سینئر صوباٸی وزیر مریم اورنگزیب نے لاہور کے شہریوں کے لیے ایمرجنسی الرٹ جاری کردیا، انہوں ںے شہریوں کو ماسک پہننے، کھڑکیاں و دروازے بند رکھنے کی اپیل کردی۔
ایکسپریس نیوز کے مطابق دہلی، امرتسر اور چندی گڑھ کی اسموگ تیز ہوا کے نتیجے میں لاہور میں داخل ہو رہی ہے اور گزشتہ روز ہوا تھمتے ہی لاہور کا ائیر کوالٹی انڈیکس 800 سے 191 پر آ گیا۔
اسی حوالے سے سینئر صوبائی وزیر پنجاب مریم اورنگزیب نے شہریوں سے اپیل کی ہے کہ بچے ماسک پہنیں، امرض قلب اور سانس کے مریض کھلی ہوا میں نہ جائیں، بھارت سے چلنے والی سات کلومیٹر فی گھنٹہ کی رفتار سے ہوائیں لاہور میں داخل ہونے سے آلودگی میں یک دم اضافہ ہوتا ہے، بھارتی علاقوں میں فصل کی باقیات جلانے سے آلودگی بڑھی، تیز ہوا سے لاہور کا ائیر کوالٹی انڈیکس بھی متاثر ہو رہا ہے۔
مریم اورنگزیب نے کہا کہ اسموگ کی صورت حال میں بچوں کی حفاظت اور سہولت کے لیے اسکول کا وقت صبح 8 بج کر 45 منٹ مقرر کیا گیا ہے، بچوں کو ماسک لازمی پہنائیں تاکہ انہیں موسمی شدت سے بچایا جاسکے، والدین اور اسکول انتظامیہ سے اپیل ہے کہ حفاظتی انتظامات میں غفلت نہ برتیں، والدین بچوں کو ماسک کے بغیر اسکول نہ لے جائیں، یہ بچوں کی صحت کے لیے ضروری ہے۔
انہوں ںے کہا کہ پھیپھڑوں، سانس اور دل کے امراض میں مبتلا افراد اور بزرگ کھلی فضا میں نہ جائیں، ہم سب کا تعاون ہی اس مشکل سے نجات دلانے میں سب سے اہم کردار ادا کر سکتا ہے۔
مریم اورنگزیب نے عوام سے اپنی گاڑیوں کو چیک کرنے، ٹریفک جام سے بچنے اور فصلوں کی باقیات کو نہ جلانے کی اپیل کی اور کہا کہ دھواں کرنے والی گاڑیاں کلیمپ ہوں گی، کوٸی بھٹہ زگ زیگ کے بغیر نہیں چلے گا اور آگ لگانے والے گرفتار ہوں گے، ماحولیاتی آلودگی پھیلانے والے کے خلاف شہری 1373 یا گرین ایپ پر فوری اطلاع دیں۔
