اسلام آباد: احتساب عدالت نے فواد چوہدری کا مزید 6 روزہ جسمانی ریمانڈ منظور کرلیا۔

فواد چوہدری کو احتساب عدالت کے جج محمد بشیر کے روبرو پیش کیا گیا، اس موقع پر نیب کی جانب سے اسپیشل پراسیکیوٹر عرفان بھولا، سہیل عارف اور تفتیشی افسر پیش ہوئے جب کہ فواد چوہدری کےوکیل فیصل فرید چوہدری اور دیگر بھی عدالت میں پیش ہوئے۔

پراسیکیوٹر نے عدالت میں دلائل دیتے ہوئے کہا کہ 14 روزہ ریمانڈ کی استدعا تھی جب کہ 10 دن کا ریمانڈ دیاگیا۔ مختلف پہلوؤں پر تفتیش کی گئی، کچھ انہوں نے بھی اقرار کیا۔ 8 کنال اراضی ان کے نام منتقل ہوئی، ریکارڈ کے مطابق اس کی ادائیگی ٹھیکیدار نے کی۔یہ اپنی ادائیگی کے ثبوت دینا چاہتے جو ابھی نہیں دیے۔ مزید تفتیش کرنی ہے۔ متعلقہ ٹھیکیدار اور ایکس ای این کو 2 جنوری کو بلایاہواہے۔ مختلف ریکوری بھی کرنی ہے اور مشکوک ٹرانزیکشنز سمیت دیگر شواہداکٹھے کرنے ہیں۔ لہٰذا عدالت سے استدعا ہے کہ مزید 10 دن کا ریمانڈ دیاجائے تاکہ انکوائری مکمل کرلی جائے۔
جج نے استفسار کیا کہ ان کا رویہ کیسا رہا؟ جس پر فواد چوہدری نے جواب دیا کہ 10 دن کا ریمانڈ دیا،اچھا رویہ رہا،پڑھے لکھے لوگ ہیں ۔ جب ہم آپ کے سامنے آتے ہیں، سب سے پہلے آپ اپنا دائرہ اختیار دیکھتے ہیں۔ وارنٹ میں 4 الزامات ہیں، پہلا الزام بطور وفاقی وزیر منصوبے میں مداخلت کی۔ یہ پراجیکٹ پی ایس ڈی پی کا ہے، ہائی وے کا تو ہے ہی نہیں۔

بعد ازاں احتساب عدالت نے فواد چوہدری کے جسمانی ریمانڈ میں توسیع کرنے یا نہ کرنے سے متعلق فیصلہ محفوظ کرلیا، جسے بعد میں جاری کرتے ہوئے عدالت نے فواد چوہدری کا مزید 6 روزہ جسمانی ریمانڈ منظور کرتے ہوئے ہدایت کی کہ تفتیش مکمل کرلیں اور وکلا سے ملاقات بھی کرادیں۔ عدالت نے فواد چوہدری کو 5 جنوری کو دوبارہ پیش کرنے کا حکم دیا۔

سابق وفاقی وزیر اور رہنما مسلم لیگ (ن) میاں جاوید لطیف کا کہنا ہے کہ ہم اداروں میں کسی کیخلاف مہم کو تسلیم نہیں کریں گے۔

لاہور میں میڈیا سے گفتگو کرتے ہوئے جاوید لطیف نے کہا کہ آج ایک شخص کو معصوم کہا جارہا ہے، ن لیگ سے انتخابی نشان واپس لیا گیا، پارٹی نے شیر کے نشان کے بغیر سینیٹ کا الیکشن لڑا، 2018 میں لیول پلیئنگ فیلڈ نہیں تھی لیکن کسی معصوم کا لفظ استعمال کیا گیا۔

انہوں نے کہا کہ اس وقت کسی نے نہیں کہا دو تہائی اکثریت والی جماعت سے زیادتی ہے، ہم چاہتے ہیں سب کے ساتھ انصاف ہو، جو جیل میں ہیں ان کے ساتھ بھی انصاف ہو۔

لیگی رہنما کا کہنا تھا کہ میرے خلاف شوشل میڈیا مہم چلائی جارہی ہے، مخالفین الیکشن کو متنازع بنا رہے ہیں، البتہ سب کو لیول پلینگ فیلڈ ملنی چاہیے، ہمیں صرف فیلڈ ملی ہے لیول تو ملی ہی نہیں۔

جاوید لطیف نے کہا کہ ہم اداروں میں کسی کے خلاف مہم کو تسلیم نہیں کریں گے، ڈان اور سیسلین مافیا کے الفاظ آج تک واپس نہیں لیے گئے، اداروں کو بتانا ہوگا شوشل میڈٰیا مہم کے پیچھے کون ہیں۔

سابق وفاقی وزیر نے کہا کہ مخالفین چاہتے ہیں کوئی ایسی ججمنٹ آجائے جو الیکشن پر اثر انداز ہو، ماضی میں کسی کی خواہش پر فیصلے سپریم کورٹ میں کیے گئے، الیکشن کے بغیر جمہوریت اور ملک کا نقصان ہوگا۔a

مولانا فضل الرحمان کے بیٹے اسجد محمود کی اسلام آباد میں ہونے والی تقریب ولیمہ میں سابق صدر اور شریک چیئرمین پاکستان پیپلز پارٹی آصف زرداری اورچیئرمین سینیٹ صادق سنجرانی کے مابین دلچسپ مکالمہ سُننے میں آیا۔

وائرل ویڈیو میں دیکھا جاسکتا ہے کہ آصف زرداری، مولانا فضل الرحمان اور صداق سنجرانی ایک ہی میز ہر موجود ہیں۔۔

اسی دوران آصف زرداری نے صادق سنجرانی سے سوال کیا، ’فیض چلاگیا، اب کیا کرے گا؟‘

جواب میں صادق سنجرانی فوراً سے بولے، ’آپ تو ہیں ناں‘۔ اس پر آصف زرداری نے برجستہ اپنے مخصوص انداز میں کہا، ’میں تو ۔۔۔ ہوں، ( ساتھ ہی انگوٹھے کی مدد سے میز پرٹھپے لگاتے ہوئے کہا) میرے ساتھ تُو کرتا رہا، یُوں یوں یوں‘۔

اس پر مولانا فضل الرحمان سمیت میز پر بیٹھے دیگر افراد کے قہقہے بے ساٰختہ تھے۔

سابق صدر کامزید کہنا تھا کہ ، ’سیاست میں سوچاکر، ہمیشہ ان کی بادشاہی نہیں رہتی، ہماری رہتی ہے‘۔

جنرل فیض حمید کی قبل از وقت ریٹائرمنٹ پر سرکاری بیان جاری کیوں نہیں ہوا

تقریب میں نگراں وزیراعظم انوارالحق کاکڑکے علاوہ نگراں وزیراعلیٰ پنجاب محسن نقوی، محمود خان اچکزئی، لیاقت بلوچ،اکرم درانی اور سابق وزیراعظم اجا پرویزاشرف سمیت دیگر اہم شخصیات موجود تھیں۔

کاغذات نامزدگی میں پاکستان تحریک انصاف (پی ٹی آئی) کے بانی عمران خان اور ان کی اہلیہ بشریٰ بی بی کے اثاثوں کی حیرت انگیز تفصیلات منظر عام پر آئی ہیں۔

ذرائع کے مطابق بانی پی ٹی آئی کے اثاثوں میں گزشتہ 5 سالوں میں 27 کروڑ 72 لاکھ سے زائد کا اضافہ ہوا ہے، 2018 میں عمران خان کے اثاثوں کی مالیت 3 کروڑ 86 لاکھ 94 ہزار روپے تھی، کاغذات نامزدگی کے مطابق 2023 میں ان کے اثاثوں کی مالیت 31 کروڑ 59 لاکھ 50 ہزار روپے سے زائد ہے۔

سابق چیئرمین پی ٹی آئی نے زمان پارک لاہور میں 7 کنال 8 مرلے کا گھر وراثت میں ظاہر کیا، زمان پارک کے گھر کی تعمیر پر 4 کروڑ 86 لاکھ روپے سے زائد کا خرچہ ظاہر کیا گیا۔

اسی طرح عمران خان نے بنی گالہ میں 300 کنال اراضی بطور تحفہ میں وصول ظاہر کی، بنی گالا گھر کی تزین و آرائش اور ریگولرائزیشن کی مد میں 39 لاکھ روپے سے زائد کا خرچ ظاہر کیا گیا۔

عمران خنا کی جانب سے اسلام آباد کے علاقے مہرہ نور میں 50 لاکھ روپے مالیت سے زائد کی 6 کنال 16 مرلے اراضی ظاہر کی گئی ، اسلام آباد کے شاپنگ پلازہ میں 12 کروڑ روپے سے زائد مالیت کی دکان بھی ظاہر کی گئی، 3 کروڑ چالیس لاکھ روپے سے زائد مالیت کا دو کمروں کا فلیٹ بھی اسلام آباد کے پلازے میں ظاہر کیا گیا۔

سابق چیرمین پی ٹی آئی نے بھکر میں وراثت میں ملی 188 کنال اراضی بھی کاغذات میں ظاہر کی۔

کاغذات کے مطابق سابق چیئرمین پی ٹی کسی ایک گاڑی کے مالک نہیں ہیں، ان کے پاس 3 کروڑ 15 لاکھ روپے سے زائد کیش دستی موجود ہے، اسلام آباد کے مختلف بنک اکاؤنٹس میں 6 کروڑ روپے سے زائد کی رقم ظاہر کی گئی ہے، لاکھ روپے کی چار بکریاں بھی تفصیلات میں بتائی گئی ہیں۔

کاغذات میں توشہ خانہ سے خریدی گئی قیمتی اشیاء کی قیمت 1 کروڑ 18 لاکھ 77 ہزار سے زائد ظاہر کی گئی ہے۔

کاغذات میں بشری بی بی کے نام پاکپتن اور دیپالپور میں 698 کنال اراضی ظاہر کی گئی ہے، بشری بی بی کے نام بنی گالا میں 3 کنال کا گھر بھی عمران خان کے کاغذات میں ظاہر ہے۔

بانی پی ٹی آئی نے ایف بی آر کو 2021 میں 14 کروڑ 10 لاکھ روپے سے زائد اثاثے ظاہر کئے، ایک سال کے دوران 2022 میں اثاثوں کی مالیت بڑھ کر 32 کروڑ روپے سے زائد ہو گئی۔

ایف بی آر سرٹیفکیٹ کے مطابق 2023 میں انہوں نے اثاثوں کی مالیت 31 کروڑ 59 لاکھ روپے ظاہر کی۔

سابق چیئرمین پی ٹی آئی نے اپنی تعلیمی قابلیت پولیٹیکل سائنس میں بی اے ظاہر کی ہے۔