دوسرے ٹی ٹوئنٹی میچ میں پاکستان نے نیوزی لینڈ کو 136 رنز کا ہدف دیا ہے جس کے جواب میں نیوزی لینڈ کی بیٹنگ جاری ہے۔
گرین شرٹس اور نیوزی لینڈ کے درمیان جاری 5 میچز پر مشتمل ٹی ٹوئنٹی سیریز کا دوسرا ٹی ٹوئنٹی ڈونیڈن میں کھیلا جا رہا ہے۔
بارش کی وجہ سے ٹاس اور میچ اپنے مقررہ وقت کے بجائے تاخیر سے شروع ہوا۔
نیوزی لینڈ نے پاکستان کے خلاف ٹاس جیت کر فیلڈنگ کا فیصلہ کیا تاہم بارش کے باعث 5، 5 اوورز کم کر کے میچ کی فی اننگز 15 اوورز کی کر دی گئی
136 رنز کے تعاقب میں کیویز کی بیٹنگ جاری ہے۔
پاکستان کے خلاف نیوزی لینڈ کی پہلی وکٹ 66 رنز پر گر گئی، ٹم سائفرٹ 45 رنز بنا کر آؤٹ ہو گئے جبکہ دوسری وکٹ 87 رنز پر گری، فن ایلن 38 رنز بنا کر آؤٹ ہو گئے۔
نیوزی لینڈ کی تیسری وکٹ 91 رنز پر گری، نیوزی لینڈ کے کھلاڑی مارک چیپمین ایک رن بنا کر آوٹ ہوئے، چوتھی وکٹ جمی نیشم کی 97 رنز پر گری، جمی 5 رنز بنا کر آؤٹ ہو گئے۔
پاکستان کی نیوزی لینڈ کے خلاف بیٹنگ کا احوال
نیوزی لینڈ کے خلاف پاکستان کا آغاز اچھا نہ رہا اور پہلی وکٹ ایک رن پر گری جس میں اوپنر حسن نواز صفر پر آؤٹ ہو گئے، اس کے بعد محمد حارث بھی زیادہ دیر پچ پر نہ ٹھہر سکے اور 19 کے مجموعے پر 11 رنز بنا کر پویلین لوٹ گئے۔
پاکستان کی تیسری وکٹ 50 رنز پر گری اور عرفان خان 11 رنز بنا کر آؤٹ ہوئے جبکہ تیسری کے بعد چوتھی وکٹ 52 رنز پر گری جس میں خوشدل شاہ صرف 2 رنز بنا کر چلتے بنے۔
پاکستان کی پانچویں وکٹ 76 رنز پر گری اور کپتان سلمان آغا 28 گیندوں پر 46 رنز بناکر آؤٹ ہو گئے جس کے بعد شاداب نے 14 گیندوں پر 26 رنز بنائے اور 110 کے مجموعے پر وکٹ گنوا بیٹھے۔
پاکستان کی ساتویں وکٹ 111 رنز پر گری اور جہانداد خان صفر پر آؤٹ ہو گئے، پاکستان کی آٹھویں وکٹ 114 رنز پر گری، عبدالصمد 11 رنز بنا سکے، نویں وکٹ 135 رنز پر گری اور حارث رؤف ایک رن بنا کر رن آؤٹ ہو گئے۔
پاکستان نے 15 اوورز میں نیوزی لینڈ کو جیت کے لیے 136 رنز کا ہدف دیا۔
دوسرے ٹی ٹوئنٹی کے لیے قومی ٹیم میں ایک تبدیلی کی گئی ہے، اسپنر ابرار احمد کی جگہ حارث رؤف کی ٹیم میں واپسی ہوئی ہے۔
واضح رہے کہ میزبان نیوزی لینڈ کو پاکستان کے خلاف 5 میچز کی سیریز میں ایک صفر کی برتری حاصل ہے۔
