کردیئے جائیں گے۔

نان فائلرز کو نوٹس جاری ہونے کے بعد نام جاری کرنا قانونی تقاضا ہے۔

اس کے بعد بجلی/گیس کے کنکشن منقطع کرنے اور سموں کو بلاک کرنے کا عمل شروع کر دیا جائے گا۔

ایف بی آر کو بجلی کے بل نہ رکھنے والے نان فائلرز کے خلاف کارروائی کا چیلنج درپیش ہوگا۔

ایسے معاملات بھی ہیں جہاں کوئی شخص نان فائلر یا ٹیکس ڈیفالٹر ہے، لیکن بجلی کا کنکشن اس کے والد یا خاندان کے کسی اور فرد کے نام پر ہے۔

ٹیکس مشینری کسی ایسے شخص کا بجلی کا کنکشن منقطع کرنے کے لیے سخت محنت کرے گی جو دراصل نان فائلر ہے۔

حکام کو ٹیکس کی بنیاد وسیع کرنے کی جاری مشق کے تحت 1.5 ملین نئے فائلرز کو ٹیکس نیٹ میں شامل کرنے کی امید ہے۔

چیئرمین ایف بی آر نے بزنس ریکارڈر سے بات کرتے ہوئے کہا کہ ایف بی آر کی کارکردگی میں بڑی رکاوٹ محدود وسائل ہیں۔ وافر وسائل کی دستیابی کے بعد ایف بی آر کے ریونیو کی وصولی میں مزید اضافہ ہوگا۔

اب تک ایف بی آر نے جولائی تا دسمبر (2023-24) کے دوران 4,425 ارب روپے کے ہدف کے مقابلے میں 4,456 ارب روپے اکٹھے کیے ہیں، جو 31 ارب روپے کے اضافے کو ظاہر کرتا ہے۔

امجد زبیر ٹوانہ نے کہا کہ ایف بی آر زیر جائزہ مدت کے دوران 4,475 بلین روپے تک پہنچنے کے لیے پراعتماد ہے۔

ایف بی آر کے چیئرمین نے کہا کہ 2023-24 کی دوسری ششماہی (جنوری تا جون) میں محصولات کی وصولی کی رفتار بڑھے گی۔

گزشتہ مالی سال کے دوران، ایف بی آر نے 2022-23 کی پہلی ششماہی کے دوران کل کلیکشن کا 45 فیصد اکٹھا کیا۔

ایف بی آر کو دسمبر 2023 کے دوران 975 ارب روپے کا ہندسہ عبور کرنے کا یقین ہے۔ دسمبر کا ہدف 967 ارب روپے تھا۔ ایف بی آر دسمبر کے مہینے کے ساتھ ساتھ جولائی تا دسمبر 2023-24 کے دونوں اہداف حاصل کرے گا۔

یہ ایک آرام دہ پوزیشن کو ظاہر کرتا ہے کہ ایف بی آر نے پہلے چھ ماہ (جولائی تا دسمبر) 2023-24 کے دوران کل ریونیو کا 47.5 فیصد اکٹھا کیا ہے۔ اس طرح 2023-24 کی آخری دو سہ ماہیوں میں تقریباً 52 فیصد ریونیو اکٹھا کیا جائے گا۔

ہدف کے حصول کے باوجود دسمبر 2023 میں وصولی کا سب سے اہم پہلو یہ ہے کہ براہ راست ٹیکسوں کی مجموعی وصولی میں ود ہولڈنگ ٹیکس کا حصہ 50 فیصد تک کم کر دیا گیا ہے۔ پچھلے ایک دو سالوں کے دوران متعدد ود ہولڈنگ ٹیکسز کو بھی ختم کر دیا گیا ہے۔

دوسری جانب، 2023-24 کے پہلے چھ ماہ کے دوران ایڈوانس ٹیکسز اور اسیسمنٹ کے باعث ایف بی آر کی اپنی کوششوں سے ٹیکس وصولی میں نمایاں اضافہ ہوا ہے۔

درآمدات اور گھریلو ٹیکسوں کے تناسب سے یہ بات سامنے آئی کہ تقریباً 40 فیصد ٹیکس درآمدات سے آرہے ہیں، جبکہ 60 فیصد گھریلو سطح سے۔

چیئرمین ایف بی آر نے کہا کہ ٹیکس دہندگان کو دی جانے والی سہولت اس حقیقت سے عیاں ہے کہ جولائی تا دسمبر (2023-24) کے دوران کل ریفنڈز 230 ارب روپے رہے جو کہ 2022-23 کے اسی عرصے کے دوران 177 ارب روپے کے مقابلے میں 53 ارب روپے اضافہ کو ظاہر کرتا ہے۔

پچھلے مالی سال کی اسی مدت کے مقابلے 2023-24 کی پہلی ششماہی کے دوران ریفنڈز کی ادائیگی میں 30 فیصد کا بڑا اضافہ ہوا ہے۔

ایف بی آر نے تصدیق کی ہے کہ نچلی سطح پر ریفنڈ کی ادائیگیوں میں بد انتظامی کے عنصر کو مؤثر طریقے سے کنٹرول کیا ہے۔

امجد زبیر ٹوانہ نے کہا کہ ’یہ آئی ایم ایف کی شرائط میں سے ایک ہے کہ ریفنڈز کی رقم جمع ہونے یا اسٹاک سے بچنے کے لیے مخصوص حد کے اندر ادا کی جائے۔ ہم نے 2023-24 کے پہلے چھ مہینوں کے دوران آئی ایم ایف کے ساتھ طے شدہ رقم کی واپسی کی ادائیگیوں کی بینچ مارک حد کو پورا کر لیا ہے‘۔

دسمبر 2023 میں، کل ٹیکس وصولی میں براہ راست ٹیکس کا حصہ 60 فیصد رہا، جو بالواسطہ ٹیکسوں پر کم انحصار کو ظاہر کرتا ہے۔ پہلے چھ مہینوں (جولائی تا دسمبر) 2023-24 کے دوران کل ٹیکس وصولی میں براہ راست ٹیکسوں کی وصولی کا حصہ 49 فیصد ہے۔

اس کے ساتھ ہی، براہ راست ٹیکسوں میں ودہولڈنگ ٹیکس کا حصہ کم کیا گیا ہے اور زیر جائزہ مدت کے دوران مجموعی ٹیکس وصولی میں براہ راست ٹیکسوں کا حصہ بڑھایا گیا ہے۔

انہوں نے کہا کہ ایڈوانس ٹیکس کی ادائیگی ٹیکس دہندگان کی آمدنی کے تناسب کی بنیاد پر کی گئی ہے۔

تازہ ترین ٹیکس سال کے مؤثر آڈٹ اور تشخیص کے ذریعے آمدنی کا تناسب بڑھا ہے۔

ٹیکس انتظامیہ میں جاری اصلاحات کے بارے میں چیئرمین ایف بی آر نے تصدیق کی کہ ان لینڈ ریونیو سروس سے الگ کسٹمز بورڈ کے قیام کی تجویز ہے جو حکومت کے زیر غور ہے۔

انہوں نے کہا کہ فاسٹ موونگ کنزیومر گڈز کے سیکٹر میں ڈیجیٹل انوائسنگ کا پائلٹ پراجیکٹ جنوری 2024 میں شروع کیا جائے گا۔ تمام امپورٹرز، مینوفیکچررز، ہول سیلرز/ڈیلرز/ڈسٹری بیوٹرز اور تیزی سے چلنے والے کنزیومر گڈز کے تھوک فروش کم خوردہ فروش ایف بی آر کے الیکٹرانک سیلز ٹیکس (ای-ایس ٹی) انضمام کے نظام کے تحت کام کریں گے۔

ایک سوال کے جواب میں چیئرمین ایف بی آر نے کہا کہ ایف بی آر نے انسداد بے نامی ایڈجوڈیکیٹنگ اتھارٹی کے ممبران کی تقرری کے لیے سمری وفاقی کابینہ کو بھجوا دی ہے۔ توقع ہے کہ کابینہ آئندہ اجلاس میں سمری پر غور کرے گی۔

اہم خبریں, پاکستان

عوام نے چوتھی بار موقع دیا تو وعدہ ہے دن رات ایک کر دیں گے، شہباز شریف

شیخوپورہ: مسلم لیگ (ن) کے صدر اور سابق وزیراعظم شہباز شریف نے کہا ہے کہ اگر آپ نے اپنے ووٹ سے نواز شریف کو چوتھی مرتبہ وزیراعظم بنایا تو وعدہ ہے ہم دن رات ایک کردیں گے۔

شیخوپورہ میں جلسے سے خطاب کرتے ہوئے شہبازشریف نے کہا کہ 8 فروری کا الیکشن کوئی عام الیکشن نہیں ہے، آپ کو جذبے کے ساتھ ووٹ دینے آنا ہے۔ ووٹ ڈالتے وقت آپ کو دیکھنا ہے لیڈر کا ماضی کیا ہے۔

اُن کا کہنا تھا کہ نواز شریف نے ملک سے لوڈشیڈنگ ختم کی، دہشت گردی اور بیروزگاری کا خاتمہ کیا۔ 2013ء میں بجلی کی 20، 20 گھنٹے کی لوڈ شیڈنگ ہوتی تھی۔

شہباز شریف نے کہا کہ میرے وزیراعظم بننے کے بعد مہنگائی ہوئی مگر اسکی ذمہ دار عمران خان کی غلط پالیسیاں تھیں۔ ہم نے اللہ کے فضل سے پاکستان کو دیوالیہ ہونے سے بچایا۔ سیاست کی پرواہ نہ کرتے ہوئے ریاست کی پرواہ کی۔

انہوں نے کہا کہ پاکستانی عوام کے دلوں کی دھڑکن نواز شریف ہے۔ اگر چوتھی مرتبہ پاکستان کے عوام نے وزیر اعظم بنایا تو وعدہ ہے دن رات ایک کر دیں گے، نواز شریف کی قیادت میں پاکستان پھلے پھولے گا۔

شہبازشریف کا کہنا تھا کہ میرے لیڈر نواز شریف نے نوجوان طبقے اور بچیوں کے ہاتھ میں لیپ ٹاپ دیا، غریب کا مفت علاج کرایا اور اسپتالوں کو جدید بنایا۔ نواز شریف نے لاہور میں کڈنی اینڈ لیور ٹرانسپلانٹ انسٹیٹیوٹ بنایا۔

اہم خبریں, پاکستان

فضل الرحمان کی پرانی خواہش ہے الیکشن ملتوی ہوں، منظور وسان

  کراچی: پیپلزپارٹی کے سینئر رہنما منظوروسان نے ن لیگ کے قائد کو آڑے ہاتھوں لیتے ہوئے کہا ہے کہ نواز شریف پر بھلے کسی کا بھی ہاتھ ہو اس کو وزیراعظم بننے نہیں دیں گے۔

ایک بیان میں منظور وسان نے کہا کہ ہم بلاول بھٹو زرداری کو وزیراعظم بنائیں گے۔ جو لوگ سمجھتے ہیں کہ وہ جیتیں گے ان کا کچھ نہیں ہوگا۔ بہت کچھ ہونے والا ہے، عام انتخابات میں جیت ہماری ہے۔

پیپلز پارٹی کے سینئر رہنما کا کہنا تھا کہ فضل الرحمان کی پرانی خواہش ہے کہ الیکشن ملتوی ہوجائیں،پاکستان پیپلز پارٹی واحد جماعت ہے جو چاہتی ہے کہ الیکشن وقت پر ہوں۔

منظوروسان کا اپنے بیان میں مزید کہنا تھا کہ جب بھی اتحاد کی باتیں کی جاتی ہیں تو مجھے ہنسی آجاتی ہے، دعا ہے کہ الیکشن خیر سے ہوجائیں، سب کو الیکشن لڑنے کا حق دیا جائے۔

انٹر نیشنل

یورپ میں نیو ایئر کی خوشیاں پھیکی پڑنے کا خدشہ

فرانسیسی یونینز کی ہڑتال کے بعد جنوبی انگلینڈ کی سرنگوں میں سیلاب آنے کے بعد یورو اسٹار کی کم از کم 14 ٹرینیں منسوخ کردی گئیں جس کے باعث کرسمس اور سال نو کے موقع پر سفر کرنے والے مسافروں کی بڑی تعداد پھنس کر رہ گئی ہے۔

فرانسیسی میڈیا کے مطابق کینٹ میں ایبس فلیٹ انٹرنیشنل اسٹیشن کے قریب سیلاب کے باعث سرنگیں ڈوب گئیں۔ جس کے بعد ہفتے کو ٹرینوں کے منسوخ ہونے سے نئے سال کی آمد سے قبل ہزاروں مسافروں کو مشکلات کا سامنا ہے۔

یورو اسٹار نے ٹرینیں منسوخ ہونے پر مسافروں سے معذرت کی ہے، یہ ٹرین پیرس سے لندن، برسلز اور ایمسٹرڈیم کے لیے ایشفورڈ کے روٹ پر دوڑتی ہے۔

یاد رہے کہ محکمہ موسمیات نے ملک کے بڑے حصوں میں بارش اور برف باری کے حوالے سے انتباہ کیا تھا۔

سیلاب کی وجہ سے یہ خلل آنے سے قبل ہی فرانسیسی یونینز نے اپنی ہڑتال ختم کی تھی۔ اس ہڑتال کی وجہ سے کرسمس کی چھٹیوں پر جانے والے مسافر مشکلات کا شکار تھے اور مال بردار ٹرینیں بھی نہیں چل رہی تھیں۔

خیال رہے کہ یورو اسٹار میں فرانس کی سرکاری کمپنی ایس این سی ایف وویاجو کے 55 اعشاریہ 75 فیصد شیئر ہیں۔ یورو اسٹار کورونا وبا کے دوران تقریباً دیوالیہ ہو گئی تھی لیکن اسے اس کے شیئر ہولڈرز جن میں فرانس حکومت بھی شامل ہے، کے 29 کروڑ یورو کے بیل آؤٹ پیکج کی مدد سے بچایا گیا تھا۔