کوئٹہ: پاکستان پیپلزپارٹی پارلیمنٹیرین کے چیئرمین اور سابق صدر آصف علی زرداری نے کہا ہے کہ اگر حکومت ملی تو سوئی میں گیس پائپ لائن بچھا کر ہر گھر میں گیس فراہم کریں گے۔

تفصیلات کے مطابق ڈیرہ بگٹی میں منعقدہ پیپلزپارٹی کے جلسے سے ٹیلی فونک خطاب میں آصف زرداری نے کہا کہ پیپلزپارٹی میں شمولیت کرنے والے عمائدین کو خوش آمدید کہتا ہوں اور عوام کا شکر گزار ہوں کہ انہوں نے بھروسہ کیا۔

آصف زرداری نے کہا کہ اگر موقع ملا تو سوئی کے علاقے میں گیس پائپ لائن ڈال کر ہر گھر کو گیس فراہم کریں گے جبکہ یہاں کے نوجوانوں کو روزگار دیں گے کیونکہ عوام کی خدمت ہی پیپلزپارٹی کا منشور ہے۔

سابق صدر نے پارٹی کارکنان اور عوام سے وعدہ کیا کہ وہ نہ صرف سوئی کے علاقے کی حالت تبدیل کریں گے بلکہ جلد ڈیرہ بگٹی کے علاقے کا دورہ بھی کریں گے۔

قبل ازیں پی پی میں شامل ہونے والے سابق وفاقی وزیر داخلہ سرفراز بگٹی نے کہا کہ بلوچستان پاکستان کی تقدیر ہے، آج پاکستان کے خلاف پوری ایک مہم جوئی کے ساتھ پروپیگنڈا کیا جا رہا ہے، جس کی ہم مذمت کرتے ہیں۔

انہوں نے کہا کہ ڈیرہ بگٹی سے پیغام دے رہے ہیں کہ پاکستان ہمیشہ زندہ باد ہے اور اسے دنیا کی کوئی طاقت توڑ سکتی اورنہ ہی نقصان پہنچا سکتی ہے۔ سرفراز بگٹی نے کہا کہ پیپلز پارٹی مزدوروں کی جماعت اور مزدوروں کا مقدمہ لڑتی ہے، پی پی مزدور کو اپنے پیروں پر کھڑا کرے گی۔

انوہں نے دعویٰ کیا کہ پاکستان پیپلز پارٹی نہ صرف وفاق بلکہ بلوچستان میں واضح اکثریت کے ساتھ اپنی حکومت بنانے جا رہی ہے۔

 اسلام آباد: پاکستان نے متحدہ عرب امارات (یو اے ای) سے 2 ارب ڈالر کا قرض رول اوور کرنے کی درخواست کردی ہے۔

وزارت خزانہ ذرائع کے مطابق نگران حکومت نے2 ارب ڈالر کا قرض رول اوور کرنے کے لیے متحدہ عرب امارات کے صدر کو خط لکھا ہے۔

ذرائع وزارت خزانہ نے بتایا کہ یو اے ای سے ملنے والے قرض کی ادائیگی 17 جنوری کو کرنی ہے جس کی شرح تین فیصد ہے، اسی طرح دوسری رقم ایک ارب ڈالر کی ہے جس کی شرح 6.5 فیصد ہے۔

ذرائع کا کہنا ہے کہ یو اے ای کی جانب سے مجموعی طور پر3 ارب ڈالر اسٹیٹ بینک میں رکھوائے گئے ہیں جس میں سے دو ارب ڈالرز جنوری 2024 تک رکھوائے گئے تھے۔

  کراچی: متحدہ قومی موومنٹ (ایم کیو ایم) پاکستان اور پاکستان مسلم لیگ(ن) کے درمیان کراچی کے تین حلقوں سمیت صوبے بھر میں متعدد قومی اور صوبائی اسمبلی کے حلقوں میں سیٹ ایڈجسٹمنٹ کا فیصلہ ہوگیا تاہم کراچی کے حلقہ این اے- 242 پر اتفاق رائے نہیں ہوسکا۔

ایکسپریس نیوز کے مطابق ایم کیو ایم پاکستان اور مسلم لیگ (ن) کی کمیٹیوں کا سندھ میں سیٹ ایڈجسٹمنٹ کے حوالے سے ساتواں اجلاس ہوا اور تین نشستوں پر سیٹ ایڈجسٹمنٹ کافیصلہ ہوگیا جبکہ ضلع کیماڑی کے حلقہ این اے 242 پر ایم کیو ایم پاکستان نے دستبرداری مشروط کردی۔

ذرائع کا کہناتھا کہ مسلم لیگ (ن) ملیر این- اے 229 اور این- اے 230 اور اسی حلقے میں صوبائی نشستوں پر اپنے امیدوار کھڑے کرے گی اور ایم کیوایم پاکستان ان کی حمایت کرے گی جبکہ ملیر این اے-231 اور صوبائی اسمبلی کی نشست پر ایم کیو ایم پاکستان کے امیدوار ہوں گے۔

دونوں جماعتوں کی قیادت کی منظوری سے کراچی کے ضلع جنوبی کے حلقے این- اے239 پر بھی سیٹ ایڈجسٹمنٹ کے تحت مسلم لیگ(ن) اپنا امیدوار لائے گی، اس کے علاوہ میرپور خاص، نواب شاہ اور سکھر کی قومی اسمبلی کی نشستوں پر بھی مسلم لیگ (ن) کے امیدوار ہوں گے تاہم صوبائی اسمبلی کی نشستوں پر ایم کیو ایم پاکستان کے امیدوار انتخاب لڑیں گے۔

ایم کیو ایم پاکستان اور مسلم لیگ (ن) کی کمیٹیاں ضلع کیماڑی میں این اے-242 پر سیٹ ایڈجسٹمنٹ کا فیصلہ نہیں کرسکیں جہاں سے سابق وزیراعظم شہباز شریف اور سابق ناظم کراچی مصطفیٰ کمال جیسے مضبوط امیدوار کے کاغذات نامزدگی جمع کرائے گئے ہیں۔

ذرائع نے بتایا کہ ایم کیوایم کی جانب سے اس حلقے میں دستبرداری مشروط کی گئی ہے کہ اس حلقے کی دونوں صوبائی اسمبلی کی نشستوں پر مسلم لیگ (ن) اپنا امیدوار کھڑا نہیں کرے گی تاہم دونوں جماعتوں کی قیادت کے درمیان اس حلقے کے حوالے سے بات چیت کا سلسلہ جا ری ہے اور جلد فیصلے کا امکان ہے۔