پاکستان سپر لیگ (پی ایس ایل) کے دسویں سیزن کے 18ویں میچ میں کوئٹہ گلیڈی ایٹرز نے ملتان سلطانز کو 10 وکٹوں سے شکست دے دی۔
میچ لاہور کے قذافی اسٹیڈیم میں کھیلا گیا، جہاں کوئٹہ گلیڈی ایٹرز کے کپتان سعود شکیل نے ٹاس جیت کر فیلڈنگ کا فیصلہ کیا۔
پہلے بیٹنگ ہوئے ملتان سلطانز کی بیٹنگ لائن ریت کی دیوار ثابت ہوئی اور پوری ٹیم 17 اوور میں محض 89 رنز بنا کر پویلین لوٹ گئی۔
ملتان سلطانز کے کپتان محمد رضوان 44 رنز کے ساتھ ناٹ آؤٹ رہے۔ ان کے علاوہ کوئی بھی بیٹر کوئٹہ کی بولنگ کا مقابلہ نہ کرسکا۔ ملتان سلطانز کے 9 کھلاڑی ڈبل فیگر میں بھی داخل نہ ہوسکے۔
ملتان سلطانز کی جانب سے کوئٹہ گلیڈی ایٹرز کو جیت کے لیے 90 رنز کا ہدف دیا جو انہوں نے 6.5 اوورز میں بغیر کسی نقصان کے حاصل کرلیا۔
پاکستان سپر لیگ میں کسی بھی ٹیم کا یہ سے کم اسکور ہے، اس سے قبل ملتان سلطانز کی ٹیم 2023 میں کراچی کنگز کے خلاف 101 رنز پر آؤٹ ہوئی تھی۔
محمد رضوان پاکستان سپر لیگ میں بیٹ کیری کرنے والے پہلے کھلاڑی بن گئے۔
کوئٹہ گلیڈی ایٹرز کی جانب سے خرم شہزاد نے 4 کھلاڑیوں کو آؤٹ کیا، جبکہ محمد وسیم جونیئر اور فہیم اشرف 2،2 وکٹیں لینے میں کامیاب رہے۔
گلیڈی ایٹرز نے 90 رنز کا ہدف ساتویں اوور میں بغیر کسی نقصان کے حاصل کرلیا، کوئٹہ گلیڈی ایٹرز کے فن ایلن نے 45 اورکپتان سعود شکیل نے 42 رنز اسکور کیے۔
ملتان سلطانز کی جانب سے کوئی بھی باؤلر وکٹ حاصل نہیں کرسکا۔
