معروف پاکستانی اداکار فواد خان 9 سال کے طویل عرصے کے بعد بھارتی فلم انڈسٹری میں واپسی کے لیے تیار تھے، مگر پہلگام حملے کے نتیجے میں ان کی آنے والی فلم ‘عبیر گلال’ بھارت کے بعد پاکستان میں بھی پابندی کا شکار ہو گئی۔
رواں ماہ 22 اپریل کو مقبوضہ کشمیر کے علاقے پہلگام میں حملے کے نتیجے میں 26 سیاحوں کی ہلاکت کے تناظر میں بھارت میں پاکستانی اداکاروں پر ایک بار پھر پابندیاں عائد کی گئیں، جس کا نشانہ فواد خان کی آنے والی فلم ‘عبیر گلال’ اور ہانیہ عامر کی بالی وڈ ڈیبیو فلم ‘سردار جی 3’ بن گئی ہے۔
پاکستان میں ریلیز کیوں روکی گئی؟
پاکستان میں بھارتی فلموں پر پہلے ہی پابندی عائد ہے تاہم ‘عبیر گلال’ کو انٹرنیشنل پراجیکٹ قرار دیے جانے کیوجہ سے توقع ظاہر کی جارہی تھی کہ یہ فلم پاکستان میں بھی ریلیز ہوگی، تاہم تازہ اطلاعات سامنے آنے کے بعد مداحوں کی یہ امیدیں بھی دم توڑ گئیں۔
پاکستانی ڈسٹری بیوٹر ستیش آنند نے بھارتی میڈیا سے گفتگو میں تصدیق کی کہ فلم ‘عبیر گلال’ پاکستان میں بھی ریلیز نہیں ہو گی۔
ان کے مطابق اس فیصلے کی بنیادی وجہ اس فلم میں پاکستانی اداکار فواد خان کے ساتھ بھارتی اداکارہ ‘وانی کپور’ کی موجودگی ہے۔
ستیش آنند کا کہنا تھا کہ ‘عبیر گلال پاکستان میں ریلیز نہیں ہوگی کیونکہ اس میں بھارتی ہیروئن وانی کپور شامل ہیں، یہ پاکستان کی طرف سے بھارتی اقدام کا جواب ہے’۔
ستیش آنند نے کہا کہ فلم پر پابندی کے سبب پاکستانی فلمی ڈسٹری بیوٹرز کو بھی بھاری مالی نقصان اٹھانا پڑے گا، یہ فلم کی ریلیز کیلئے انتہائی بُرا وقت ثابت ہوا ہے۔
فواد خان کا ‘بالی وڈ کریئر’ سیاست کی نذر
فواد خان نے بالی وڈ میں ‘خوبصورت’، ‘کپور اینڈ سنز’اور’ اے دل ہے مشکل’جیسی فلموں کے ذریعے خوب نام کمایا، ان کی مقبولیت پاکستان کے ساتھ ساتھ بھارت میں بھی کسی سے کم نہ تھی، تاہم 2016 کے اُری حملے کے بعد بھارتی حکومت نے پاکستانی فنکاروں پر پابندی لگا دی تھی، جو کئی سالوں تک جاری رہی۔
حالیہ عرصے میں یہ پابندی کچھ نرم ہوئی تو’عبیر گلال’جیسے موسٹ اوویٹڈ پراجیکٹ کو پہلگام حملے کے بعد دونوں ممالک میں ایک بار پھر سیاسی کشیدگی کا سامنا کرنا پڑگیا ہے۔
اب جبکہ ‘عبیر گلال’ پر بھارت اور پاکستان دونوں میں پابندی لگ چکی ہے، تو فلم کی دیگر ممالک میں ریلیز بھی غیریقینی نظر آرہی ہے، بعض میڈیا رپورٹس کے مطابق فلم 9 مئی کو ریلیز ہونی تھی تاہم اسے اب مؤخر کر دیا گیا ہے اور یہ واضح نہیں کہ فلم کبھی سینما گھروں تک پہنچ پائے گی یا نہیں۔
