کیا آپ کو معلوم ہے کہ یوٹیوب پر سب سے پہلی ویڈیو کونسی تھی؟
یقیناً بیشتر افراد کو علم ہوگا کہ یہ ویڈیو 20 سال پہلے یوٹیوب کے شریک بانی جاوید کریم نے ریکارڈ کی تھی جو سان ڈیاگو زو میں گھومتے ہوئے ہاتھیوں کے بارے میں بات کر رہے تھے۔
19 سیکنڈ کی اس ویڈیو کو یوٹیوب پر 23 اپریل 2005 کو اپ لوڈ کیا گہا تھا اور اب تک اسے 32 کروڑ سے زائد بار دیکھا جاچکا ہے اور ایک کروڑ 80 لاکھ سے زائد لائیکس مل چکے ہیں۔
مگر اب اسے ایک میوزیم کا حصہ بھی بنا دیا گیا ہے۔
لندن کے وکٹوریہ اینڈ البرٹ میوزیم (وی اینڈ اے) میں ہونے والی ایک نمائش میں اس ویڈیو کو رکھا گیا ہے۔
میوزیم کے ایک ترجمان نے بتایا کہ ہم نے اس ویڈیو شیئرنگ پلیٹ فارم کے ایک ابتدائی ویب پیج اور یوٹیوب پر سب سے پہلی ویڈیو کو خریدا ہے۔
ترجمان کے مطابق ہم گزشتہ 18 ماہ سے اس ویڈیو کے ابتدائی واچ پیج ڈیزائن کو تیار کرنے پر کام کر رہے تھے ۔
میوزیم نے اس کے لیے یوٹیوب کی ٹیم اور ایک ڈیزائن اسٹوڈیو سے شراکت داری کی تھی۔
اسے میوزیم کے ایک حصے میں رکھا گیا جبکہ اسے دیکھنے کے لیے ایک منی ڈسپلے بھی دیا گیا۔
